Trankil i Balansá

TA NORMAL ku un oradó ta bira nervioso ora e mester bai papia dilanti di un ouditorio, foral si e no ta hasié ku frekuensia. Un publikadó kisas por sintié un tiki nervioso ora e ta yama na e promé kasnan den sirbishi di vèlt pa e dia ei. Ora Yeremías a haña e enkargo pa profetisá, el a bisa: “Mira, mi no sa kon pa papia, pasobra mi ta un mucha.” (Yer. 1:5, 6) Yehova a yuda Yeremías, i lo e yuda abo tambe. Ku tempu bo por siña keda trankil i balansá.

Un oradó ku ta trankil i ku tin su emoshonnan kontrolá ta reflehá esaki na su postura físiko. E ta para na un manera natural i ku ta pas pa e okashon. E no ta move su mannan pa loko i e ta papia di un forma ekspresivo i kontrolá.

Ounke kisas bo ta sinti ku e deskripshon aki di un persona trankil i balansá no ta kuadra ku bo, bo por mehorá. Kon? Laga nos analisá kiko ta pone un oradó bira nervioso i hanshá. Ta posibel ku e kousa ta algu físiko.

Ora bo ta dilanti un tarea difísil i bo kier hasié bon pero bo no sa sigur si bo ta logra, bo ta sinti ansiedat. Komo resultado, bo selebro ta manda señal pa bo kurpa produsí mas adrenalina. E oumento repentino di e hormon aki por pone bo kurason bati mas lihé, kambia bo ritmo di hala rosea, pone bo soda mas, i asta bo mannan, rudianan i stèm por kuminsá tembla. Bo kurpa ta purba adaptá na e situashon dor di produsí mas energia. E problema ta pa dirigí e èkstra energia aki na pensamentu konstruktivo i un presentashon entusiasmá.

Kon pa Redusí Ansiedat. Kòrda ku ta normal pa bira un tiki nervioso. Sin embargo, pa trata ku bo situashon ku dignidat i den un manera trankil i balansá bo mester por redusí e nivel di ansiedat. Kon bo por logra esaki?

Prepará bon. Dediká tempu na prepará bo diskurso. Hasi sigur ku bo ta komprondé bo tema bon. Si ta abo tin ku skohe e puntonan pa trata, tene kuenta ku loke bo ouditorio sa kaba di e asuntu i kiko bo kier logra. Esaki lo yuda bo skohe informashon ku ta mas útil. Si na promé instante bo ta haña ku ta difísil pa hasi esei, papia ku un oradó eksperensiá. E por yuda bo analisá e informashon ku bo ouditorio na mente. Ora bo tin sigur ku bo a skohe puntonan ku lo benefisiá bo ouditorio i bo tin nan bon kla den bo mente, bo deseo pa kompartí nan lo kuminsá surpasá bo ansiedat.

Duna atenshon spesial na bo introdukshon. Sa kon bo ta bai kuminsá. Unabes bo kuminsá papia, probablemente bo nervionan lo kuminsá baha.

Sigui e mesun pasonan básiko aki ora di prepará pa sirbishi di vèlt. No pensa solamente riba e tema ku bo ta bai papia di dje, sino tambe riba e tipo di hendenan ku lo bo topa den e predikashon. Planea bo introdukshon kuidadosamente. Probechá di e eksperensia di publikadónan madurá.

Podisé bo ta pensa ku lo bo ta mas trankil i balansá si bo usa un manuskrito i lesa bo diskurso dilanti di un grupo. Pero en realidat, esaki lo por resultá den mas ansiedat kada bes ku bo duna un diskurso. Ta bèrdat ku algun oradó ta usa notanan ekstenso, miéntras ku otronan ta usa djis un par di punto kòrtiku. Sin embargo, loke lo yuda bo baha bo nervio i konsentrá mas riba e informashon bo dilanti en bes di riba bo mes no ta e palabranan skirbí riba papel, sino e konvikshon den bo kurason ku loke bo a prepará pa bo ouditorio realmente ta bale la pena.

Train bo presentashon na bos haltu. Esei lo duna bo e konfiansa ku bo por ekspresá bo pensamentunan ku palabra. Segun bo ta train, bo memoria ta forma sierto patronchi ku ta bini na bo mente mesora ora bo ta duna bo diskurso. Ora bo ta train, hasié na un manera realístiko. Imaginá ku bo ouditorio t’ei presente. Sinta na un mesa òf para, dependiendo di e parti ku bo ta bai duna.

