Warda Esaki

Presentashonnan Sugerí pa Sirbishi di Vèlt

Usa e siguiente sugerensianan pa yuda bo prepará presentashonnan pa presentá e oferta di literatura pa e luna konserní.

Hala Serka Yehova

“Hopi hende ku ta kere den Dios ta deseá di sinti nan mas serka di dje. Bo tabata sa ku Dios ta invitá nos pa hala serka dje? [Lesa Santiago 4:8.] E buki aki ta spesialmente pa yuda hende usa nan propio Beibel pa hala serka Dios.” Lesa paragraf 1 na página 16.

“Awendia tin masha hopi inhustisia. E situashon ta manera e siguiente teksto ta deskribí. [Lesa Eklesiastés 8:9b.] Hopi hende ta asta puntra nan mes si Dios tin kunes. [Lesa e promé dos frasenan di paragraf 4 na página 119.] E kapítulo aki ta splika dikon Dios temporalmente ta permití inhustisia.”

Ta Eksistí un Kreadó Ku Ta Interesá den Bo?

“Unda nos por haña e mihó konseho pa resolvé nos problemanan di mas difísil? [Permití e persona kontestá. Kaba lesa Mateo 7:28, 29.] E teksto aki ta mustra kon hende a reakshoná ora Hesus a duna su Sermon Riba Seru. Wak kiko otro hende a bisa. [Hala atenshon na e komentarionan na página 152.] E kapítulo aki ta papia tokante e bida i siñansanan di Hesus.”

“Bo a yega di puntra bo mes: ‘Si tin un Dios, lo e kaba ku sufrimentu i inhustisia ku tin den mundu?’ [Permití e persona kontestá. Kaba lesa Revelashon 21:3, 4.] E buki aki ta splika kiko Dios lo hasi pa eliminá sufrimentu i loke ta kous’é.” Mustr’é kapítulo 10.

Keda Vigilá!

“Hopi hende ta preokupá enkuanto e problemanan serio i susesonan spantoso ku ta asina plamá awendia. [Menshoná un ehèmpel konosí lokalmente.] Bo tabata sa ku e kosnan ei ta parti di un señal mundial ku ta indiká ku e gobièrnu di Dios pronto lo tuma kontròl di asuntunan riba tera? [Permití e persona kontestá. Kaba lesa un teksto apropiá, manera por ehèmpel: Mateo 24:3, 7, 8; Lukas 21:7, 10, 11 òf 2 Timoteo 3:1-5.] E foyeto aki ta konsiderá dikon awor ta mas urgente ku nunka pa nos ta alerta pa e nifikashon di e susesonan aki.”

“Awe hopi hende ta angustiá pa motibu di susesonan spantoso òf tragedia personal. Tin hende ta puntra nan mes dikon Dios no ta intervení pa prevení e kosnan ei. Beibel ta sigurá nos ku pronto Dios lo aktua pa aliviá humanidat su sufrimentu. [Lesa Revelashon 14:6, 7.] Wak ta kiko Dios su huisio lo nifiká pa hende. [Lesa 2 Pedro 3:10, 13.] E foyeto aki lo duna mas detaye relashoná ku e tópiko importante aki.”

Conocimentu cu Ta Hiba na Bida Eterno

“Si bo haña un invitashon pa biba den un ambiente bunita manera esaki, lo bo aseptá e invitashon? [Mustra e persona e plachi na página 4-5, anto permitié kontestá.] Wak kiko e Palabra di Dios ta bisa ta e manera prinsipal pa disfrutá di e klase di bida aki pa semper. [Lesa Juan 17:3.] E buki aki lo yuda bo haña e konosementu ku ta hiba na bida eterno.” Hasi areglo pa konsiderá e promé sinku paragrafnan di kapítulo 1 n’e siguiente bishita.

Bai na e plachi na página 188-9, i usando e komentario di e plachi, puntra e doño di kas: “Abo ta spera di biba den Paradeis, ora e konosementu di Dios ta yena e tera? [Permití e persona kontestá. Kaba lesa Isaias 11:9.] E buki aki lo siña bo kiko Beibel ta bisa tokante Paradeis i kon nos por forma parti di dje.” Hasi areglo pa trata paragraf 11-16 di kapítulo 1 n’e siguiente bishita.

