E Idea Ta Drenta Religionnan Oriental

“Semper mi a pensa cu inmortalidad di alma tabata un berdad universal cu tur hende a aceptá. P’esei mi a keda realmente sorprendí ora mi a haña sa cu algun gran intelectual di Oriente i tambe di Occidente a argumentá fervientemente contra e creencia. Awor mi ta puntra mi mes con e idea di inmortalidad a drenta den e conciencia hindú.”—UN STUDIANTE DI UNIVERSIDAD CU A LANTA COMO HINDU.

1. Pakico nos ta interesá pa sa dje desaroyo i plamamentu dje doctrina di inmortalidad humano den e vários religionnan?

CON e idea cu hende tin un alma cu ta inmortal a drenta hinduismo i otro religionnan oriental? E pregunta ta interesante asta pa hende den mundu occidental cu tal bes no ta conocí cu e religionnan aki, ya cu e creencia ta influenciá tur hende su punto di bista tocante futuro. E siñansa di inmortalidad humano ta un factor comun den mayoria religion awe. P’esei, nos sigur por haña mihó comprendimentu i comunicacion ora nos sa con e concepto a desaroyá.

2. Di con India tabata un fuente notabel di influencia religioso na Asia?

² Ninian Smart, un profesor di estudionan religioso n’e Universidad di Lancaster na Gran Bretania, ta comentá: “E centro mas importante di influencia religioso na Asia tabata India. Esaki no ta djis pasobra India mes a duna lus na un cantidad di religion—hinduismo, budismo, jainismo, religion sikh, etc.—sino debí cu un di nan, budismo, a influenciá profundamente e cultura di prácticamente henter Oost Asia.” Hopi cultura cu a ser influenciá den e manera aki “ainda ta considerá India como nan patria spiritual,” segun Nikhilananda, erudito riba e tereno di hinduismo. Con anto, e siñansa aki di inmortalidad a infiltrá India i otro partinan di Asia?

Hinduismo Su Siñansa di Reencarnacion

3. Segun un historiadó, ken posiblemente a hiba e idea di transmigracion di alma India?

³ Den siglo seis P.E.C., miéntras cu Pitágoras i su siguidónan na Grecia tabata boga p’e teoria di transmigracion di alma, sabionan hindú cu a biba a lo largu dje riunan Indus i Ganges na India, tabata desaroyando e mésun concepto. E aparicion simultáneo dje creencia aki “den e mundu griego i na India sigur no por tabata un coincidencia,” segun historiadó Arnold Toynbee. E ta señalá como “un posibel fuente comun [di influencia], e sociedad nomádico eurasiático cu, den siglo 8 i 7 P.E.C., a pasa dor di India, zuidwest Asia, e region di steppe a lo largu dje costa nort di Laman Pretu, i e penínsulanan di Balkan i Anatolia.” Ta parce cu e tribunan migrante eurasiático a hiba huntu cu nan e idea di transmigracion India.

4. Di con e concepto di transmigracion di alma a atraé sabionan hindú?

⁴ Hinduismo a cuminsá hopi mas promé na India, cu yegada dje arionan rond di 1500 P.E.C. For di principio, hinduismo a sostené e creencia cu e alma tabata distinto for di curpa i cu e alma a sigui biba despues di morto. Di manera cu hindúnan a practicá adoracion di antepasado i a pone cuminda pa alma di nan defuntunan come. Siglonan despues ora e idea di transmigracion di alma a yega India, e idea mester a atraé e sabionan hindú kendenan tabata lucha cu e problema universal di maldad i sufrimentu humano. Combinando e transmigracion aki cu loke ta ser yamá e ley di karma, e ley di causa i efecto, sabionan hindú a desaroyá e teoria di reencarnacion caminda mérito i faltanan den un persona su bida ta ser recompensá of castigá den e siguiente bida.

5. Segun hinduismo, kico ta e meta final dje alma?

⁵ Pero tabatin un concepto mas cu a influenciá e siñansa di hinduismo tocante alma. Segun e Encyclopædia of Religion and Ethics: “Ta parce cierto cu na e mésun tempu cu e teoria di transmigracion i karma a ser formá, of asta mas promé, un otro concepto . . . tabata hañando gradualmente forma den un círculo intelectual chikitu na N. India—e concepto filosófico di e Brahman-Ātman [e Brahman supremo i eterno, e realidad supremo].” A combiná e idea aki cu e teoria di reencarnacion pa definí e meta final di hindúnan: libra for dje ciclo di transmigracion pa por ta unu cu e realidad supremo. Hindúnan ta kere cu bo ta logra esaki dor di haci esfuerso pa bo comportacion ta aceptabel desde un punto di bista social i dor di tin conocimentu hindú special.

