Areglo Nobo pa Repasá Programanan di Asamblea
Segun ku Satanas su mundu ta sigui bai di malu pa pió, Yehova ta duna nos e fortalesa “pa renunsiá impiedat i deseonan mundano i pa biba huisioso, hustu i santu den e siglo presente.” (Tito 2:12) Entre e perkurashonnan ku e ta hasi mediante “e esklabo fiel i prudente” tin e programa anual di asamblea di sirkuito i tambe esun di e dia spesial di asamblea. (Mat. 24:45) E reunionnan spiritual aki ta fortifiká nos masha hopi mes!
Pa yuda nos kòrda i apliká e instrukshonnan ku nos a risibí, durante e aña di sirbishi 2005 lo usa un areglo nobo pa repasá e programanan di asamblea aki. Na página 5 i 6 di e suplemento aki tin artíkulonan ku ta duna un bista adelantá di loke lo ser presentá, i tambe preguntanan di repaso pa kada programa di asamblea. Kongregashonnan lo konsiderá e informashon aki den e Reunion di Sirbishi djis promé i despues ku nan a asistí na nan asamblea. Kon nan lo organisá esaki?
Un òf dos siman promé ku e kongregashon asistí na e asamblea di sirkuito, durante e Reunion di Sirbishi lo tin un diskurso di 10 minüt basá riba e artíkulo “Programa Nobo pa Asamblea di Sirkuito,” pa lanta ekspektativa pa e programa. E oradó lo hala atenshon tambe na e preguntanan di repaso i animá tur presente pa hasi anotashon na asamblea komo preparashon pa e repaso ku lo tuma lugá un par di siman despues di e asamblea.
Den un par di siman despues di e asamblea, durante e Reunion di Sirbishi lo tin un repaso di 15 minüt basá riba e promé dia di e programa di asamblea. E siguiente siman lo dediká 15 minüt pa repasá e di dos dia di e programa. E preguntanan di repaso den e suplemento aki lo sirbi komo base pa e konsiderashonnan aki. E repaso mester enfoká riba e balor práktiko di e informashon. E ansianonan por hasi areglo pa abreviá, eliminá òf reprogramá otro partinan di e Reunion di Sirbishi pa traha lugá pa e seshonnan di repaso aki.
E mesun areglo ta konta pa e programa di e dia spesial di asamblea. E úniko diferensia ta ku lo tin solamente ún parti di 15 minüt pa repasá henter e programa. Ta bon pa nos tur warda e suplemento aki i us’é pa nos benefisiá plenamente di e ekselente instrukshon ku Yehova ta duna.—Isa. 48:17, 18.