Siña for di e Gran Maestro

“Bo ta kere ku mundu lo tabata mihó si hende tabata biba na armonia ku e dicho aki? [Lesa Mateo 7:12a. Kaba permití e persona kontestá.] E buki aki ta kontené hopi lès ku e maestro di mas grandi ku a yega di biba riba tera a siña hende.” Hala atenshon na e plachinan i nan komentario den kapítulo 17.

“Awendia mayoria mayor ta purba inkulká norma- i balornan sano den nan yunan. Abo ta haña esei importante? [Permití e persona kontestá. Anto lesa Proverbionan 22:6.] Tuma nota ku mayornan ta ser animá pa kuminsá eduká nan yunan for di chikitu. E buki aki ta spesialmente pa yuda nan hasi esei.” Hala atenshon na e plachinan i nan komentario den kapítulo 15 òf 18.

“Hopi bes mayornan ta keda asombrá pa e tipo di pregunta ku nan yunan ta hasi. Tin di e preguntanan ei ta difísil pa kontestá, no ta bèrdat? [Permití e persona kontesta. Kaba lesa Efesionan 6:4.] E buki aki por yuda mayornan kontestá e preguntanan ku muchanan djawendia ta hasi.” Hala atenshon na un par di plachi i nan komentario den kapítulo 11 i 12 òf esnan di kapítulo 34 pa 36.

Bida—Kon El A Presentá? Dor di Evolushon òf Kreashon?

“Nos tur ta preokupá ku e krímen i violensia ku ta asotá nos área. Bo ta kere ku tin un persona ku un berdadero solushon p’e problema aki? [Permití e persona kontestá.] Dios tin un solushon.” Bai na página 196; lesa i komentá riba Proverbionan 2:21 i 22 na paragraf 19. Mustr’é e tema di kapítulo 16, i ofresé e buki.

Bai na página 6, i bisa: “Hopi hende ta pensa ku nos bunita planeta tera i bida riba dje a bin pa kasualidat. Kiko bo ta kere ta un splikashon rasonabel p’esei? [Permití e persona kontestá.] Tin un kantidat di prueba ku ta konfirmá e relato bíbliko di un Kreadó masha poderoso i ku ta stima nos masha hopi mes. E ta e Dios berdadero, i su nòmber ta Yehova.” Lesa Salmo 83:18 i ku poko palabra splika ku ta Dios su propósito pa transformá henter e tera den un paradeis.

Hende en Buska di Dios

“Siendo ku tin asina tantu diferente religion awe, bo a yega di puntra bo mes kon nos por determiná ta kua ta esun ku Dios ta aprobá?” Despues ku e persona kontestá, habri e buki na página 377. Resaltá punto number 7, i puntra e doño di kas si e no ta di akuerdo ku e religion berdadero lo mester uni hende di tur rasa. Buska un di e tekstonan menshoná, i segun tempu ta permití, konsiderá algun di e otro puntonan riba e lista. Si e persona ta ègt interesá, ofresé e buki. Promé ku bo bai, lo bo por puntra: “Kon religion berdadero mester influensiá un persona su kondukta?” Hasi areglo pa bolbe bèk i kontestá e pregunta.

Si un persona identifiká su mes komo miembro di un di e religionnan prinsipal, kisas lo bo por bisa: “Ta interesante pa topa ku hende di diferente religion. Hende a buska Dios na vários manera. [Si ta apropiá, lesa Echonan 17:26, 27.] Hopi bes hende ta sigui e religion di nan mayornan. [Lesa paragraf 12 na página 8.] Ta masha útil i edukativo pa siña tokante otro religion. E buki aki ta splika tokante e orígen, práktika- i siñansanan di e religionnan prinsipal na mundu.” Duna e persona un ehèmpel enkuanto kiko e buki ta bisa tokante su religion. Lo bo por bai na página 100-101 pa sikismo; página 116-17 pa hinduismo; página 141 pa budismo; página 164-6 pa taoismo; página 177 pa konfusianismo; página 190-5 pa sintoismo; página 220-1 pa hudaismo i página 289 pa islam.

Revelacion—su gran culminacion ta cerca!

