Parti 7
Kico Tabata e Resultado di Rebelion?
1-3. Con tempu a proba cu Jehova tabatin razon?
ENCUANTO e cuestion di Dios su derecho di goberná, kico tabata e resultado di tur e siglonan di gobernacion humano independiente di Dios aki? Hende a resultá di ta mihor gobernante cu Dios? Si nos husga mediante e registro di hende su inhumanidad pa cu hende, siguramente cu nó.
2 Ora nos promé mayornan a rechasá Dios su gobernacion, desaster a sigui. Nan a trece sufrimentu riba nan mes i riba henter e famia humano cu a bini for di nan. I nan no tabatin ningun persona pa culpa sino nan mes. Dios su Palabra ta bisa: “Nan a actua ruinosamente di nan mes parti; nan no ta su yunan, e defecto ta di nan mes.”—Deuteronomio 32:5.
3 Historia a mustra e exactitud di Dios su spiertamentu na Adam i Eva cu si nan a kita bai for di bou di Dios su provisionnan, nan lo a deteriorá i eventualmente muri. (Génesis 2:17; 3:19) Nan a kita bai for di bou di Dios su gobernacion i cu tempu nan a deteriorá i a muri.
4. Pakico nos tur a nace imperfecto, incliná na malesa i morto?
4 Loke a sosodé despues cu tur nan desendencia tabata manera Romano 5:12 ta splica: “Mediante un solo homber [Adam, cabes di famia di humanidad] picá a drenta mundu i morto mediante picá i asina morto a plama na tur hende.” Pues ora nos promé mayornan a rebelá contra Dios su superintendencia, nan a bira pecadornan defectuoso. Na armonia cu ley di genética, e imperfeccion cu a resultá tabata tur loke nan por a pasa na nan desendencia. Ta p’esei nos tur a nace cu defecto, incliná na malesa i morto.
5, 6. Kico historia a mustra encuanto hende su esfuersonan pa trece berdadero pas i prosperidad?
5 Hopi siglo a pasa. Imperionan a bin i a bai. Tur tipo di gobiernu imaginabel a ser purbá. Sin embargo, bes tras bes, cosnan teribel a sosodé cu e famia humano. Despues di seis mil aña, un persona lo a pensa cu hende lo a progresá te n’e punto di establecé pas, husticia i prosperidad mundialmente i cu pa awor nan lo mester a dominá e balornan positivo di amabilidad, compasion i cooperacion.
6 E realidad, sin embargo, ta net lo contrario. Ningun tipo di gobiernu humano hamas diseñá a trece berdadero pas i prosperidad pa tur hende. Den e siglo 20 aki so, nos a mira e asesinato sistemático di miyones di hende durante e Holocausto i e matansa di mas cu 100 miyon den gueranan. Den nos tempu cantidad incontabel di hende a ser torturá, asesiná i encarcelá debí na intolerancia i diferencianan político.
E Situacion Awe
7. Con por describí e condicion dje famia humano awe?
7 Ademas, considerá e condicion general dje famia humano djawe. Crímen i violencia ta tur caminda. Abuso di droga ta un epidemia. Enfermedadnan transmití sexualmente ta mas cu un epidemia. E temibel enfermedad AIDS ta afectando miyones di hende. Dies di miyones di hende ta muri di hamber of enfermedad cada aña, mientras cu un cantidad chikitu tin rikesa enorme. Hende ta contaminá i sakea e tera. Bida di famia i balornan moral a cai tur caminda. Berdaderamente, bida djawe ta reflehá e gobernacion mahos di ‘e dios dje mundu aki,’ Satanas. E mundu di cua e ta doño di dje ta friu, cruel i completamente corupto.—2 Corintio 4:4.
