Programa Nobo di Dia Special di Asamblea

“Haci Tur Cos pa Causa dje Bon Nobo” ta e tema dje programa nobo di dia special di asamblea di september padilanti. (1 Cor. 9:23) E bon nobo di Reino ta e noticia mas importante cu ta ser tendé awe. E programa lo yuda nos apreciá e privilegio único cu nos tin di ta esnan cu ta hiba e noticia maraviyoso aki. Tambe lo e duna nos curashi pa sigui declará e bon nobo sin stop.—Echo. 5:42.

E programa lo mustra nos con pa utilisá nos entrenamentu teocrático plenamente di manera cu nos por logra lo máximo den e ministerio. Nos lo tende for di esnan cu a haci ahustenan pa expandé nan sirbishi, incluyendo hóbennan cu ta dunando tur cu tin n’e adelanto dje bon nobo.—Compará cu Filipensenan 2:22.

E discurso principal, na encargo di un orador bishitante, lo enfatisá e necesidad pa nos keda “apto pa ser confiá cu e bon nobo.” (1 Tes. 2:4) E programa lo yuda nos mira cu si nos kier keda cu e privilegio di compartí e bon nobo cu otro hende, nos mester sigui cumpli continuamente cu e rekisito i normanan di Dios den nos manera di pensa i den nos conducta. Tambe lo resaltá e bendicionnan cu nos ta ricibí dor di haci esaki.

No perde e programa vital aki. Esnan recien dedicá cu ta deseá di bautisá na e dia special di asamblea aki mester informá e superintendente presidente mesora. Invitá tur esnan cu bo ta studia cuné pa ta presente. Laga nos permití Jehova fortificá nos pa haci tur cos pa causa dje bon nobo i asina completá e trabou di mas importante promé cu Armagedon.