Problema di Salú Mental Ta un Krísis Rònt Mundu

“Semper mi ta sinti un tiki ansiedat, asta ora mi ta sintá mi so den un kamber.”

“Ora mi ta sinti mi hopi bon, mi ta bira preokupá. Mi sa di eksperensia ku ora mi ta sinti mi hopi kontentu, pronto lo mi sinti mi hopi tristu.”

“Mi ta purba di enfoká riba e dia djawe so, pero tin biaha mi ta kuminsá preokupá riba kos ku no a tuma lugá ainda.”

E ekspreshonnan ei ta di hende ku ta lucha ku problema di salú mental. Abo, òf un hende ku bo ta stima, a yega di sinti asina?

Bo por tin sigur ku bo no ta so. Problema di salú mental ta afektá hopi hende awe, sea ta nan mes, òf un hende ku nan ta stima, ta lucha kuné.

Sin duda nos ta bibando den “tempunan krítiko, difísil pa trata kuné,” ku ta kousa vários tipo di ansiedat. (2 Timoteo 3:1) Un estudio a kalkulá ku rònt mundu un di kada ocho hende ta lucha ku problema di salú mental. Na aña 2020, pa motibu di e pandemia di COVID-19, e kantidat di hende ku ta sufri di ansiedat a subi ku 26 porshento, i e kantidat di hende ku ta sufri di depreshon severo a subi ku 28 porshento.

Ta importante pa sa estadístika di problema di salú mental. Pero loke ta mas importante ta pa sa kon abo i bo sernan kerí por sinti mas mihó posibel.

Kiko ta salú mental?

Ora bo tin bon salú mental, normalmente bo ta sinti bo bon i bo por funshoná bon. Bo por trata ku un kantidat normal di strès, ta produktivo na trabou i sinti bo satisfecho ku bida.

Problema di salú mental . . .

NO TIN di haber ku debilidat personal.
TA un problema médiko ku ta kousa ansiedat i ta afektá un persona su pensamentu, estado emoshonal i komportashon.
Hopi bes por hasié difísil pa un persona tin amistat ku otro hende i pa trata ku preokupashon di tur dia.
Por afektá hende di diferente edat, kultura, pais, tribu, religion, edukashon òf klase sosial.

Kolekshon di plachi: 1. Un mucha hòmber hóben ta parse tristu i deprimí. 2. Un hòmber ta konsolá su esposa ku ta tristu. 3. Un señora ta papia ku un dòkter.

Yudansa pa problema di salú mental

Tin biaha, diripiente un persona por kuminsá sinti diferente, drumi muchu hopi òf muchu tiki, kome mas òf ménos ku promé òf sinti ansiedat òf tristesa. Si esei tuma lugá, kisas e persona mester di yudansa di un profeshonal médiko pa yud’é komprondé kiko ta kousa e kambionan ei i kon pa trata ku e problema. Pero unda bo por haña yudansa?

E hòmber di mas sabí ku a yega di biba, Hesukristu, a bisa: “Hende bon di salú no tin mester di dòkter, ma hende malu sí.” (Mateo 9:12) Hende ku ta lucha ku problema di salú mental ku haña tratamentu médiko apropiá i remedi por redusí e kantidat di síntoma ku nan ta eksperensiá, i nan por hiba un bida produktivo i felis. Ta sabí pa no tarda pa buska tratamentu si e síntomanan ta serio òf ta dura largu.a

Aunke Beibel no ta un buki médiko, e por yuda nos ku nos salú mental. Nos ta animá bo pa analisá e siguiente artíkulonan ku lo mustra nos kon Beibel por yuda nos trata ku problema di salú mental.

a E Toren di Vigilansia no ta rekomendá ningun tratamentu médiko en partikular. Kada persona mester evaluá e tratamentunan médiko disponibel promé ku e tuma un desishon personal.