Ta Frena e Plaga di Desigualdad

Pronto e Creador lo trece e igualdad cu hende ta anhelá. Entre tantu, tin pasonan cu nos por tuma pa por lo ménos frena e plaga di desigualdad cu ta afectá nos i nos famianan. Manera Nelson Mandela, ex-presidente di Sur Africa a yega di observá, “ta loke nos ta haci cu loke nos tin, ta distinguí un persona for di otro, i no loke nos a ricibí.”

HISTORIA ta confirmá su palabranan. Dor cu nan a usa loke nan tabatin, hopi homber i muher cu no a nace cu masha cos, a logra éxitonan cu a distinguí nan for di nan pareunan cu tal bes tabatin mas cu nan. Di otro banda, tin otro hende cu a nace cu tur tipo di bentaha, i a malgastá loke nan tabatin, sin logra alcansá nan pleno potencial.

Probechá di Loke Bo Tin!

Testigonan di Jehova tin un interes profundo pa yuda hende conocé Dios su propósitonan mediante studio di Bijbel. Pero nan ta conciente sí, cu pa hende beneficiá mas tantu posibel dje informacion cu Bijbel ta duna, nan mester por lesa. Pa tal motibu Testigonan di Jehova a siña decenas di miles di hende lesa i skirbi, entre nan 23.000 hende (te meimei di década ’90) den un pais so na West Africa. Papiando dje servicio social remarcabel cu Testigonan di Jehova ta efectuá, e korant San Francisco Examiner a bisa: “Por considerá nan ciudadanonan ehemplar. Nan ta paga nan belastingnan manera mester ta, nan ta cuida hende malu i ta lucha contra analfabetismo.”

Ademas di esei, pa medio di un curso progresivo di papia den público, Testigonan di Jehova a entrená cientos di miles di hende pa bira oradornan cualificá, capas pa expresá nan mes cu fluides den público. Entre tur e milnan aki tin algun cu tabatin problema serio pa papia. Tuma por ehempel e homber aki di Sur Africa, cu a skirbi: “Mi tabata asina gagu cu mi a bira un hende cerá. Mayoria bes mi tabata spera pa otro hende papia pa mi. . . . Ora mi a drenta e Scol di Ministerio Teocrático i mi mester a duna un lesamentu di Bijbel dilanti un audiencia chikitu . . . , mi a bira asina gagu cu mi no por a caba e parti den e tempu asigná. Despues dje reunion e [consehero] a duna mi conseho práctico na moda bondadoso. El a sugerí pa mi practicá lesa na bos haltu pa mi mes. Asina mi a haci. Mi tabata dedicá tempu, dia aden dia afó, na lesa for di mi Bijbel i for di e revista Toren di Vigilancia na bos haltu.” E homber aki a progresá asina tantu cu awor e ta duna discurso público dilanti auditorionan di cientos i asta miles di hende.

Gosa di Igualdad Entre Rumannan

Pa loke ta educacion, cuido médico i posicion socioeconómico, tin un gran variedad di circunstancia entre Testigonan di Jehova. Tal diferencianan no ta nada otro cu un refleho di e condicionnan mundial imperfecto cu nan ta biba aden. Pero compará cu otro gruponan religioso, nan a eliminá prehuicionan racial, social i económico casi completamente for di den nan.

Nan a logra esaki dor di haci tur nan esfuerso pa practicá loke nan a siña for di Bijbel. Cu tur nan curason nan ta adoptá principionan manera: “No dje manera cu hende ta mira ta e manera cu Dios ta mira, pasobra e simpel hende ta mira loke ta parce na bista; pero en cuanto Jehova, e ta mira loke e curason ta.” (1 Samuel 16:7) “Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) “No paga malu cu malu na ningun hende. Percurá cosnan excelente den bista di tur hende. Si ta posibel, cuantu cu ta dependé di boso, sea pacífico cu tur hende.”—Romanonan 12:17, 18; mira tambe 1 Timoteo 6:17-19; Santiago 2:5, 9.

Dor di pega firmemente na e principionan bíblico aki cu ta promové unidad, Testigonan di Jehova ta nenga di tolerá cualkier desigualdad basá riba diferencianan racial, social of económico den nan seno. E factornan aki no ta hunga ningun rol, por ehempel, den dicidí ken ta ricibí privilegionan di sirbishi den e congregacion cristian. Puestonan di responsabilidad, manera pa siña i supervisá, ta ser otorgá solamente a base di cualificacionnan spiritual.—1 Timoteo 3:1-13; Tito 1:5-9.

Esta refrescante ta pa hende cu a sufri bou dje desigualdad di un mundu yen di prehuicio, topa hende cu ta trata nan manera ruman cu un posicion igual dilanti nan Creador! Martina por confirmá esaki. Despues cu su tata a bai laga e famia, el a crece den un famia pober di un solo mayor. Hopi bes hende a trat’é como un persona rechasá dor di sociedad. E tabatin poco confiansa den su mes, i tabatin dificultad pa bai bon cu otro hende. El a desaroyá un actitud di no tin cunes cu nada. Pero, cos a cambia despues cu el a cuminsá studia Bijbel anto a bira un Testigo di Jehova. E ta bisa: “Ainda mi mester lucha contra pensamentunan negativo, pero awor mi ta mas capas pa trata cu e problema ei. Mi respet propio a mehorá, i mi ta papia cu mas confiansa. E berdad a duna mi un sentido di responsabilidad. Awor mi sa cu Jehova ta stima mi i cu bida ta bale la pena.”

Como un grupo internacional di cristian, den 230 pais Testigonan di Jehova ta gosa di un grado di igualdad cu ta berdaderamente único den e mundu djawe. Otro organisacionnan religioso por declará mescos, anto apoyá esei cu echo?

Naturalmente, Testigonan di Jehova ta realístico. Nan ta admití mesora cu como producto di un ambiente imperfecto, nan no ta mas capas pa haci desigualdad humano disparcé, cu tur e otro hendenan cu a purba (i faya) durante siglonan. No obstante, nan ta contentu cu den nan propio seno, nan a logra frena e plaga mortal aki basta. I cu fe fuerte den Dios su promesa, nan ta spera un mundu nobo di husticia caminda desigualdad lo ta un cos di pasado, pa semper.

Sí, pronto tur hende obediente lo recobrá e igualdad den “dignidad i derecho” cu nan Creador tabata kier pa nan disfrutá di dje originalmente. Esta un bunita pensamentu! I e biaha aki sí lo e bira realidad!

[Plachi na página 7]

Testigonan di Jehova ta bringa analfabetismo dor di siña decenas di miles di hende lesa i skirbi

[Plachi na página 8]

Berdadnan bíblico ta yuda eliminá prehuicio racial, social i económico