8. Pakico nos no por yama logronan humano berdadero progreso?
8 Dios a permití suficiente tempu pa hende alcansá e máximo di nan progreso científico i material. Pero ta berdadero progreso ora e arco i flecha a ser reemplasá dor di mitrayeur, tanki di guera, avion di bombardeo i misilnan nuclear? Ta progreso ora hende por biaha den espacio pero no por biba huntu na pas riba tera? Ta progreso ora hende tin miedu di cana anochi den caya, of asta den dia na algun lugar?
Loke Tempu A Demostrá
9, 10. (a) Kico e siglonan di tempu cu a pasa a mustra claramente? (b) Pakico Dios lo no kita boluntad liber?
9 Loke e prueba di siglonan di tempu a mustra ta cu no ta posibel pa hende dirigí nan mes pasonan exitosamente separá for di Dios su gobernacion. No ta posibel pa nan haci esei mescos cu nan no por biba sin come, bebe i hala rosea. E evidencia ta cla: Nos tabata diseñá pa dependé riba nos Creador su guia mesun sigur cu nos tabata creá pa dependé riba cuminda, awa i aire.
10 Dor di permití maldad, Dios una bes i pa semper a demostrá e resultadonan tristu di malusá boluntad liber. I boluntad liber ta un don asina precioso cu en bes di kit’é for di hende, Dios a permití nan mira kico su maluso ta nificá. Dios su Palabra ta papia e berdad ora e ta bisa: “No ta pertenecé na hende cu ta canando pa sikiera dirigí su paso.” Tambe e ta papia berdad ora e ta bisa: “Hende a dominá hende pa su daño.”—Jeremías 10:23; Eclesiastés 8:9.
11. Tin cualkier forma di gobernacion humano cu a eliminá sufrimentu?
11 Dor cu Dios a permití gobernacion humano pa seis mil aña ta ilustrá poderosamente cu hende no ta capas pa stop sufrimentu. Ningun tempu el a haci esei. Por ehempel, den su dia Rey Salomon di Israel, cu tur su sabiduria, rikesa i poder, no por a rectificá e miseria cu a resultá for di gobernacion humano. (Eclesiastés 4:1-3) Di igual manera, den nos dia lidernan mundial, asta cu e avansenan tecnológico mas recien, no ta capas pa eliminá sufrimentu. Peor ainda, historia a mustra cu hende independiente di gobernacion di Dios a aumentá sufrimentu en bes di elimin’é.
Dios su Punto di Bista di Largo Alcanse
12-14. Ki beneficionan di largo alcanse ta bini como resultado cu Dios a permití sufrimentu?
12 Dor cu Dios a permití sufrimentu esei a resultá doloroso pa nos. Pero el a tuma un punto di bista di largo alcanse, sabiendo e bon resultadonan cu lo bin a lo largo. Dios su punto di bista lo beneficiá criaturanan, no solamente pa un par di aña of un par di mil, sino pa miyones di aña, sí, pa tur eternidad.
13 Si hamas mester presentá na cualkier tempu den futuro, e situacion cu un persona ta malusá boluntad liber pa cuestioná Dios su manera di haci cosnan, lo no ta necesario pa permiti’é tempu pa proba su punto di bista. Dor di a permití rebeldenan caba pa miles di aña, Dios a establecé un precedente legal cu por ser aplicá atraves di eternidad na cualkier lugar den e universo.
14 Pa motibu cu Jehova a permití maldad i sufrimentu n’e tempu aki, lo a ser probá ampliamente caba cu nada cu ta fuera di armonia cuné por prosperá. Lo a ser mustrá fuera di duda cu ningun plan independiente di hende of criaturanan spiritual por trece beneficionan duradero. Pues, Dios lo ta plenamente hustificá anto pa eliminá cualkier rebelde rápidamente. “Esnan malbado lo e anikilá.”—Salmo 145:20; Romano 3:4.
[Plachi na página 15]
Despues cu nos promé mayornan a scoge independencia for di Dios, eventualmente nan a bira bieu i a muri
[Plachi na página 16]
Gobernacion humano separá di Dios a resultá calamitoso
[Rekonosementu]
Potret di warda costa mericano