6, 7. Kico hinduismo di actualidad ta kere tocante bida despues di morto?

⁶ Asina sabionan hindú a forma e idea di transmigracion di alma den e doctrina di reencarnacion dor di combin’é cu e ley di karma i cu e concepto di Brahman. Octavio Paz, un poëta ganadó di Premio Nobel i ex-embahador mexicano na India, ta skirbi: “Segun cu hinduismo a plama, a plama tambe . . . un idea cu ta crucial pa brahmanismo, budismo i otro religionnan asiático: metemsicósis, e transmigracion di alma atrabes di existencianan sucesivo.”

⁷ E doctrina di reencarnacion ta e pilar principal di hinduismo di actualidad. Filósofo hindú Nikhilananda ta bisa: “E conviccion di tur hindú deboto ta cu tur hende tin derecho di logra inmortalidad i cu esei no ta e prerogativa di un cantidad selectá.”

E Ciclo di Renacementu den Budismo

8-10. (a) Con budismo ta definí existencia? (b) Con un erudito riba e tereno di budismo ta splica renacementu?

⁸ Budismo a ser fundá na India rond di 500 P.E.C. Segun tradicion budista, un prins di India di nomber Siddhārtha Gautama, cu despues di a ricibí iluminacion a bira conocí como Buda, a funda budismo. Siendo cu el a originá for di hinduismo, su siñansanan den algun cos ta similar na esnan di hinduismo. Segun budismo, existencia ta un ciclo continuo di renacementu i morto, i mescos cu den hinduismo, cada individuo su státus den su bida actual ta ser definí dor dje echonan di su bida anterior.

⁹ Pero budismo no ta definí existencia den términonan di un alma personal cu ta sigui biba despues di morto. Arnold Toynbee a comentá: “[Buda] a mira den e sike humano solamente un seri di condicion sicológico descontinuo i pasahero, cu ta ser tené huntu solamente dor di deseo.” Sin embargo, Buda a kere cu algu—un of otro condicion of forsa—ta pasa di un bida pa un otro. Dr. Walpola Rahula, un erudito riba e tereno di budismo, ta splica:

¹⁰ “Un ser no ta nada otro sino un combinacion di forsa of energianan físico i mental. Loke nos ta yama morto ta e paro total dje funcionnan dje curpa físico. Tur e forsa i energianan aki ta para por completo ora cu e curpa stop di funcioná? Budismo ta bisa: ‘No.’ Boluntad, deseo, anhelo pa existí, pa sigui biba, pa bira cada bes mas tantu, ta un forsa tremendo cu ta move bidanan completo, existencianan completo, cu ta move asta henter e mundu. Esaki ta e forsa di mas grandi, e energia di mas grandi na mundu. Segun budismo, e forsa aki no ta para ora cu e curpa stop di funcioná, loke ta morto; sino e ta sigui manifestá su mes den otro forma, produciendo reexistencia, loke ta ser yamá renacementu.”

11. Kico ta e punto di bista budista di bida despues di morto?

¹¹ E punto di bista budista di bida despues di morto ta esaki: Existencia ta eterno a ménos cu e individuo alcansá e meta final di nirvana, esta, liberacion for dje ciclo di renacementu. Nirvana no ta un estado di dicha eterno ni di bira unu cu e realidad supremo. E ta simplemente un estado di inexistencia: e “lugá caminda no tin morto,” fuera di existencia individual. Webster’s Ninth New Collegiate Dictionary ta definí “nirvana” como “un lugá of estado liber di preocupacion, dolor of realidad externo.” En bes di busca inmortalidad, budistanan ta ser animá pa super’é dor di alcansá nirvana.

12-14. Con vários forma di budismo ta transmití e idea di inmortalidad?

¹² Segun cu budismo a plama na vários parti di Asia, el a modificá su siñansanan pa acomodá creencianan local. Por ehempel, budismo mahayana, e forma di budismo cu ta predominá na China cu Hapon, ta kere den bodhisatvanan, of futuro budanan, celestial. Bodhisatvanan ta posponé di drenta nirvana pa nan por experenciá un sinfin di renacementu afin di sirbi otro hende i yuda nan alcansá nirvana. Pues, un persona por scoge pa sigui den e ciclo di renacementu asta despues di alcansá nirvana.

