MI A HAYA UN TESORO DI BALOR SOBRESALIENTE

SEGUN CU FLORENCE WIDDOWSON A CONTÉ

Ora anochi a yega, nos a decidi di establece nos campamento cerca un lagún. Esei no tabata un lugar ideal pa campamento pa dos hende muher, pero nos a pensa cu tabata bon pa un anochi so. Durante cu mi tabata ocupá cu spanmento di tent, Marjorie tabata prepara cena.

MI A caba di manda e último staca dje tent den e tera ora mi a mira algo move cerca e troncón pretu di un palu. Mi a yama Marjorie i a puntré: “Bo a mira e troncón ei move?”

El a contestá cu “No”, un poco confundí.

Mi a grita: “Wel, el a move siguramente. Dunámi e ketel!”

Mi a hibé hunto cu e hacha riba mi scouder i a bai den direccion dje lagún. Ora mi tabata casi pareo cu e palu, un homber a sali di tras di dje!

Mi tabata gago pero mi a logra puntra: “Awa di lagún ta bon pa bebe?”

El a contestá bruto: “No, e no ta bon, pero si bo kier awa pa bebe, lo mi trece un poco pa boso.”

Mi a nenga su oferta lihé, i pa mi gran alivio, el a bira lihé i a bai. Temblando, mi a bolbe purá i a bisa Marjorie loke a pasa. Nos a baha e tent lihé, a paketa, i a bai. Despues, nan a bísanos cu e homber a caba di sali for di prisón.

Aunque buscador di oro a establece nan campamento ei hopi bez cerca di mina di oro den Australia ayá na 1937, nos tabata otro sorto di minero. Nos tabata busca hende cu Dios ta considera precioso.

E pasado di mi famía

Cien aña pasá, mi tata tabata un smid den un pueblo chikito den Porepunkah den estado di Victoria. Mi a nace ei na aña 1895, i mi a lanta cu cuater ruman homber mayor cu mi cerca rio Ovens, na pia di Monte Bufalo. Mi mayornan a bai misa regularmente dje religion yamá Union Church, i mi a bai zondagscol, unda mi tata tabata superintendente.

Na 1909, mi mama tabatin un atake di curazón durante un tempestad violento i a muri den braza di mi tata. Anto, cerca e principio di 1914, un ruman homber di mi a bandona nos cas, i un poco ora despues nan a debolbele na nos—morto. El a comete suicidio. Nos desconsuelo a empeora debí ne siñanza di nos religion di cu fiernu a speré, siendo cu nan a bisa cu suicidio ta un picá impordonabel.

Despues durante 1914 Gera Mundial I a cuminza, i dos ruman di mi a drenta den e sirbishi militar den stranhería. E noticia spantoso di dramamento di sanger i sufrimento a conmove seis jufrow incluyendo ami, hunto cu mi tata, pa cuminza un estudio dje buki bíblico di Juan.

Descubriendo berdadero tesoro

Ellen Hudson tabatin e buki na inglés E tempo ta cerca, di Charles Taze Russell. Su entusiasmo tocante dje a influenciá e otronan dje grupo. Ora el a ripara cu e buki tabata solamente uno di un serie di seis volumen titulá na inglés Estudio dje Scritura, el a manda un carta pe Asociacion Internacional di Studiante di Bijbel den Melbourne i a pidi otro buki dje serie. Nos grupo a conbini pa usa e promé volumen, titulá na inglés E plan divino dje siglonan, den nos estudio simanal.

Imaginábo e gozo di mi tata i di mi pa descubri cu no ta existi fiernu di candela. E miedu di cu mi ruman tabata kimando den e candela di fiernu a wordu kitá. Nos a siña e berdad di cu hende morto ta inconsiente, mescos cu na soño, i no ta na bida un camina sufriendo den tormento. (Eclesiastés 9:5, 10; Juan 11:11-14) Algun hende den e grupo di nos estudio bíblico a decidi di bai cerca nos beciña pa predica e berdad cu nos tabata siña. Nos a bai na pia na cas cerca nos, pero nos a usa bicicleta i kitrín cu un cabai pa yega cas di hende di campo.

Mi tabatin mi promé experencia den e dunamento di testimonio di cas pa cas e dia di celebra e fin di Gera Mundial I, 11 di November di 1918. Tres hende di nos grupo di studiante a bai 80 km ne pueblo di Wangaratta pa parti e tratado Peoples Pulpit. Hopi aña despues, durante un asignacion pa predicá den un territorio den interior, mi tabatin e experencia mencioná caba.