Pidi Yehova yuda bo. Lo e kontestá bo orashon? “Esaki ta e konfiansa ku nos tin su dilanti, ku si nos pidi kualkier kos konforme su boluntat, e ta tende nos.” (1 Huan 5:14) Si bo deseo ta pa onra Dios i yuda hende benefisiá di su Palabra, anto sigur lo e kontestá bo orashon. E sintimentu di siguridat ei ku Dios lo apoyá bo, lo duna bo e forsa pa kumpli ku bo asignashon. Ademas, segun ku bo ta kultivá e frutanan di spiritu—amor, goso, pas, mansedumbre [òf, suavedat] i dominio propio—lo bo desaroyá e aktitut mental ku ta nesesario pa bo por atendé situashonnan den bida na un manera trankil i balansá.—Gal. 5:22, 23.

Haña mas eksperensia. Mas bo sali den sirbishi di vèlt, ménos nervioso lo bo ta. Mas bo komentá na reunionnan di kongregashon, mas fásil lo ta pa bo papia dilanti otro hende. Kada bes ku bo haña un parti pa duna den kongregashon, e grado di ansiedat ku bo ta sinti promé ku kada parti probablemente lo mengua. Lo bo kier tin mas oportunidat pa papia dilanti un ouditorio? Pone bo mes disponibel komo supstituto den e skol ora ku otro rumannan no por kumpli ku nan asignashon.

Despues ku bo a dal e pasonan deskribí aki riba, lo ta bon pa bo analisá e síntomanan ku ta indiká klaramente ku bo no tin kòntròl riba bo emoshonnan. Si bo logra identifiká e síntomanan i siña kontrolá nan, esaki lo yuda bo papia di un manera kalmu. E síntomanan por ta bisto na bo kurpa òf na bo stèm.

Síntomanan Bisto na Kurpa. Bo postura i e manera ku bo ta move bo mannan ta mustra si bo ta trankil i balansá òf nò. Na promé lugá konsiderá bo mannan. Mannan krusá tras di lomba, òf steif na banda òf ku e stènt di oradó duru tené; hinka i saka man kada ratu for di saku, botoná òf lòs e botonnan di bachi, pasa man na kara, nanishi i brel sin ta na nodi; mannan ku ta hunga ku un oloshi, un pòtlot, un renchi di dede òf ku e notanan; mannan ku ta zuai pa loko òf gestonan ku ta keda na mitar, tur e kosnan aki ta mustra ku bo no ta trankil ni balansá.

Un hende por indiká falta di konfiansa tambe dor di skùif su pianan bai-bin, move su kurpa di un banda pa otro, para muchu steif, òf tur di sak den otro, muha lep henter ora, guli hopi i hala rosea lihé i anshá.

Bo por kontrolá e señalnan aki di nervio dor di hasi un esfuerso konsiente. Traha riba un solo kos alabes. Identifiká e problema, i pensa di antemano kiko bo tin ku hasi pa evit’é. Sigui e konsehonan aki, i bo postura físiko lo duna prueba ku bo ta kontrolá e situashon.

Síntomanan Bisto na Stèm. Un stèm ku ta tembla òf un tono apnormalmente haltu tambe por indiká ku bo ta nervioso. Podisé bo ta raspa garganta hopi òf ta papia muchu lihé. Bo por vense e problema- i manianan aki dor di hasi un esfuerso diligente pa kontrolá bo stèm.

Si bo ta sinti bo nervioso, hala rosea profundo un par di biaha promé ku bo subi riba plataforma i purba relahá henter bo kurpa. En bes di pensa riba kon nervioso bo ta, konsentrá riba pakiko bo kier kompartí ku bo ouditorio loke bo a prepará. Promé ku bo kuminsá papia, tuma un momentu pa wak bo ouditorio, skohe un kara amigabel i smail kuné. Papia slo den bo introdukshon, i despues hinka bo mes kompletamente den bo diskurso.

Kiko Bo Por Spera. No kere ku bo nervio lo disparsé por kompletu. Hopi oradó ku añanan di eksperensia ta sinti nan nervioso promé ku nan subi plataforma. Sin embargo, nan a siña kontrolá nan nervio.

Si bo hasi un esfuerso sinsero pa no mustra di pafó ku bo ta nervioso, bo ouditorio lo mira ku bo ta un oradó trankil i balansá. Kisas ainda abo ta sinti bo nervioso, pero nan lo no ripará mes.

Kòrda ku e èkstra adrenalina ku ta kousa e síntomanan ku ta indiká ku bo ta nervioso, tambe ta duna bo èkstra energia. Us’é pa papia ku entusiasmo.

Bo no tin ku warda te ora bo subi riba plataforma pa pone tur e kosnan aki na práktika. Siña trankilisá i kontrolá bo mes i papia ku e sintimentu apropiá den bo bida diario. Esei lo kontribuí hopi na duna bo konfiansa riba plataforma i, mas importante ainda, den sirbishi di vèlt.