PREGUNTA 5

Kiko Mi Tin Ku Hasi Si Nan Ta Pèst Mi na Skol?

DIKON TA BON PA BO SA?

E manera ku bo ta reakshoná por drecha e situashon òf hasié pió.

**KIKO ABO LO HASI?**

Imaginá bo e siguiente esena: Thomas no ke bai skol awe, ni mañan. E no ke bai skol mes mas. Tur kos a kuminsá tres luna pasá ora ku algun mucha di su skol a plama rumor falsu tokante dje. Despues nan tabata dun’é yen di nòmber. Tin biaha nan ta dal su bukinan fo’i su man benta abou i hasi manera nan no por yuda. Òf un hende den e grupo su tras ta push’é i ora ku Thomas bira wak, e no sa ta ken a push’é. Ayera, e pèstmentu a bira pió ora ku Thomas a haña un menasa online . . .

Si ta abo ta Thomas, kiko lo bo hasi?

PARA KETU I PENSA!

Bo por hasi algu! De echo, bo por defendé bo kurpa sin usa moketa. Kon?

NO REAKSHONÁ. Beibel ta bisa: “Un hende bobo no por dominá su sintimentunan, ma un hende sabí ta keda kalmu i ta wanta nan aden.” (Proverbionan 29:11, NW) Si bo keda mas trankil posibel, maske ta di pafó, nan ta pèrdè smak di sigui pèst bo.
NO PAGA MALU KU MALU. Beibel ta bisa: “No paga malu ku malu.” (Romanonan 12:17) Si bo tuma vengansa, ta pió so e situashon por bira.
NO KANA DAL DEN PROBLEMA. Beibel ta bisa: “Un hende prudente ta mira maldat i ta skonde.” (Proverbionan 22:3) Te asina leu ku ta posibel, evitá hende ku por kousa problema i evitá situashonnan den kua nan por pèst bo.
PURBA DI BISA ALGU KU NAN NO TA FERWAGT. Beibel ta bisa: “Un kontesta suave ta kita rabia.” (Proverbionan 15:1) Bo por te asta purba di hasi un wega. Por ehèmpel, si un hende ta tenta bo pasobra bo ta gordo, bo por hisa bo skouder i bisa: “Porta mi por pèrdè un par di kilo bèrdat!”
KANA BAI. Nora, di 19 aña, ta bisa: “Ora bo keda ketu, bo ta mustra ku bo ta un persona maduro i ku bo ta mas fuerte ku e persona ku ta pèst bo. E ta mustra ku bo tin dominio propio, algu ku e persona ku ta pèst bo no tin.”—2 Timoteo 2:24.
BIRA MAS SIGUR DI BO MES. Personanan ku ta pèst otro hopi biaha ta ripará ken ta esnan ku tin pensamentu negativo di nan mes i ku kasi sigur lo no defendé nan mes. Di otro banda, si bo mustra e personanan ku ta pèst bo ku nan no ta logra nada ku bo, hopi di nan lo stòp di molestiá bo.
BISA UN HENDE. Un èks-maestro di skol ta bisa: “Mi ke animá tur mucha pa no keda ketu ora otronan ta pèst nan. E mihó kos ku bo por hasi ta di bisa un hende, i esei por prevení ku nan ta pèst otro mucha.”

Un mucha hòmber ta para ku hopi konfiansa kontra un otro ku ta pèst e — Si bo ta sigur di bo mes, esei lo duna bo un tipo di forsa ku esun ku ta pèst bo no tin

**KIKO BO SA DI PÈSTMENTU?**
KOREKTO ÒF INKOREKTO	E KONTESTANAN
1 Semper pèstmentu a eksistí.	1 Korekto. Por ehèmpel, Beibel ta papia di un grupo di gigante ku yama nèfilim. E nòmber ei ta nifiká “tumbadónan,” esta, “esnan ku ta pone otronan kai.”—Génesis 6:4.
2 No tin nada malu den pèstmentu. Ta kos masha normal.	2 Inkorekto. Pèstmentu ta un di e motibunan ku a pone hopi hóben kometé suisidio.
3 E mihó manera pa stòp un hende di pèst bo ta di pèst e bèk.	3 Inkorekto. Hopi biaha e mucha ku ta pèst un otro tin mas forsa ku su víktima; pues, no ta bale la pena pa purba di tuma vengansa.
4 Si bo mira un mucha ta pèst un otro, ta mihó bo hasi manera bo no a mira nada.	4 Inkorekto. Si bo ta testigu di pèstmentu i bo no bisa nada, bo no ta inosente. Lo bo por te asta bira parti di e problema en bes di e solushon.
5 En realidat, e mucha ku ta gusta pèst otro ta hopi insigur di su mes.	5 Korekto. Aunke sierto mucha ku ta gusta pèst otro kier sa ku nan ta masha kos, hopi di nan ta insigur di nan mes i ta rebahá otro hende pa nan por sinti nan mes mas mihó.
6 Un mucha ku ta gusta pèst otro por kambia.	6 Korekto. Ku yudansa di otro hende, un mucha ku ta gusta pèst por kambia su manera di pensa i aktua.