Con Bo Por Enfrentá e Era di Informacion

NOS mester confrontá e echo cu tin hopi aspecto dje era di informacion dje década di ’90 cu lo sigui haci nos anshá. Riba algun di esakinan, nos no tin masha of ningun control. Na otro un banda, tin algun cos cu nos por haci pa eliminá gran parti of asta tur e ansiedad aki. Nos lo por bisa anto, cu sobrebibí den e era di informacion ta un tarea difícil pero recompensador.

Ricibidó i Dunadó di Informacion

Sea cu nos a clasificá nos mes como tal of no, atrabes di nos bida nos tur ta, te na cierto grado, ricibidó i dunadó di informacion. Sin embargo, nos celebro ta ricibí i procesá informacion den diferente manera. Un manera ta e capacidad asombroso dje celebro di procesá informacion subconcientemente.

Un otro manera ta e procesamentu conciente di informacion, manera durante un combersacion. Nos tin bastante control riba e tipo di procesamentu di informacion aki—tantu como dunadó i como ricibidó. Ora ta trata di combersá tocante cos di poco importancia, Bijbel ta spierta contra esnan cu “no solamente ta desocupá, sino tambe ta hibadó di redu i ta entremeté den asuntu di otro hende, papiando di loke nan no mag.” (1 Timoteo 5:13) Cu otro palabra, soru pa bo no perde hopi tempu ta papia di cosnan di poco importancia of asta tocante informacion perhudicial. No sea e clase di persona kende nan bida ta redu. Esaki por pone nos malgastá tempu i energia balioso, i por haci nos i otronan anshá. Lo bo por perde oportunidadnan pa capta i distribuí informacion cu ta berdaderamente edificante i crucial pa sobrebibí den e mundu turbulento aki.

Informacion hañá via lesamentu ta ser procesá concientemente i p’esei ta tuma mas tempu. Nos tur conocé e lamento yen di ansha: “Mi no por keda al dia cu mi lesamentu!” Bo ta haña cu bo tin demasiado material pa lesa i muchu tiki tempu pa lesa nan? Debí cu lesamentu ta tuma tempu, hopi bes e arte i placer di dje ta bai perdí den e era aki di informacion instantáneo. Demasiado hende ta permití television ocupá tur nan tempu. Sin embargo, ainda material skirbí ta e manera mas potente pa stimulá e imaginacion i pa transmití informacion, idea i conceptonan.

Con nos por trata cu asina tantu material di lesa cu ta exigí nos atencion i ta competí cu television, weganan di computer i otro actividadnan di recreo? E contesta ta: selectá. Nos lo por eliminá hopi dje ansiedad causá pa informacion dor di selectá, scoge of fiha prioridad na loke nos kier tende, mira, bisa of lesa. Nos lo por selectá eficasmente riba dos nivel.

Nos Mester di Asina Tantu Cos di Poco Importancia?

Loke nos ta percibí como nos necesidadnan hopi bes ta ser trocí dor di loke otronan ta pensa cu nos tin mester of dor di loke e propaganda asina bon presentá ta haci nos kere cu nos tin mester. Pa bo por superá e laberinto confuso aki di informacion, aplicá e regla básico aki: Ten’é simpel! Richard S. Wurman ta bis’é asina aki: “E secreto pa procesá informacion ta di limitá bo área di informacion na loke ta relevante pa bo bida . . . Ami ta kere cu ta un mito cu miéntras mas opcion bo tin, mas mihó lo bo por actua i mas libertad lo bo tin. Al contrario, mas opcion ta parce di producí mas ansiedad.”

Pues, pa loke ta lesamentu of wak television, ta bon pa examiná bo custumbernan. Puntra bo mes: ‘E ta necesario pa mi trabou of pa mi bida? Di berdad mi mester sa tur redu i e cosnan di poco importancia tocante hende famoso i supuestamente bunita den mundu? Con mi bida lo cambia si mi keda sin wak e programa di television aki, keda sin lesa e buki of revista aki, of pasa asina tantu tempu ta lesa korant?’ Algun hende por a analisá nan hábitonan di lesamentu i wak television i a eliminá material cu a prop nan mente i tambe nan cas cu yen cos. Por ehempel, nan a dicidí di aboná riba un korant so. Básicamente mayoria korant tin e mésun noticianan tog. Algun hende a pidi specíficamente pa stop di pone propaganda den nan brievenbus.

E homber mas importante cu a yega di biba, Jesucristo, a consehá pa hiba un bida simpel i no-complicá. (Mateo 6:25-34) Den hopi cultura asiático nan ta recomendá i aclamá simplesa. Asta den hopi cultura occidental hende ta reconocé simplesa como un manera superior di biba. Escritor Duane Elgin a declará: “Un bida mas simpel ta un bida cu mas propósito i cu un mínimo di distraicion innecesario.”

