Duna Testimonio na “Tur Clase di Hende”
1 Ora nos topa hende di diferente cultura of antecedente religioso, nos ta corda cu e boluntad di Jehova ta “pa tur clase di hende ser salbá i yega na un conocimentu exacto dje berdad.” (1 Tim. 2:4) Ademas di un cantidad di tratado i foyeto prepará specialmente pa esei, nos tin dos excelente publicacion cu nos por usa tur ora pa yuda personanan kende nan religion no a siña nan e berdad tocante Dios i Cristo.
2 E buki El hombre en busca de Dios ta duna un bista penetrante dje orígen dje religionnan principal di mundu i p’esei e por ta útil pa yuda hende na tur parti haci un comparacion entre nan creencianan i loke Bijbel ta siña tocante e único Dios berdadero. Na otro un banda, dor cu e ta resaltá e bida di Jesucristo, e buki E homber mas importante cu hamás a biba por yuda un persona cera mihó conocí cu e Yu di Dios i ser atraí na dje, mescos cu hopi hende den e promé siglo. (Juan 12:32) Ki ora cu ta apropiado, bo por purba e siguiente sugerencianan pa introducí e bukinan aki.
3 Si bo ta pensa cu lo ta bon pa ofrecé un persona e buki “E homber mas importante,” lo bo por puntra:
◼ “Kico ta bini na bo mente ora bo pensa riba Jesucristo? [Permití contesta.] Hopi historiadó ta reconocé Jesus como e homber mas importante cu a yega di biba. [Cita un ehempel for dje introduccion dje buki E homber mas importante.] Bijbel ta mustra cu Jesus su bida tabata un modelo pa nos imitá.” Lesa 1 Pedro 2:21 i e promé paragraf n’e último página dje introduccion dje buki E homber mas importante. Si e doño di cas ta interesá pa siña tocante Jesus, ofrecé e buki. Promé cu bo bai, lesa Juan 17:3 i puntra: “Con nos por gana e conocimentu aki cu ta hiba na bida eterno?” Traha un cita specífico pa bolbe bek cu e contesta.
4 Ora bo bolbe bek pa splica con pa gana e conocimentu cu ta duna bida, lo bo por bisa:
◼ “Mi a primintí di bolbe bek pa mustrá bo con nos por gana e conocimentu cu ta hiba na bida eterno.” Presentá e buki Conocimentu, i usa e promé capítulo pa mustra con un studio ta bai.
5 Si bo ta deseá di ofrecé e buki “El hombre en busca de Dios,” lo bo por puntra:
◼ “Ya cu tin asina tantu diferente religion awe, bo a yega di puntra bo mes con nos por haña sa cua ta esun cu Dios ta aprobá?” Despues di un contesta, habri e buki El hombre en busca de Dios na página 377. Resaltá punto number 7, i puntra e doño di cas si e no ta di acuerdo cu e religion berdadero lo mester uni hende di tur rasa. Busca un dje textonan mencioná, i segun tempu ta permití, considerá algun dje otro puntonan dje lista. Si e persona ta interesá, ofrecé e buki. Promé cu bo bai, lo bo por puntra: “Con religion berdadero mester influenciá un persona su conducta?” Haci areglo pa bolbe bek pa contestá e pregunta.
6 Ora bo bolbe bek pa splica con religion berdadero ta influenciá un persona su bida, lo bo por puntra:
◼ “Con abo ta pensa cu religion lo mester influenciá hende su conducta? [Permití contesta.] Cristo a duna nos un norma pa evaluá religion.” Lesa Mateo 7:17-20 directamente for di página 12 dje buki El hombre en busca de Dios. Caba invitá e doño di cas pa lesa §20 na página 12-14. Si tempu permití, considerá §25-9 na página 15-18. Esaki por hiba na un studio sea for dje foyeto Rekerí of dje buki Conocimentu.
7 Puntonan pa Start un Combersacion: Tin hopi cuadro di siñansa den e buki El hombre en busca de Dios cu nos por usa pa start un combersacion n’e bishita inicial of n’e rebishita. Bo por cuminsá un combersacion dor di djis haci un pregunta apropiado. Por ehempel, tuma nota dje pregunta i tópiconan aki i e páginanan cu ta trata nan:
“Preguntanan cu Ta Exigí un Contesta” —página 17-18.
“Jesus Tabata un Mito?” —página 237.
“Ken A Skirbi Bijbel?” —página 241.
“E Koran i Bijbel” —página 285.
“Prueba di Autenticidad di Bijbel” —página 340-1.
“Loke Testigonan di Jehova Ta Kere” —página 356-7.
“Con pa Identificá e Religion Berdadero” —página 377.
8 Bo por bai na e página(nan) selectá den e buki El hombre en busca de Dios i splica e punto cu ta ser considerá. Caba prepará pa un rebishita dor di haci un pregunta relacioná cu e punto i cu por ser contestá for di e foyeto Rekerí of e buki Conocimentu. Haci sigur di invitá e doño di cas p’e Reunion Público i bis’é dje orario dje otro reunionnan.
9 Tur clase di hende di curason onrado ta buscando e berdad tocante Dios i Cristo. Nos por yuda nan dor di nos trabou di duna testimonio. P’esei anto, laga nos sigui ‘traha duru i haci esfuerso vigoroso, pasobra nos a pone nos speransa den un Dios bibu, cu ta Salbador di tur clase di hende.’—1 Tim. 4:10.