Desigualdad Tabata Dios Su Intencion?

Den un solo palabra, e contesta ta no. Ban wak di con.

DIOS su intencion tabata pa tur ser humano tin e mésun chens pa disfrutá di bida i felicidad. Tocante creacion di hende, nos ta lesa: “Anto Dios a bisa: ‘Laga nos traha hende den nos imágen, segun nos semehansa, i laga nan someté e piscánan di laman i e criaturanan buladó di shelu i e bestianan doméstico i henter e tera i tur bestia movedó cu ta move riba tera.’” Ora e creacion terenal tabata cla, “Dios a mira tur cos cu el a traha i, mira! e tabata hopi bon.”—Génesis 1:26, 31.

Dios lo por declará cu e situacion actual di desigualdad ta “hopi bon”? Difícilmente, pasobra “Dios ta amor.” (1 Juan 4:8) Bijbel ta bisa cu e “no ta trata ningun persona cu parcialidad” i cu “perfecto ta su actividad, pasobra tur su camindanan ta husticia. Un Dios di fieldad, cu ken no tin inhusticia; hustu i recto e ta.” (Deuteronomio 10:17; 32:4; compará cu Job 34:19.) I apostel Pedro a concluí: “Siguramente mi ta percibí cu Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.”—Echonan 10:34, 35.

Ya cu Dios ta amoroso, imparcial, recto i hustu, con e por a crea hende cu desigualdad inherente pa loke ta nan derecho di disfrutá di felicidad? Permití discriminacion entre hende i pone nan biba den un sistema di desigualdad lo ta directamente contrali cu su personalidad. Su intencion tabata pa tur “nace liber i igual den dignidad i derecho.” Tog, ta bisto cu no ta asina cosnan ta awendia. Di con no?

E Rais di Desigualdad

E echo cu Dios a crea hende pa ta igual, no ta nificá cu su intencion tabata pa nan ta mescos den tur aspecto. Nan por a varia den talento, interes i personalidad. Ademas nan por a varia den posicion of den grado di autoridad. Por ehempel, hende homber i hende muher no ta igual den tur aspecto. Mas bien, Dios a crea e muher “como un complemento” di e homber. (Génesis 2:18) Ta bisto cu mayor i yu no tin e mésun autoridad. Pero apesar dje diferencianan aki, tur hende—homber, muher i mucha—mester a disfrutá dje mésun oportunidad pa satisfacé e rekisitonan básico pa felicidad. Esei ta un derecho cu Dios a duna nan. Tur lo mester a disfrutá dje mésun dignidad i posicion den bista di Dios.

Den e mésun manera, Dios su yunan spiritual, creá promé cu hende, a ricibí diferente asignacion i responsabilidadnan. (Génesis 3:24; 16:7-11; Isaías 6:6; Hudas 9) Tog, nan tur por a disfrutá di Dios su percuracionnan pa bida i felicidad den e mésun grado, den e límite di loke nan a ricibí. Asina, nan a reflehá Dios su imparcialidad den un manera maraviyoso.

Lamentablemente, un criatura spiritual no tabata contentu cu Dios su areglo imparcial. E tabata kier mas cu loke Dios a dun’é. E tabata anhelá pa haña un puesto mas haltu, mas elevá. Dor cu el a cultivá e deseo robes aki, el a posicioná su mes contra Jehova, cu apropiadamente como Creador, tin e posicion di supremacia total. Despues e yu spiritual rebelde aki di Dios a pone hende exigí Dios mas cu loke El a duna nan. (Génesis 3:1-6; compará cu Isaías 14:12-14.) Asina Jehova su percuracion pa hende disfrutá di bida i felicidad a parce di sali fo’i balansa. E spiritu rebelde aki, cu Revelacion 20:2 ta identificá como “Diabel i Satanas,” a bira e instigadó malbado di desigualdad humano.

Cos Lo Cambia un Dia?

Den un solo palabra, e contesta ta sí!

Pero, ken por trece e cambionan deseá? Lidernan humano a lucha siglonan largu pa logr’é, i sin duda algun di nan a lucha cu tur sinceridad. Nan éxito tabata limitá, i esei ta pone hopi hende yega n’e conclusion di cu no ta realístico pa spera cu e problema di desigualdad humano lo solucioná un dia. Sin embargo, Dios su punto di bista ta pará skirbí na Isaías 55:10 i 11: “Mescos cu yobida fuerte i tambe sneu, ta baha for di shelu, i no ta bolbe na tal lugá a ménos cu realmente e saturá e tera i hacié producí i spruit, i realmente e duna simia n’e sembradó i pan na e comedó, asina mi palabra cu ta sali for di mi boca lo resultá di ta. Lo e no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur den loke mi a mand’é.”

Ta un gran consuelo pa sa cu Jehova Dios a duna di conocé cu lo e cumpli cu su propósito original di percurá oportunidadnan igual pa tur ser humano biba i ser felis! Como Dios di e berdad, el a comprometé su mes pa cumpli cu loke el a primintí. Ta bon cu e tin tantu e boluntad como e poder pa hacié. Con lo e logra esaki?

E contesta ta den e Reino cu Jesucristo a siña tur su siguidónan pidi p’e den oracion: “Nos Tata cu ta den shelu, . . . Laga bo reino bini. Laga bo boluntad sosodé, mescos cu den shelu, tambe riba tera.” (Mateo 6:9, 10) Sí, e Reino di Dios ta e medio cu Jehova lo usa pa “aplastá i pone un fin na tur e reinonan aki [cu ta existí awor], i e mes lo permanecé te na tempu indefiní.”—Daniel 2:44.

Bou di gobiernu dje Reino celestial, un sociedad humano nobo lo lanta. Tocante esaki, apostel Juan a skirbi den e último buki di Bijbel, Revelacion: “Mi a mira un shelu nobo i un tera nobo; pasobra e shelu anterior i e tera anterior a pasa bai.” (Revelacion 21:1) Tur e caranan mahos di desigualdad lo a disparcé, esta, pobresa, enfermedad, ignorancia, discriminacion i otro miserianan cu hende ta pasa aden.a

Pa mas cu un siglo caba, Testigonan di Jehova ta dirigí atencion di hende na e Reino ei. (Mateo 24:14) Nan ta usa página imprimí i ta duna asistencia personal den nan esfuerso pa yuda hende conocé Dios su propósito skirbí den Bijbel. Pero, nan obra educacional mundial no ta duna hende solamente e speransa di biba den igualdad i felicidad den futuro. For di awor e ta duna bon resultado den frena e plaga di desigualdad. Laga nos mira con.

[Nota]

[Komentario na página 5]

Dios su intencion tabata pa tur ser humano tin e mésun chens pa biba i ser felis