Trahando Nos Teritorio Ku Tin Vários Idioma
1 Awendia, no ta straño pa topa hende di vários grupo di idioma ku a integrá den e teritorionan di islanan ABC. Hopi bes nos ta topa hende ku ta papia i komprendé hulandes, ingles òf spañó mihó ku e idioma papiamentu usá den nos kongregashonnan. E barera di idioma aki por stroba algun hende di benefisiá plenamente di e mensahe di Reino. Kiko por yuda nos yega na e hendenan aki ku e bon nobo na un manera mas efikas?
2 Sosiedat a perkurá pa tur kongregashon na islanan ABC haña e formularionan S-43-PA, Por Fabor Atendé, (òf esun mas bieu S-70a-PA, Adrès di Otro Idioma pa Bishitá). E propósito di e formularionan aki ta pa hasi sigur ku hende ku nan idioma materno no ta papiamentu, tòg ta haña e oportunidat di risibí e mensahe di Reino den nan mes idioma. Nos tur ta ser animá pa durante aprel 2002, hasi un esfuerso spesial pa usa e papelnan aki.
3 Ora bo topa un persona den teritorio kende su idioma materno ta hulandes, ingles òf spañó—asta si e ta papia un poko papiamentu—bo mester yena un di e papelnan aki na un manera lesabel. Mester hasi esaki asta si e persona no a mustra interes den e bèrdat. Kisas no ta semper bo por haña e nòmber di e persona, pero sí bo mester pone su adrès i e idioma ku e ta papia. Duna e sekretario di kongregashon e papel. E ta kolektá tur e papelnan, kontrolá wak si nan ta eksakto i lesabel, anto ta manda nan ofisina di sukursal pa asina e kongregashon korespondiente ku ta atendé hende ku ta papia e idioma menshoná riba e papel, por tuma kontakto ku e kasnan ei.
4 Ta un echo ku den mayoria área nos por haña den e mesun teritorio asigná vários kas kaminda e hendenan ta papia un otro idioma. Kaminda esaki ta e kaso, e publikadónan di kongregashonnan papiamentu mester konsentrá nan esfuerso riba e hendenan ku ta papia papiamentu. Klaro ku de bes en kuando por sosodé ku dos kongregashon di diferente idioma ta yama na e mesun kas. Sin embargo, kuerponan di ansiano i kongregashonnan den áreanan asina a logra koperá estrechamente pa sirbi e nesesidat di e hendenan, i duna nan e bon nobo den e idioma ku nan ta komprendé mihó. Un manera pa hasi esaki ta dor di entregá e adrèsnan di personanan ku ta papia otro idioma na e kongregashon korespondiente.—Fil. 2:4.
5 Si nos tur koperá, i mustra ku nos ta rasonabel i ku nos tin interes sinsero den e karnénan di Señor, nos por logra hopi den e predikashon di e bon nobo na hende ku ta papia otro idioma. (Huan 13:34, 35; Fil. 2:14; Sant. 3:17, 18) Kada publikadó mester ta alerta pa usa e formularionan menshoná segun ta nesesario. Durante luna di aprel 2002, tur kongregashon papiamentu mester hasi un esfuerso pa usa e formulario S-43-PA (òf esun mas bieu S-70a) pa nota e kasnan di hende ku ta papia hulandes, ingles òf spañó den nan teritorio. Si nos kòrda prinsipalmente riba e bienestar spiritual di e hendenan den teritorio ku ta mansu manera karné i riba nos propósito di hasi disipel, kisas ainda nos por yuda hopi mas hende di tur nashon i lenga pa uni ku nos den adorá Yehova.—Isa. 2:2, 3.