¹³ Un otro ahuste cu tabatin hopi influencia, foral na China cu Hapon, ta e doctrina dje Pais Puru den Occidente, creá dor di Buda Amitabha of Amida. Esnan cu ta inbocá e nomber di Buda cu fe, ta nace di nobo den e Pais Puru, of paradijs, caminda condicionnan ta contribuí mas na logra e iluminacion final. Kico a desaroyá for dje siñansa aki? Profesor Smart, mencioná anteriormente, ta splica: “Manera por a spera, e splendornan di paradijs, describí bibu den algun scritura mahayana, a bin reemplasá nirvana den e imaginacion popular como e meta final.”

¹⁴ Budismo di Tibet ta incorporá otro elementonan local. Por ehempel, e buki tibetano tocante mortonan ta describí e destino di un persona den e estado intermedio promé cu e nace di nobo. E ta bisa cu e mortonan ta ser exponé n’e lus briyante dje realidad supremo, i esnan cu no por wanta e lus no ta adkerí liberacion, sino ta nace di nobo. Ta bisto cu budismo den su vários formanan ta transmití e idea di inmortalidad.

Adoracion di Antepasado den Sintoismo di Hapon

15-17. (a) Con e adoracion di spiritu di antepasado a desaroyá den sintoismo? (b) Con e creencia den inmortalidad di alma ta un elemento básico den sintoismo?

¹⁵ Religion a existí na Hapon promé cu yegada di budismo den siglo seis P.E.C. E tabata un religion sin nomber, i el a consistí di creencianan asociá cu moralnan i custumbernan dje pueblo. Sin embargo, cu introduccion di budismo, a lanta e necesidad pa distinguí e religion hapones for di esun stranhero. I asina e designacion “shinto,” cu ta nificá “e caminda dje diosnan,” a originá.

¹⁶ Ki creencia e sintoismo original tabatin tocante bida despues di morto? Kodansha Encyclopedia of Japan ta splica cu, cu e binida di cultivo di aros riba tereno cu awa, “tabata necesario pa comunidadnan ta bon organisá i stabil pa cultivá e tera, i nan a desaroyá ritonan di agricultura, cu despues a hunga un papel asina importante den shintō.” Miedu di almanan di defuntu a pone e pueblo antiguo aki inventá ritonan pa calma nan. Esaki a desaroyá den adoracion di spiritu di antepasado.

¹⁷ Segun creencia sintoista, un alma “cu a sali” ainda tin su personalidad pero ta manchá pa causa di morto. Ora e famia na luto efectuá ritonan di conmemoracion, nan ta purificá e alma te ora eliminá tur malicia, i e alma ta adkerí un caracter pacífico i bondadoso. Cu tempu, e spiritu dje antepasado ta elevá n’e posicion di un dios of protector. Dor cu sintoismo a existí n’e mésun tempu cu budismo, el a incorporá cierto siñansanan budista, incluso e doctrina di paradijs. Asina nos ta ripará cu creencia den inmortalidad ta un elemento básico den sintoismo.

Inmortalidad den Taoismo, Adoracion di Antepasado den Confucianismo

18. Kico taoista ta pensa relacioná cu inmortalidad?

¹⁸ Taoismo a ser fundá dor di Lao-tzu, cu nan ta kere a biba den siglo seis P.E.C. Segun taoismo, e meta den bida ta pa armonisá actividad humano cu Tao, e caminda di naturalesa. E forma di pensa taoista relacioná cu inmortalidad por ser resumí asina aki: Tao ta e principio cu ta regulá universo. Tao no tin ni principio ni fin. Dor di biba di acuerdo cu Tao, un persona ta participá den dje i ta bira eterno.

19-21. Speculacionnan taoista a hiba na ki esfuersonan?

¹⁹ Den nan esfuerso pa ta den union cu naturalesa, taoistanan cu tempu a bira specialmente interesá den e durabilidad di naturalesa i den su poder di restorá su mes. Nan a speculá cu kisas dor di biba na armonia cu Tao, esta e caminda di naturalesa, di algun manera lo bo por penetrá den e secretonan di naturalesa i bira inmuno pa daño físico, enfermedad i asta morto.

