Kico Tin Mas Ayá Dje Planetanan?

Planeta X. Esaki tabata nomber cu astrónomo Percival Lowell a duna un planeta cu niun hende no a descubrí ainda, pero cu el a sospechá di su existencia den espacio mas ayá di Neptuno. El a cuminsá busca Planeta X na 1905 na su observatorio na Flagstaff, Arizona. Aunke Lowell a muri promé cu el a haña Planeta X, e búskeda cu el a cuminsá a sigui. Finalmente, na 1930, n’e observatorio di Lowell, Clyde Tombaugh a descubrí e planeta Pluto. Planeta X tabata existí berdad!

Unbes astrónomonan a cuminsá puntra nan mes: ‘Lo por tin mas Planeta X?’ Seis década di búskeda intenso a sigui, i den e añanan mas recien dje búskeda aki, nan a asta usa nave espacial. Aunke nan a descubrí miles di asteroide, strea, galaxia i nébula, nan no a mira ningun planeta nobo.

Pero tog, e búskeda no a stop. Científiconan a cuminsá usa tecnologianan nobo i telescopnan mas poderoso pa detectá obhetonan cu ta move den espacio, cu ta miyones di biaha mas dòf cu nos por mira cu nos wowo. Finalmente nan esfuersonan a duna resultadonan positivo. Asombrosamente, nan a mira decenas di planeta mas chikitu mas ayá di Pluto!

Unda e planeta chikitunan ei ta? Cuantu mas lo por tin? Nan ta e obhetonan mas leu den nos sistema solar?

E Obhetonan Mas Leu

E sistema solar ta consistí di nuebe planeta cu ta drei rond di solo. Ademas, tin miles di asteroide ta bula rond den espacio; nan ta mas tantu entre Mars cu Jupiter. A descubrí casi mil cometa tambe.

Cua dje obhetonan aki ta mas leu for di solo? Eigenlijk ta e cometanan, i nan ta hopi mas leu cu tur e otro obhetonan.

E palabra “cometa” ta bini dje palabra griego ko·mé·tes, cu ta nificá “cu cabei largu,” refiriendo na e rabu largu cu nan cabes briyante ta laga atras. Cometanan tabata fuente di hopi supersticion i histeria. Ainda observadónan ta referí na bishita di cometa como aparicion. Esaki ta bini dje creencia bieu cu nan tabata obhetonan fantasma. Di con hende tabatin asina miedu di nan? Un motibu ta cu tin biaha nan bishita a tuma lugá pareu cu sucesonan trágico.

Te ainda cometa ta causa fanatismo cerca algun hende. Na mart 1997, na California, Merca, 39 miembro dje culto Porta di Shelu, a cometé suicidio pareu ora e cometa Hale-Bopp tabata acercando solo. Di con? Pasobra nan tabata spera cu un nave espacial di criaturanan di otro planeta, cu supuestamente tabata scondí tras dje cometa, lo a bin busca nan.

No ta tur hende tabatin ideanan iracional tocante cometa. Den siglo 4 P.E.C., Aristóteles a duna e posibilidad cu cometa lo ta nubia di gas briyante masha haltu den shelu. Algun siglo despues, e filósofo romano Seneca tabatin e perspicacia pa duna como posibilidad cu cometa tabata cuerpo celestial cu ta move den espacio.

Cu yegada di telescop i e descubrimentu di Newton su ley di gravedad, e estudio di cometa a bira un ciencia mas exacto. Pa 1705, Edmond Halley a determiná cu cometanan ta drei rond di solo den trayectorianan largu, den forma di elípsis. Ademas, el a ripará cu cometanan cu a aparecé na aña 1531, 1607 i 1682 tabatin trayectorianan similar i cu nan tabatin un periodo di rond di 75 aña entre nan bishitanan. Halley tabata corecto ora el a duna e posibilidad cu tur e aparicionnan aki tabata e mésun cometa, cu despues nan a yama Cometa Halley.

