Yuda Otronan Haña Consuelo
1 Hopi hende ta cansá di tende tocante desaster, guera, crímen i sufrimentu. Consuelo, aunke notablemente ausente for dje informenan di noticia djawe, ta algu cu humanidad realmente tin mester. Consolá ta nificá “duna fortalesa i speransa na” i “aliviá e pena of problema di” un otro hende. Como Testigonan di Jehova, nos ta ekipá pa yuda hende den e manera aki. (2 Cor. 1:3, 4) Nos foyetonan basá riba Bijbel cu nos lo ofrecé durante juli cu augustus ta contené mensahenan consolador dje berdad. (Rom. 15:4) Ata aki algun sugerencia pa presentá nan den vários circunstancia:
2 Un informe di noticia trágico por crea un oportunidad pa duna un testimonio i duna consuelo na otronan, kisas si bo bisa algu asina aki:
◼ “Ora cosnan asina sosodé, algun hende ta puntra nan mes si Dios realmente ta existí i, si e ta existí, cu si e ta interesá den nos. Kico abo ta pensa? [Permití contesta.] Un manera pa determiná si tin un Dios ta dor di aplicá un principio bon establecí.” Lesa Hebreonan 3:4. Mencioná otro cosnan rond di nos cu obviamente a rekerí un persona cu a traha nan. Anto sigui: “Mi tin un foyeto aki cu mi sa lo bo haña consolador. E ta titulá Dios Realmente Ta Interesá den Nos? [Lesa e preguntanan riba e portada.] E ta contené prueba convincente no solamente cu Dios tá existí, sino tambe cu pronto lo e pone un fin na tur e condicionnan inhustu cu nos ta enfrentá awe. Lo bo kier les’é?” Haci areglo pa bin bek.
3 Ora di haci e rebishita, lo bo por bisa:
◼ “Nos a papia tocante e prueba di Dios su existencia dia mi a laga cu bo e foyeto Dios Realmente Ta Interesá den Nos? Kisas bo a nota e punto aki na página 7. [Mustra e plachi i resumí §15.] Esaki ta djis un ehempel cu ta mustra cu di berdad mester ta existí un Dios amoroso. [Lesa §27 na página 9.] Un studio di Bijbel personal a yudá mi enfrentá cu éxito e problemanan diario di bida debí cu e studio ta mustrá bo con Dios ta mira e asuntunan.” Ofrecé pa demostrá un studio.
4 Por haci testificacion via telefon usando e foyeto “¿Qué propósito tiene la vida? ¿Cómo descubrirlo?” Lo bo por introducí bo mes i bisa:
◼ “Mi a bel bo cu un mensahe importante como cu mi no por bin bishitá bo personalmente.” Lesa e promé paragraf na página 4 dje foyeto, haciendo esei na forma natural, como si fuera bo ta combersando cu e persona cara-cara. Puntr’é kico e ta pensa, i permití un contesta. “Mi tin mi Bijbel habrí na Isaías 45:18. E texto aki ta mustra cu e tera a ser creá cu nos na mente. Mi por les’é pa bo?” Despues, splica e propósito dje foyeto, i puntra con bo por entregu’é un ehemplar.
5 E siguiente biaha cu bo yama, lo bo por purba e introduccion aki pa cuminsá un studio:
◼ “Mi kier a sigui riba nos último combersacion dor di ilustrá ken ta esun cu por bisa nos cua ta e propósito di bida. [Parafraseá §1 i 2 na página 6 den e foyeto Propósito.] Revelacion 4:11 ta splica cu Jehova Dios ta nos Creador. [Les’é.] Sigur e mester tabatin un motibu pakico el a crea nos. Hende cu kier a haña sa cua motibu esei ta a studia e Palabra skirbí di Dios, e Bijbel. Mi kier a ofrecé bo e oportunidad ei.” Splica con nos curso grátis di studio di Bijbel na cas ta bai, i haci areglo pa cuminsá e studio.
6 E introduccion positivo aki lo por consolá esnan cu a experenciá morto di un ser kerí:
◼ “Mi ta haciendo un servicio público na fabor di tur esnan cu a perde un ser kerí den morto. Como cu esaki por ta un dje cosnan di mas duru cu cualkier un di nos hamas lo tin cu enfrentá, a prepará e foyeto aki, Ora un Persona Stimá Muri. El a yuda miyones di hende. Mi kier a mustrá bo loke e ta bisa tocante un promesa excitante cu Jesucristo a haci. [Lesa e di cincu paragraf na página 26, incluyendo Juan 5:21, 28, 29.] Tuma nota di e plachi aki na página 29 representando e relato di Evangelio caminda Jesus en realidad a lanta Lázaro for di morto. Si bo kier lesa e foyeto consolador aki, gustosamente lo mi lagu’é cu bo.”
7 Ora bo pasa bek, lo bo por bolbe mustra e plachi na página 29 dje foyeto “Ora un Persona Stimá Muri” i bisa:
◼ “Corda nos consideracion tocante con Cristo a resucitá Lázaro. [Lesa e palabranan cursivo na página 28 cu ta compañá e plachi, i considerá e material bou dje subtema “Esei Realmente A Sosodé?”] Si bo curason ta anhelá pa kere cu lo bo por mira un ser kerí defuntu atrobe, lagá mi yudá bo haña fe den e speransa di resureccion.” Ofrecé un studio di Bijbel na cas.
8 Laga nos haci nos best den e lunanan binidero pa imitá Jesus dor di “consolá tur esnan cu ta pena.”—Isa. 61:2.