²⁰ Taoistanan a cuminsá experimentá cu meditacion, ehercicionan di hala rosea i keda sin come cierto cos, loke supuestamente lo por a tarda decadencia di curpa i morto. Pronto a cuminsá circulá leyendanan tocante inmortalnan cu por a bula riba nubia i aparecé i disparcé ki ora cu nan tabata kier, i cu tabata biba riba cerunan sagrado of islanan remoto pa masha hopi aña mes, sostení dor di serena of frutanan mágico. Historia di China ta informá cu na 219 P.E.C., emperador Ch’in Shih Huang Ti a manda un flota di barcu cu 3.000 mucha homber i muher pa haña e legendario isla di P’eng-lai, e lugá di biba dje inmortalnan, pa nan por trece bek e yerba di inmortalidad. Ta di mas pa bisa cu nan no a regresá cu e elixir.

²¹ E búskeda pa bida eterno a hiba taoistanan na experimentá cu preparacion di píldoranan di inmortalidad mediante alkimia. Desde e punto di bista taoista, bida ta resultá ora combiná e forsanan contrali yin cu yang (forsa femenino i forsa masculino). Pues, alkimistanan tabata imitando e proceso di naturalesa dor di mescla chumbu (color scur, of yin) cu mercurio (color cla, of yang), i nan a pensa cu e producto lo ta un píldora di inmortalidad.

22. Kico tabata e resultado dje influencia budista riba bida religioso chines?

²² Pa siglo shete P.E.C., budismo a infiltrá den e bida religioso chines. E resultado tabata un mescla cu a contené elementonan di budismo, spiritismo i adoracion di antepasado. Segun Profesor Smart: “Tantu budismo como taoismo a duna forma i substancia n’e creencianan tocante un bida despues di morto, cu tabata basta vago den e adoracion di antepasado den China di antigwedad.”

23. Kico tabata Confucio su posicion pa cu adoracion di antepasado?

²³ Confucio, e otro sabio prominente di China di siglo seis P.E.C., kende su filosofia a bira e base pa confucianismo, no a comentá extensamente riba bida despues di morto. Mas bien, el a enfatisá e importancia di bondad moral i comportacion aceptabel desde un punto di bista social. Pero e tabatin un actitud faborabel pa cu adoracion di antepasado i a pone hopi énfasis riba e observacion di rito i ceremonianan relacioná cu e spiritunan di defuntu antepasadonan.

Otro Religionnan Oriental

24. Kico jainismo ta siña tocante alma?

²⁴ Jainismo a ser fundá na India den siglo seis P.E.C. Su fundadó, Mahāvīra, a siña cu tur criatura bibiente tin alma eterno i cu salbacion dje alma for di sclabitud na karma ta posibel solamente mediante abnegacion i disiplina propio extremo i un aplicacion rígido di no-violencia pa cu tur criatura. Te awe jainonan ta pega n’e creencianan aki.

25, 26. Ki creencianan hindú ta ser hañá tambe den e religion sikh?

²⁵ Tambe India ta cuna dje religion sikh, un religion cu 19 miyon hende ta practicá. E religion aki tabatin su comienso den siglo 16, ora Guru Nānak a dicidí di mescla lo mihó di hinduismo i islam i forma un religion uní. E religion di sikh a adoptá e creencianan hindú di inmortalidad di alma, reencarnacion i karma.

²⁶ Ta bisto cu e creencia cu bida ta sigui despues cu e curpa muri ta un parti integral di mayoria religion oriental. Sin embargo, kico di hudaismo, cristiandad i islam?

[Mapa na página 10]

(Pa e teksto den su formato kompleto, wak e publikashon.)

ASIA CENTRAL

KASHMIR

TIBET

CHINA

KOREA

HAPON

Banaras

INDIA

Buddh Gaya

MYANMAR

TAILANDIA

SRI LANKA

CAMBODIA

JAVA

SIGLO 3 P.E.C.

SIGLO 1 P.EC.

SIGLO 1 E.C.

SIGLO 4 E.C.

SIGLO 6 E.C.

SIGLO 7 E.C.

Budismo a influenciá henter Oost Asia

[Plachi na página 9]

Reencarnacion ta e pilar principal di hinduismo

[Plachi na página 11]

Un taoista ta purba bira eterno dor di biba na armonia cu naturalesa

[Plachi na página 12]

Confucio tabatin un actitud faborabel pa cu adoracion di antepasado