Purba un Introdukshon Fleksibel — BIBLIOTEKA ONLINE Watchtower

Purba un Introdukshon Fleksibel

Interes sinsero den hende lo motivá nos pa purba saka afó kiko ta nan nesesidatnan i mustra nan kon e Reino lo solushoná por kompletu e problemanan ku nan ta enfrentá. (Fil. 2:4) Un introdukshon fleksibel ku hopi publikadó ta haña efektivo ta pa invitá e doño di kas pa komentá riba e plachinan di Paradeis den nos publikashonnan, manera esnan menshoná den e kolumna na man drechi di e página aki. Kisas lo bo por hasi esaki usando un di e siguiente introdukshonnan:

◼ “Bo ta kere ku un dia nos lo por mira e famia humano disfrutá di e tipo di ambiente ku tin riba e plachi aki?”

◼ “Nos tur lo ke pa nos yunan disfrutá di e tipo di mundu ku nos por mira riba e plachi aki. Kiko bo ta kere ta nesesario pa esaki bira un realidat?”

◼ “E plachi aki ta duna un idea kon e tera lo bira ora ku e boluntat di Dios sosodé na tera meskos ku den shelu. Bo ta mira algu riba e plachi aki ku ta diferente for di bida di awendia?”

◼ “Lo bo deseá di biba den e ambiente ku tin riba e plachi aki? [Permití e persona kontestá.] Bo ta kere ku esaki lo tuma lugá durante nos bida?”

Skucha bon kiko e persona ta kontestá, i bondadosamente purba haña sa kiko ta su punto di bista dor di hasi un òf dos pregunta adishonal. Si algun di nan bisa ku nan no ke biba den e ambiente ku tin riba e plachi òf ku nan no ta kere ku esei ta posibel, no konkluí mesora ku nan no tin interes. Ku takto puntra nan dikon nan ta pensa asina. Nan komentarionan lo por revelá un preokupashon grandi pa e problemanan ku humanidat ta enfrentá i ku ta parse di no tin solushon.—Eze. 9:4.

Segun ku bo ta haña sa ta kiko e preokupashonnan di e doño di kas ta, adaptá bo presentashon na e preokupashonnan ei. Enfatisá e aspekto di e mensahe di Reino ku lo solushoná su problemanan. Mustr’é un òf dos teksto bíbliko ku ta toka e asuntu ku ta preokup’é. (Wak e sugerensianan den e kolumna na man drechi.) Laga e mes mira loke e Palabra di Dios ta bisa. Si e mustra interes, ofresé e publikashon i hasi areglo pa bolbe bishit’é. Anto sigui kultivá su interes a base di loke boso a papia den e promé kòmbersashon.

[Box on page 6]

Ehèmpel di Plachinan di Paradeis

Buki Kreashon: página 237, 243, 251

Buki Maestro: página 251-4

Buki Conocimentu: página 4-5, 188-9

Foyeto Rekerí: página 11, 13

Buki Berdadero paz: página 98

Buki Adorá Dios: página 92-3

[Picture on page 6]

Asuntunan Ku Ta Preokupá Hende

Dekadensia Moral

2 Timoteo 3:1-5