E Plaga Actual di Desigualdad

“Nos ta considerá cu e berdadnan aki ta papia pa nan mes, cu tur hende a ser creá igual, cu nan a ricibí cierto Derechonan innegabel cerca nan Creador, cu entre e derechonan aki ta figurá Bida, Libertad i búskeda di Felicidad.”—Declaracion di Independencia, adoptá dor di Merca na 1776.

“Tur hende ta nace liber i cu derechonan igual.”—Declaracion di Derechonan di Hende i di Ciudadano, adoptá dor di Asamblea Nacional di Francia na 1789.

“Tur ser humano ta nace liber i igual den dignidad i derecho.”—Declaracion Universal di Derechonan Humano, adoptá dor di Asamblea General di Nacionnan Uní na 1948.

NO TIN duda. E deseo pa igualdad ta universal entre sernan humano. Pero lamentablemente, e simpel echo cu mester a ripití e idea di igualdad di hende cu asina tantu frecuencia, ta mustra cu te awor humanidad no a logra alcansá igualdad.

Tin un hende cu por bisa francamente cu awe, na fin di siglo 20, cos a drecha? Nos por bisa cu tur e ciudadanonan di Merca, Francia, of di cualkier un dje 185 miembronan di Nacionnan Uní, ta gosa dje derechonan igual cu supuestamente nan a nace cuné?

Maske e idea di igualdad entre tur hende por ta ‘papia pa su mes,’ e derecho riba “Bida, Libertad i búskeda di Felicidad” ta leu di ta igual pa tur hende. Por ehempel, di ki igualdad di derecho riba bida nos por papia si un mucha na Africa mester compartí un dokter cu 2.569 otro hende, miéntras cu un mucha na Europa mester compartí esun di dje cu 289 hende so? Anto, ki igualdad di derecho riba libertad i pa busca felicidad tin, si como un di cada tres mucha homber i dos di cada tres mucha muher na India lo crece sin por lesa ni skirbi, miéntras cu na lugánan manera Hapon, Alemania i Gran Bretania, prácticamente tur mucha tin educacion garantisá?

Hendenan na Centroamérica cu tin un entrada anual di 2.480 florin pa cabes ta gosa dje mésun “dignidad i derecho” den bida cu esnan na Francia, caminda e entrada anual pa cabes ta 44.980 florin? Ki igualdad tin entre e baby mucha muher africano cu ta nace cu un expectativa pa biba 56 aña, i e baby mucha muher mericano, cu tin un expectativa pa biba 79 aña?

Desigualdad tin hopi diferente cara, i tur ta mahos. Desigualdad den nivel di bida i den oportunidad di haña cuido médico i educacion ta djis un par di nan. Algun diferencia político, racial of religioso ta e clave decisivo cu ta stroba algun hende di haña nan dignidad of nan libertad. Apesar di tur e papiamentu tocante igualdad, ta den un mundu di desigualdad nos ta biba. Manera un plaga, esta, “un causa di afliccion hopi plamá, of hopi grandi,” desigualdad ta alcansá tur nivel di sociedad humano. E dolor cu e ta causa den forma di pobresa, enfermedad, ignorancia, desempleo i discriminacion ta un dolor intenso.

“Tur hende a ser creá igual.” Esta un bunita pensamentu! Pero, ta un tristesa cu realidad ta net lo contrario!

[Rekonosementu pa Potrèt na página 3]

UN PHOTO 152113/SHELLEY ROTNER