Choke di Cometa!

PA UN siman largu na juli 1994, e chokenan di rond di 20 fragmento dje cometa Shoemaker-Levy 9 den e planeta Jupiter a capta e atencion rond mundu di esnan cu ta wak strea. Observadornan di cometa a keda asombrá, ya cu e despliegue a resultá di ta, manera un astrónomo a bisa, “e drama celestial di siglo.” Pakico e suceso aki a surpasá tur expectativa?

Pa cuminsá, e fragmentonan dje cometa, bayendo na velocidadnan di rond di 200.000 kilometer pa ora, a producí explosionnan inmenso cu solamente e pronósticonan di mas extremo a indicá. Ora e fragmentonan a drenta e atmósfera di Jupiter, esei a producí rayonan cu a dura djis un par di seconde. Despues, gasnan supercayente a ser di spuit den atmósfera, formando balanan inmenso di candela cu pa e explosionnan di mas grandi a surpasá brevemente e temperatura dje superficie di solo! Pa e próximo 10 pa 20 minuutnan, un columna grandi di huma i gas a subi bai te cu 3.200 kilometer den laira.

Ademas, loke na cuminsamentu nan a kere cu tabata condicionnan desfaborabel pa observacion, a resultá di ta casi ideal. Debí cu e impactonan a sosodé n’e banda scur di Jupiter, tabata mas fácil pa detectá e rayonan briyante i e columnanan di huma i gas. Den algun caso por a mira e cabes dje columnanan subi i pasa over dje horizonte di Jupiter, i dentro di dies minuut dje impacto, e rotacion di Jupiter a trece e sitionan di impacto den bista directo dje tera. Un otro dies minuut mas a trece e sitionan di impacto den e lus di solo. Pa e ora ei, e columnanan di huma i gas a desvanecé, anto manchanan inmenso i scur a reemplasá nan. E plekinan aki—esun mas grandi tabata dos biaha mas grandi cu e tamaño dje tera—no a ser pronosticá dor di astrónomonan, i tog nan a resultá di ta e rasgonan mas distintivo cu por a ser mirá.

E nave espacial Galileo a haña bistasonan directo dje impactonan. Den e órbita di tera, e telescop espacial Hubble a mira e impactonan den e ondanan di lus visibel i ultravioleta. Otro observatorionan a midi e reaccion dje explosionnan di cometa na vários onda scogí specíficamente pa duna informacion balioso. Na Polo Sur, solo no a sali ningun momento, permitiendo asina pa mira 24 ora pa dia for dje telescop Explorador Infrarood di Polo Sur.

Observadornan dje firmamento a haña un obsekio raro. Na ki tempu e próximo espectáculo di cometa lo tuma lugá? Cometa Hale-Bopp, ya caba visibel pa simpel bista, kisas ta e cometa di mas briyante cu nos lo mira e siglo aki. Lo e pasa dentro di 198 miyon kilometer di nos planeta. Observadornan di cometa den e Hemisferio Norte lo kier mira Hale-Bopp durante e luna di april 1997. Tur esaki ta recordá nos cu nos ta biba den un universo dinámico i cu ta cambia henter ora, creá dor di Jehova, “e Tata dje lusnan celestial.”—Santiago 1:17; Salmo 115:16.

[Plachi na página 12]

Manchanan scur ta marca e áreanan caminda fragmentonan di cometa a dal den Jupiter

[Rekonosementu]

Hubble Space Telescope Comet Team and NASA