Rindi Sirbishi Sagrado di Dia i Anochi
1 Un privilegio extraordinario a ser extendé na nos. Esei ta pa ser testigonan di Jehova. Nos ta parti dje organisacion mundial di evangelisadornan cu Jehova ta usa pa cumpli cu e trabou di proclamacion di Reino mas grandi cu hamas a yega di ser emprendé! (Mar. 13:10) En bista dje urgencia di nos tempu, nos ta participando den e trabou aki te na e grado mas amplio posibel?
2 Nos no sa cuantu hende cu tempu lo respondé na nos predicacion. Jehova ta sigurá nos cu lo ta “un multitud grandi,” di cua tur ta ser identificá dor cu nan ta “rindiendo sirbishi sagrado na dje di dia i anochi.” (Rev. 7:9, 15) E mas cu cincu miyon Testigonan cu ta ocupá caba den e sirbishi di Dios no ta simplemente oyentenan interesá, ni tampoco nan ta djis personanan cu ta asistí na reunion. Nan ta trahadornan cu ta proclamá e bon nobo mundialmente!
3 Tur dia, tin oportunidadnan pa alabá Jehova, sea den sirbishi di veld of informalmente. Pensa riba e gran testimonio cu lo por ser duná si cada un di nos tuma e iniciativa pa compartí e berdad cu simplemente un persona pa dia. Nos aprecio pa Jehova mester impulsá nos pa papia tocante dje cu entusiasmo.—Salmo 92:1, 2.
4 Yuda Otronan Rindi Sirbishi Sagrado: Jehova ta sigui bendicioná nos cu aumento. (Ageo 2:7) Durante e aña di sirbishi cu a pasa na e islanan ABC, un promedio di 2.115 studio di Bijbel na cas a ser conducí tur luna. Nos meta pa studia cu e personanan aki ta pa yuda nan bira disipelnan di Jesus. (Mat. 28:19, 20) Hopi di nan a haci excelente progreso caba dor di asistí regularmente na e reunionnan. Nan a cuminsá papia cu nan conocínan “tocante e cosnan magnífico di Dios” cu nan a siña. (Echo. 2:11) Nos por invitá nan awor pa participá den e ministerio público?
5 Durante april nos mester haci un esfuerso special pa invitá esnan nobo cu ta cualificá, pa djoin nos den e sirbishi di veld. Bo studiante a expresá un deseo pa haci esaki? Si ta asina, e ta yena e rekisitonan bíblico? (Mira e buki Nos Ministerio, página 97-9.) Ora e studiante ta deseá di participá den e sirbishi di veld, considerá su posibilidadnan cu e superintendente presidente, kende lo haci areglo pa dos anciano examiná e asuntu. Si e studiante cualificá pa ser aceptá como un publicador no-bautisá, invit’é pa djoin bo den e ministerio di veld. Superintendentenan di sirbishi i conductornan di studio di buki mester ta specialmente conciente pa yuda esnan cu kisas ta cualificá pa bira publicador den april.
6 Mayornan por wak si nan yunan ta cualificá of no pa bira publicadornan no-bautisá. (Sal. 148:12, 13) Si bo yu ta deseá di expresá su mes den sirbishi di Reino i e tin bon conducta, bo por acercá un dje ancianonan cu ta den e comité di sirbishi pa considerá e situacion. Despues di reuní huntu cu bo i e yu, dos anciano lo determiná si e ta cualificá pa ser contá como un publicador. Tin un motibu special pa alegrá ora yunan ta djoin nos den alabá Dios!
7 Solamente Jehova ta digno di nos sirbishi sagrado. (Luc. 4:8) Laga cada un di nos usa nos privilegio maraviyoso pa alab’é “masha hopi.”—Sal. 109:30; 113:3.