Programa Nobo pa Dia Spesial di Asamblea

Ku poder di spiritu santu, e promé kristiannan a hasi esfuerso vigoroso pa proklamá e bon nobo mas leu posibel. (Echo. 1:8; Kol. 1:23) E programa pa e dia spesial di asamblea pa e aña di sirbishi 2007, ‘Dediká Bo mes Kompletamente na e Palabra,’ lo yuda nos imitá nan ekselente ehèmpel.—Echo. 18:5.

Komentando riba e palabra di Dios, Rei David a bisa: “E testimonio di SEÑOR ta fiel, e ta hasi hende simpel bira sabí.” (Sal. 19:7) E programa kuidadosamente prepará pa e dia spesial di asamblea 2007 lo resaltá e balor di e Skritura pa ‘korigí’ kosnan i lo animá nos pa usa e Palabra di Dios pa prediká i siña otro personanan ku un sentido di urgensia. (2 Tim. 3:16, 17) E programa nobo lo mustra kon nos por evitá di kai den trampa i ki benefisio nos por saka dor di apliká prinsipionan di Beibel den nos bida diario. Ademas, lo e yuda nos usa e Palabra di Dios pa yuda hóbennan i personanan nobo progresá spiritualmente.

Wak pa bo t’ei promé ku e programa kuminsá, i presta bon atenshon. Tuma nota di puntonan ku bo por apliká personalmente. Mustra apresio pa e instrukshon i rekordatorionan ku bo ta risibí, i pensa kon bo ta bai praktiká e kosnan ku bo a siña.

E programa pa e dia spesial di asamblea lo oumentá nos apresio pa e Palabra di Dios, lo e rekordá nos pa sigui firmemente den e trabou di prediká e bon nobo di Reino ku entusiasmo i lo e mustra nos kon pa yuda otro hende hasi meskos. P’esei anto, sea determiná pa no pèrdè nada di e guia i instrukshon spiritual ku Yehova ta perkurá pa nos di e forma aki!—Isa. 30:20b, 21.