Den Snoa na Názarèt

Sin duda, tabatin un gran entusiasmo ta reina na Názarèt. Un poko mas ku un aña promé, tempu ku Hesus a bandoná Názarèt pa bai batisá serka Huan Boutista, hende na Názarèt tabata konosé Hesus komo karpinté. Pero awor el a bira konosí komo un hòmber ku ta hasi obranan maravioso. E habitantenan di Názarèt tabata ansioso pa mir’é hasi algun di e milagernan akí.

Nan a bira mas ansioso ainda ora ku Hesus, manera tabata su kustumber, a bai snoa. Durante e reunion, nan tabata hasi orashon i lesa for di e bukinan di Moises, manera tabata sosodé “tur sabat den e snoanan.” (Echonan 15:21) Nan tabata lesa tambe for di e bukinan profétiko. Ora Hesus a lanta para pa lesa, probablemente el a rekonosé hopi hende ku e tabata konosé durante e añanan ku e tabata bai e snoa akí. Nan a dun’é e ròl di Isaías. El a haña e pasashi ku ta papia di e Persona ku lo a ser ungí ku spiritu di Yehova; awe nos ta haña e pasashi ei na Isaías 61:1 i 2 (NW).

Loke Hesus a lesa pa e hendenan a mustra ku e Persona akí ku e Skritura a profetisá di dje lo a proklamá na e prezunan ku nan lo a haña libertat i na e siegunan ku nan bista lo a ser restorá. Su lesamentu a mustra tambe ku e Persona ungí akí lo a proklamá e binidero aña di aseptashon di parti di Yehova. Despues, Hesus a duna e sirbidó e ròl i a kai sinta. Tur hende su atenshon tabata riba dje. Anto el a kuminsá papia ku nan, kisas pa basta ratu, i a bisa entre otro: “Awe e skritura akí ku boso a kaba di tende a kumpli.”—Lukas 4:21.

E pueblo a keda asombrá ora nan a tende “e palabranan yen di grasia ku tabata sali for di su boka,” i nan tabata puntra otro: “No ta yu di Hose esaki ta?” Pero Hesus tabata sa ku nan tabata ke mir’é hasi milager manera esnan ku nan a tende di dje. P’esei, el a bisa nan: “Sin duda boso lo apliká e dicho akí na mi: ‘Dòkter, kura bo mes,’ i boso lo bisa: ‘E kosnan ku nos a tende ku a sosodé na Kapernaum, hasi nan aki tambe den bo mes teritorio.’” (Lukas 4:22, 23) Probablemente Hesus su bisiñanan di ántes tabata pensa ku e kurashonnan ku e tabata hasi mester a kuminsá na kas, na benefisio di su mes hendenan. Pues, kisas nan tabata pensa ku Hesus a menospresiá nan.

Komo ku Hesus tabata sa kiko nan tabata pensa, el a menshoná algun suseso ku a yega di tuma lugá na Israel. El a bisa nan ku maske den tempu di Elías tabatin hopi biuda den Israel, Dios no a manda Elías serka niun di nan. Elías mester a bai serka un biuda kende no tabata un israelita i ku tabata biba na Sarepta, un stat serka di Sidon. Einan, Elías a hasi un milager ku a salba bida di hende. (1 Reinan 17:8-16) Ademas, den tempu di Eliseo tabatin hopi leproso den Israel, ma e úniko leproso ku e profeta a kura tabata Naman di Siria.—2 Reinan 5:1, 8-14.

E komparashonnan ei a laga e hendenan kaminda Hesus a lanta komprondé ku nan tabata egoista i ku nan tabata falta fe. Kon nan a reakshoná ora nan a tende e komparashonnan ei ku segun nan tabata inhustu? Esnan ku tabata den snoa a rabia mashá; nan a lanta i a saka Hesus for di e stat. Nan a hib’é riba kabes di e seru riba kua Názarèt tabata situá i a purba di bent’é abou. Pero Hesus a logra sali for di nan gara i a skapa. Djei, el a kue rumbo pa Kapernaum, ku tabata keda na kosta nortwèst di Laman di Galilea.