“Por ta bo a tende di [menshoná un notisia]. Ora un persona pèrdè su bida di un manera trágiko asina, hopi hende ta puntra nan mes ta ki konsuelo nan lo por duna famia di e víktima. Kiko abo ta pensa?” Permití e persona kontesta. Anto bai na página 299, i mustr’é e plachi di resurekshon. Sigui dor di bisa: “Hopi hende ta keda sorprendí ora nan haña sa ku tantu hende hustu komo malbado lo ser resusitá den Paradeis riba tera. [Lesa Echonan 24:15 manera e ta sitá den paragraf 9 na página 297, anto duna e splikashon ku tin na paragraf 10.] E buki aki ta konsiderá hopi otro detaye interesante tokante e propósito di Dios pa futuro.”

E Bijbel—e Palabra di Dios of e palabra di hende?

“Nos ta biba den un tempu ku kasi tur hende ta konfrontá problema serio. Hopi hende ta bai serka tur klase di konsehero pa haña guia. Algun ta akudí na medium spiritista pa yudansa. Unda bo ta kere nos por haña bon konseho ku realmente lo yuda nos? [Permití e persona kontestá.] Beibel ta deklará un echo importante ku nos tur tin ku komprondé. [Lesa 2 Timoteo 3:16. Kaba bai na página 187 i lesa paragraf 9.] E buki aki lo yuda bo komprondé ku ora un hende ta apliká loke Beibel ta bisa, esei semper ta duna e mihó resultado.”

E homber mas importante cu hamás a biba

“Durante e temporada aki di Pasku hopi hende ta pensa riba Hesus. Sin embargo, debí ku asina tantu kos malu ta sosodé rònt mundu, algun hende ta puntra nan mes si Hesus realmente ta interesá den nos. Kiko abo ta pensa di esei?” Permití e persona kontestá. Bai na kapítulo 24 i konsiderá brevemente pakiko Hesus a bin na mundu. Despues lesa Juan 15:13, enfatisando Hesus su amor sinsero pa otro hende.

“Ora un persona menshoná Hesukristu, hopi hende ta relashon’é sea ku un beibi òf ku un hòmber ku ta sufriendo i ta serka di muri. Nan konsepto di Hesus ta enbolbé solamente su nasementu i su morto. Hopi bes hende ta pasa por haltu di e kosnan maravioso ku el a bisa i hasi durante su bida. Loke el a logra ta influensiá kada persona ku a yega di biba riba e tera aki. Ta p’esei ta masha importante pa nos siña mas tantu posibel tokante e kosnan maravioso ku el a hasi pa nos.” Lesa Juan 17:3. Bai n’e promé página di e introdukshon, i lesa e di kuater paragraf.

Kico Dios Ta Rekerí di Nos?

“Bo ta kere ku tabata Dios su intenshon pa nos biba rondoná pa e problemanan ku nos ta konfrontá awe? [Permití e persona kontestá. Kaba lesa Mateo 6:10.] Bo a yega di pensa ta kiko presis e Reino di Dios ta?” Bai na lès 6, i lesa e preguntanan ku tin na komienso di e lès. Kuminsá trata e lès, òf hasi areglo pa hasi esei na e siguiente bishita.

“Apesar di e avansenan di sosiedat moderno, malesa i morto ta sigui kousa hopi sufrimentu i doló pa humanidat. Bo sa kiko Hesus lo hasi pa hende enfermo, bieu i asta pa hende morto?” Permití e persona kontestá. Si e persona ke sa e kontesta, bai na lès 5, i lesa e preguntanan di paragraf 5 i 6. Trata e paragrafnan, òf hasi areglo pa hasi esei durante e siguiente bishita.

Adorá e Úniko Dios Berdadero

“Na unda bo ta kere nos por haña yudansa pa trata ku preshonnan di bida? [Permití e persona kontestá. Kaba lesa Romanonan 15:4.] Tuma nota ku e Skritura inspirá ta duna nos instrukshon, enkurashamentu i speransa, ku por fortalesé nos pa sigui wanta. E buki aki ta duna sugerensianan útil enkuanto kon nos por saka mayor probecho di lesamentu di Beibel.” Hala atenshon na e kuater puntonan ku tin na página 30.

“Desde e tempu ku Hesus tabata riba tera, hopi hende a pidi den orashon pa e Reino di Dios bini. Bo a yega di puntra bo mes ta kiko e binimentu di e Reino ei lo nifiká pa hende? [Permití e persona kontestá. Kaba lesa Daniel 2:44.] E buki aki ta splika kiko e Reino di Dios ta, kiko lo e logra i kon nos por benefisiá di su gobernashon hustu.” Dirigí atenshon na e plachi na página 92-3.