Na 1919, mi a asisti ne asamblea di Studiante di Bijbel den Melbourne. Dia 22 di April di 1919, mi a simboliza mi dedicacion na Jehova Dios ei cu bautismo bao di awa. E banquete spiritual a haci mas profundo mi aprecio dje tesoro spiritual dje Reino di cielo i dje organizacion terrenal di Jehova Dios.—Mateo 13:44.

Mi no a bai cas despues dje asamblea sino a acepta un invitacion pa participa cu Jane Nicholson, un predicador di tempo completo, pa un luna di dunamento di testimonio. Nos asignacion tabata comunidad di cunuquero i baquero cant’i rio King. Un poco aña pasá, tal tera montañoso tabata e localidad pe película The Man From Snowy River.

Na 1921 nos a recibi e buki excelente pa estudio bíblico titulá na ingles E arpa di Dios. Ora papa a cuminza usé como e buki di estudio pe klas di zondagscol, hopi mayornan tabata contra i a pidié retira. El a retira un bez. Despues, nos a recibi e foyeto na inglés titulá Fiernu, cu pregunta interesante riba e capa, “Kico e tá? Ken ta den dje? Nan por sali?” Papa a keda asina emocioná cu e prueba bíblico claro presentá riba e asunto cu el a cuminza un bez pa parti e foyeto di cas pa cas. El a parti cientos di nan den nos pueblo i den campo cerca nos.

Biahe di predicacion hunto cu mi tata

Cu tempo, papa a cumpra un auto pa nos alcanza hende den otro territorio cu e mensahe di Reino. Como smid, e tabata mas costumá cu cabai, p’sei mi a bira shofer di auto. Na principio, nos a pasa anochi den hotel. Pronto, esei a resulta di ser mucho costoso, i nos a cuminza establece campamento den aire liber.

Mi tata a prepara e asiento dilanti dje auto pe baha plat i mi por a drumi den e auto. Nos a lanta un tent chikito pa papa drumi den dje. Despues di tal campamento pa varios siman, nos a bolbe na Porepunkah, unda papa a habri su lugar di trabao como smid atrobé. Nos semper a straña cu tabatin un clientela cu a paga pe trabao pa tapa nos gasto pa nos sigiente biahe di predicacion.

Hopi hende cu bon disposicion a responde favorablemente na nos bishita i despues a acepta estudio bíblico di cas. Awor tin siete congregacion cu nan mes Salón di Reino den e territorio cu nos grupo chikito di Porepunkah a bishita promé. Realmente, ken por despreciá e “dia di cosnan chikito”?—Zacarías 4:10.

Na 1931 papa cu mi a corre casi 300 km riba camina horrible pa asisti na un reunion special, unda nos a adopta nos nomber nobo di “Testigo di Jehova.” Nos dos a keda mashá feliz tocante e nomber bíblico único. (Isaías 43:10-12) El a identificános hopi mas claramente cu e nomber menos distintivo di “Studiante di Bijbel Internacional,” locual nan a yámanos te ne tempo ei.

Un dia ora mi tabata duna testimonio den e pueblo di Bethanga, mi a contra cu e pastor dje iglesia anglicano local. El a bira mashá rabiá i a cuminza investiga unda nos a laga buki, exigiendo pe pueblo entrega nan buki na dje. Despues el a conduci un kimamento público di buki den plaza dje pueblo. Pero, su acto despreciable a duna mal resultado.

Despues cu mi a informa e sucursal dje Sociedad di loke a pasa, nan a druk un carta público cu a condena loke e pastor a haci. Además, nan a haci arreglo pa autonan yen di Testigo di Jehova parti e carta den tur e districto. Ora papa i mi a rebishitá e pueblo despues, nos a laga mas buki cu nunca. E pueblo tabata curioso tocante loke e literatura “prohibí” a contene!

E promé persona pa acepta e berdad bíblico den nortoost di Victoria como resultado di nos predicamento tabata Milton Gibb. Despues di nos bishita el a studia cabalmente tur publicacion dje Sociedad cu nos a laga cuné. Na un rebishita cu nos a haci, el a sorprendénos, bisando: “Awor mi ta un disípel di boso.”

Aunque nos a gusta su decision, mi a splica: “No, Milton. Bo no por ta disípel di mi.”

“Wel, anto, mi ta un disípel di Rutherford [e presidente dje Sociedad Watch Tower].”

Mi a bisé atrobé: “No, bo no ta un disípel di Rutherford tampoco, pero mi ta spera cu bo ta un disípel di Cristo.”

Milton Gibb a resulta di ser uno so di hopi tesoro precioso cu mi a dedica tanto aña pa busca. E i su dos yiu homber ta anciano cristian, i otro miembro di su famía ta activo den e congregacion.