Awor investigadónan sa cu cometa ta un núcleo sólido, di generalmente entre 1 pa 20 kilometer den diameter. Por describí e núcleo mihó como un ijsberg sushi i scur cu ta consistí mas tantu di ijs mesclá cu stof. Imágennan djacerca dje Cometa Halley tumá cu yudansa dje nave espacial Giotto na 1986, ta mustra cu gas i stof ta spuit sali for dje cometa. Loke e ta saca aki ta e cabes i rabu briyante dje cometa cu nos ta mira for di tera.

Famia di Cometa

Tin dos famia di cometa cu ta drei rond di solo. E cantidad di tempu cu e ta tuma pa dal un buelta completo rond di solo, ta indicá den cua di dos categoria un cometa ta cai. Cometanan di corto periodo, manera Cometa Halley, ta tuma ménos cu 200 aña pa completá cada buelta rond di solo. Nan órbita ta sigui un trayectoria cerca dje eclíptico, cu ta e área espacial den cua tera i otro planetanan ta drei rond di solo. Lo por tin mil miyon cometa di corto periodo. Mayoria ta drei mas ayá dje planetanan mas pafó, esta Neptuno i Pluto, miles di miyones di kilometer leu for di solo. De bes en cuando, e órbita di algun di esakinan, manera Cometa Encke, a hala mas cerca di solo dor cu nan a pasa cerca dje planetanan.

Anto kico di cometanan di periodo largu? Distinto dje cometanan di corto periodo, cometanan di periodo largu ta drei rond di solo for di tur direccion. Entre nan tin cometa Hyakutake i Hale-Bopp, cu a duna shownan espectacular durante nan aparicionnan recien. Sin embargo, ta te aki miles di aña nan lo ta bek!

Tin un cantidad inmenso di cometa di periodo largu cu ta move den e partinan mas pafó dje sistema solar. Nan a yama e multitud aki e nubia di Oort, segun e nomber dje astrónomo hulandes kende a indicá su existencia pa promé biaha na 1950. Cuantu cometa tin den e nubia aki? Astrónomonan ta calculá cu tin mas cu un biyon! Algun dje cometanan aki ta biaha riba distancianan di un aña di lus of mas leu for di solo.a Cu e distancianan ei, un buelta so lo por tuma mas cu dies miyon aña!

Miriada di Planeta Chikitu

E planetanan chikitu mencioná na cuminsamentu dje artículo aki ta den e mésun region mas ayá di Pluto huntu cu e cometanan di corto periodo. Desde 1992, astrónomonan a descubrí rond di 80 dje cuerponan chikitu aki, parecido na planeta. Lo por tin dies di miles di nan cu ta mas grandi cu 100 kilometer den diameter. E miniplanetanan aki ta forma e faha di Kuiper, yamá segun un científico kende casi 50 aña pasá a sospechá di su existencia. Probablemente e obhetonan den e faha di Kuiper ta consistí di un combinacion di baranca cu ijs.

Acaso e descubrimentunan recien dje planetanan chikitu aki a cambia e manera cu ta mira e parti interno dje sistema solar? Sigur cu sí! Awor nan ta pensa cu Pluto, su luna Charon, Triton, cu ta un satélite di Neptuno i algun otro obheto di ijs den e parti interno dje sistema solar a bini for dje faha di Kuiper. Algun astrónomo ta asta kere cu no por yama Pluto un planeta principal mas!

Di Unda Nan A Bini?

Ki mishi un cantidad abundante asina di cometa i planeta chikitu den e faha di Kuiper? Segun astrónomonan, e obhetonan aki a forma for di un nubia anterior di partículanan di stof i ijs condensá, cu a pega na otro te forma obhetonan mas grandi. Pero e obhetonan aki tabata muchu leu for di otro pa sigui crece bira planetanan grandi.

Cometanan di periodo largu tambe ta forma un parti substancial dje sistema solar. Na tur, e masa dje cometanan aki ta un 40 biaha mas grandi cu e masa di tera. Nan ta pensa cu mayoria di nan a forma mas promé den e historia dje sistema solar, parti pafó den e region dje planetanan gigante di gas.