Bon, una bes cu bo a fiha prioridad pa cu informacion cu bo ta tuma di acuerdo cu bo necesidadnan, haci mescos cu interesnan, pasobra interes ta e forsa motivador tras di siñamentu. Sin embargo, aki e problema ta pa distinguí entre loke ta ègt interesá bo i loke kisas bo ta kere cu mester interesá bo pa asina agradá otro hende, kisas hende na bo trabou. Pero si bo por planea bo hábitonan di lesa, wak television i usa computer, mescos cu lo bo planea cualkier otro actividad, lo bo ripará cu si bo laga eseinan drei rond di cosnan berdaderamente importante, bo por haci bo bida mas placentero, sin ansiedad innecesario.

Pues, con bo por trata cu ansiedad causá pa informacion? Kisas nunca lo bo por elimin’é completamente, pero si bo sigui e par di sugerencianan simpel cu nos a duna aki, esei lo yudá bo hopi. Ten’é simpel, i clasificá e informacion segun bo necesidad i interesnan personal. E tempu ta bini ora cu tur complicacion di bida, incluyendo ansiedad causá pa informacion, lo ta cos di pasado, pero miéntras tantu, tene e maraviyanan di tecnologia moderno na nan lugá. Trata nan como un medio pa alcansá un meta. Soru pa bo no ta nan catibu i no keda admirá nan demasiado. Asina ei informacion útil lo ta edificante, animador i beneficioso, sin cu e ta causá bo ansiedad.

[Kuadro na página 11]

Purba Haci un Cambio

“Cancelá bo servicio di cabel TV, . . . anto usa e mésun cantidad [di cen] pa luna pa un of mas buki. Buki ta lo contrario di television: Nan ta slow, cautivador, inspirador, ta spierta e intelecto i ta stimulá creatividad.”

“Lo bo por pensa tambe pa limitá e tempu cu bo ta dedicá na Internet na un cierto cantidad di ora pa siman, of por lo ménos pa balansá e cantidad di tempu cu bo ta dedicá na computer cu un cantidad igual di tempu na lesamentu di buki.”—Data Smog—Surviving the Information Glut.

[Kuadro na página 12]

Sea e Doño, No e Catibu

“Paga e television. No ta existí un manera mas lihé pa recuperá e control riba e ritmo di bo bida, e pas den bo cas i e tópiconan riba cua bo ta pensa cu paga e aparato cu ta determiná pa demasiado di nos e ambiente den nos bida. Miyones di mericano a descubrí e serenidad i e poder cu nan ta haña ora nan usa e konopi di OFF, pa no papia mes dje oranan di tempu cu nan tin liber awor pa cuminsá haci algun dje cosnan cu den pasado nunca nan no tabatin tempu pa haci.”—Data Smog—Surviving the Information Glut.

[Kuadro na página 12]

Cuidou cu Internet

Individuonan inmoral ta usa Internet pa ehercé nan perversionnan sexual i pa purba haña contacto cu partnernan complaciente of víctimanan inocente. Otronan ta usa Internet pa promové nan mes proyectonan personal. Apóstatanan tambe ta crea Web site pa gara esnan ingenuo.

Ta necesario pa nos ta sumamente cauteloso ora di usa Internet. I mayornan sigur mester supervisá djacerca cualkier yu cu por ta usand’e. Ta cierto cu por haña hopi fuente útil, manera bibliotecanan pa haci investigacion, librerianan i canalnan di noticia. Por ehempel, recientemente Sociedad Watchtower a anunciá su propio Web site (http://www.watchtower.org), cu ta sirbi pa duna informacion basá riba echonan tocante Testigonan di Jehova. Tog, nos mester reconocé cu tin influencianan masha perhudicial eifó, incluyendo pornografia i apostasia.

Un cristian mester ta conciente di Pablo su conseho: “Esaki, pues, mi ta bisa i ta duna testimonio den Señor, pa boso no sigui cana mescos cu e nacionnan tambe ta cana den e inutilidad di nan mente . . . Ya cu nan a yega di ta mas ayá di tur sentido moral, nan a entregá nan mes na libertinahe pa obra tur clase di impuresa cu golosidad. Pero boso no a siña cu Cristo ta asina.” (Efesionan 4:17-20) Tambe: “Laga fornicacion i impuresa di tur sorto of golosidad ni sikiera ser mencioná entre boso, net manera ta pas pa hende santu; tampoco conducta bergonsoso ni papiamentu di disparate ni chiste obseno, cosnan cu no ta decente, sino, mas bien, dunamentu di gradicimentu.” (Efesionan 5:3, 4) Nos tin cu realisá cu hopi Web site a ser creá dor di hende cu intencion inmoral of desonesto. I hopi site cu kisas no ta inmoral of desonesto, manera gruponan pa combersá, ta un perdementu total di tempu. Keda leu di tur esakinan!