Enfrentando varios prueba

Apesar dje prohibicion dje trabao di Testigo di Jehova den Australia den Januari di 1941, nos a sigi predica, usando e Bijbel so. Anto mi sirbishi di pionero, of ministerio di tempo completo, tabata interrumpí ora nan a yamámi pa bai cas pa cuida mi tata cu tabata seriamente malu. Despues, ami també a bira malu i tabatin mester di un operacion serio. Tempo a pasa pa mi recobra mi salud, pero mi a experimenta e berdad dje promesa di Dios: “Di ningun manera lo mi bandonábo ni di ningun manera desamparábo.” (Hebreo 13:5) Un ruman cristian a dunámi siguranza, bisando: “Corda, Flo, bo nunca ta so. I abo i Jehova Dios semper ta compone un mayoría.”

Anto a yega e enfermedad final di mi estimado tata di 13 siman. Dia 26 di Juli di 1946, el a cera su wowo den morto. El a disfruta di un bida completo, i su speranza tabata celestial. (Filipense 3:14) Pues, ne edad di 51, mi tabata so, pasando e mayor parti di mi añanan di antes cu papa. Anto mi a topa cu mi esposo di futuro. Nos a casa na 1947 i a cuminza traha como pionero hunto. Pero, tal tempo feliz no a dura hopi, pasobra el a haya un atake na 1953 i a bira inválido.

Esei a afecta e abla di mi casá mashá, i tabata casi imposibel pa conbersa cuné. Esei tabata e parti di mas dificultoso di cuidamento di dje. E esfuerzo mental di purba di comprende loke el a lucha pa bisa tabata mashá grandi mes. Aunque nos tabata biba den un lugar isolá unda no tabatin un congregacion cerca, Jehova Dios no a bandonános durante e añanan di prueba. Mi a keda den paso cu e informacion di mas reciente dje organizacion, i també cu un suministro continuo di alimento spiritual di revista Watchtower i Awake! Dia 29 di December di 1957, mi estimado esposo a muri.

Sirbishi den Adelaide

Una bez mas mi tabata so. Kico mi mester haci? Nan lo aceptámi di nobo como un predicador di tempo completo despues di un pausa di casi cinco aña? Nan a aceptámi, p’sei mi a bende mi cas i a haci un comienzo nobo den e trabao di pionero den Adelaide, e stad capital di Suraustralia. Tabatin un necesidad pa pionero ei na tal tempo, i mi tabata asigná ne congregacion di Prospect.

Siendo cu mi tabata nervioso corriendo auto den tráfico dje stad, mi a bende mi auto i a cuminza usa bicicleta atrobé. Mi a usé te cu mi tabatin 86 aña di edad, birando conocí como e “señora chikito riba e bicicleta blau.” Cu tempo mi a bira cada bez mas nervioso den tráfico i a parce cu e wiel dilanti a tembla tur ora. Loke a hacími bandona e bicicleta finalmente a sosode un atardi ora mi a cai den trankera. Mi a bisa den mi mes: ‘Nunca mas,’ p’sei mi a bolbe usa mi pia pa camna atrobé.

Un poco aña pasá, ora mi a asisti na un asamblea di districto, mi pia a cuminza faya, i despues mi tabatin dos operacion riba djoint di mi heup. Mi a sigi bon despues dje operacion te cu un cachó grandi a tumbámi. Esei a haci mas tratamento necesario, i desde e tempo ei mi mester usa walker pa yudámi camna. Mi mente ta basta activo ainda. Ta manera un amiga a bisa: “ta parce cu bo curpa bieu no por keda den paso cu bo mente hoven.”

Através dje añanan, mi a mira e congregacionan den Adelaide crece, expande, i partí. Anto, na 1983, ora mi tabatin 88 aña di edad, mi a bandona Adelaide pa biba cu un famía den Kyabram den estado di Victoria, unda mi a pasa diez aña feliz. Ainda mi ta logra sali den e sirbishi di feld; i amiganan den e congregacion ta hibámi den auto pa bishita esnan cu ta obtene revista foi mi regularmente. Tal hende ta sali bondadosamente ne auto pa mi por papia cu nan.

Reflexionando riba e mas cu 98 aña di mi bida, mi ta corda cu gusto esnan leal i fiel cu a alaba Jehova Dios cu mi, specialmente mi maraviyoso tata. Ta parce cu mi a biba mas tempo cu tur esnan fiel cu tabata compañé di mi den e sirbishi di pionero. Pero, ki gozo ta sperámi ora mi ta reuní di nobo cu esnan cu tin e mesun speranza dje premio di bida den e Reino celestial di Dios, berdaderamente un tesoro di balor sobresaliente!

Mi a bautiza dia 22 di April di 1919

Feliz pa ser den e sirbishi di Jehova Dios ainda awor cu mi ta alcanza 100 aña di edad