Ta kico a manda e cometanan aki den nan órbitanan actual asina leu for di solo? Aparentemente, planetanan grandi manera Jupiter, a actua como slinger cu gran poder di gravedad cu a pusha cualkier cometa cu a yega cerca nan.

Ta Sigui Explorá Cometa

Cometanan ta consistí di algun dje materialnan mas primitivo den e sistema solar. Con por investigá e obhetonan fasinante aki mas mihó? Ora algun cometa a pasa den a parti interior dje sistema solar, nan por a ser studiá djacerca. Tin vários agencia espacial cu ta planea pa manda algun nave espacial pa explorá cometa durante e añanan binidero.

Ken sa kico mas nan lo haña den nos sistema solar? E descubrimentunan nobo i e comprendimentu di obhetonan leu cu ta drei rond di solo, ta duna mas forsa na e texto bíblico di Isaías 40:26: “Hisa boso wowo na haltu i mira. Ken a crea e cosnan aki? Ta Esun cu ta saca e ehército di nan asta pa number, tur di cua e ta yama asta pa nomber.”

[Nota]

[Kuadro na página 27]

YOBIDA DI COMETA I METEORO

Ora bo mira un lus espectacular di meteoro pasa dor di shelu, bo sa puntra bo mes si el a bini di un cometa? Esei lo por tabata e caso. Ora un cometa ta acercá solo, su núcleo di ijs ta desintegrá poco-poco, lagando un rabu di pida-pida baranca atras, esta meteoroide. E pida-pidanan aki no ta mes leve cu e stof den un rabu di cometa i p’esei e bientu solar no ta supla nan benta nan den espacio. Mas bien, nan ta forma un stroom di pida-pida baranca cu ta pasa rond di solo den e mésun trayectoria dje cometa for di cua nan a sali.

Tur aña tera ta contra cu vários dje stroomnan di meteoroide asina. E yobida di meteoro Leonid cu nos por mira meimei di november, ta e consecuencia di material cu e cometa Tempel-Tuttle a laga atras. E yobida aki ta duna un show excepcional cada 33 aña. Observadónan di shelu cu a mira e yobida di Leonid na 1966, a informá cu nan a mira mas cu 2.000 meteoro pa minuut, loke ta prácticamente un tormenta! Na 1998 el a producí bolanan di candela deslumbrante, i sigur lo e ta bale la pena pa mira e binidero november aki.

[Diagram/Plachinan na página 24-26]

1. Cometa Hale-Bopp na 1997

2. Edmond Halley

3. Percival Lowell

4. Cometa Halley na 1985

5. Cometa Halley na 1910

6. Gas i stof cu ta spuit sali for di Cometa Halley

[Credit Lines]

1) Tony i Daphne Hallas/Astro Photo; 2) Culver Pictures; 3) Cortesia di Observatorio Lowell/Dictionary of American Portraits/Dover

4) Cortesia di Observatorio Anglo-Australiano, potret sacá dor di David Malin; 5) National Optical Astronomy Observatories; 6) e Proyecto Giotto, dr. Horst Uwe Keller, investigadó principal di HMC, e telescop di Cánada-Francia-Hawai

[Diagram]

(For fully formatted text, see publication)

7. Orbita di vários cometa

Cometa Kohoutek

Cometa Halley

Solo

Tera

Cometa Encke

Jupiter

[Pictures]

8. Promé cu el a dal den Jupiter na 1994, cometa Shoemaker-Levy 9 a kibra na 21 pida

9. Superficie di Pluto

10. Cometa Kohoutek, 1974

11. Asteroide Ida cu su luna Dactyl

[Credit Lines]

8) Dr. Hal Weaver i T. Ed Smith (STScI) i NASA; 9) A. Stern (SwRI), M. Buie (Lowell Obs.), NASA, ESA; 10) Potret di NASA; 11) NASA/JPL/Caltech