Programa di Dia Spesial di Asamblea pa 2010
1. (a) Menshoná algun tema bíbliko ku a keda tratá durante añanan resiente na dianan spesial di asamblea. (b) Tin sierto puntonan sobresaliente di dianan spesial di asamblea anterior ku a yuda bo den bo sirbishi?
1 “Hasi Sigur di e Kosnan Mas Importante,” “Para Firme Komo un Solo Tou,” “Sigui Duna Testimonio di e Bèrdat” i “Nos Ta e Klei—Yehova Ta Nos Alfarero.” (Fil. 1:9, 10, NW; 1:27; Juan 18:37; Isa. 64:8) Esakinan ta djis algun di e tantísimo temanan ku nos a yega di trata na dianan spesial di asamblea. Bo ta ansioso pa asistí na e dia spesial di asamblea pa aña di sirbishi 2010? Lo e desaroyá e tema: “Tempu Ta Kòrtiku,” basá riba 1 Korintionan 7:29.
2. Kon nos por generá entusiasmo pa e asamblea akí?
2 Kuminsá papia ku entusiasmo tokante e dia spesial di asamblea asina ku nan anunsiá e fecha den bo kongregashon. Algun mayor ta yuda nan yunan spera ansiosamente pa e dia di asamblea dor di marka e fecha riba e kalènder di kas. Tambe nan ta traha un lista di kos ku kada hende mester bai asamblea kuné, i despues nan ta keda konta kuantu dia falta. Durante un anochi di Adorashon Komo Famia, lo bo por repasá notanan di dianan spesial di asamblea anterior. Ademas, bo por prepará bo kurason pa e evento akí pa medio di un repaso di página 13-16 di e buki Benefisiá di e Skol di Ministerio Teokrátiko, ya ku esei lo yuda abo i bo famia “pone bon atenshon kon boso ta skucha.”—Luk. 8:18.
3. Kon nos por saka pleno benefisio di loke lo keda presentá?
3 Apliká Loke Bo Siña: Hopi biaha bo ta tende e rumannan bisa despues di asamblea: “E programa tabata tremendo!” Esei semper ta un bèrdat, ya ku esaki ta un di e tantísimo perkurashonnan generoso di Yehova. (Pro. 10:22) Pero pa e informashon duna fruta, bo tin ku meditá riba dje i keda kòrd’é. (Luk. 8:15) Despues di asamblea, riba kaminda pa kas, ta bon pa bo tuma tempu pa papia tokante e programa komo famia òf ku e hendenan den outo huntu ku bo. Boso por papia tokante e metanan ku boso a pone i e puntonan ku lo yuda boso den boso sirbishi. Di e manera ei e informashon lo benefisiá boso pa hopi tempu despues di e asamblea.—Sant. 1:25.
4. Dikon nos lo haña e asamblea akí un okashon spesial?
4 Ora nos haña un regalo práktiko, ku ta nèt loke nos tin mester, nos ta sinti nos masha spesial. Akaso nos no ta spera ansiosamente riba loke Yehova tin prepará pa nos na nos siguiente dia spesial di asamblea? Nos por tin sigur ku lo e ta práktiko den tur sentido. Nos por ferwagt ku nos Tata selestial, Yehova, lo duna nos presis e regalo ku nos tin mester; lo e ta den forma di animashon i entrenamentu pa kumpli ku e trabou ku el a asigná nos.—2 Tim. 4:2; Sant. 1:17.
[Study Questions]