Simpel Ta Mihó
1 Di con hopi bes publicadónan yong ta mantené e atencion dje personanan cu ken nan ta compartí e mensahe di Reino? Un motibu ta cu nan expresionnan ta simpel. Algun publicadó kisas ta kere cu pa duna un testimonio eficas, nan tin mester di un presentacion elocuente. Sin embargo, experencia ta mustra cu un presentacion simpel i cla ta esun mihó.
2 Jesus a proclamá e Reino di Dios den un manera simpel i direct, i el a entrená su disipelnan pa nan haci mescos. (Mat. 4:17; 10:5-7; Luc. 10:1, 9) El a usa introduccion, pregunta i comparacionnan simpel pa capta e atencion di su oyentenan i alcansá nan curason. (Juan 4:7-14) Nos ta haci bon di imitá su ehempel i duna presentacionnan cu ta fácil pa comprendé.
3 E ‘bon nobo dje reino’ ta e mensahe cu nos mester proclamá. (Mat. 24:14) Usando e Reino como bo tema básico lo yuda bo tene bo presentacion simpel. Papia di cosnan cu ta interesá bo oyentenan. Hende muher hopi bes ta mas interesá den nan famia, cu den temanan político. Un tata ta mas preocupá cu su empleo i cu e siguridad di su famia. Hóbennan ta interesá den nan futuro; hende grandi, den mihó salú i den nan siguridad. Por lo general hende ta mas preocupá cu sucesonan local cu loke ta pasa na paisnan leu. Despues di a combersá tocante asuntunan di interes comun, dirigí atencion na e bendicionnan cu humanidad obediente lo disfrutá di dje bou di mando dje Reino di Dios. Un par di palabra simpel i bon scogé, combiná cu un texto bíblico por ta e mihó manera pa stimulá e interes di bo oyente.
4 Kisas bo por cuminsá un combersacion bisando:
◼ “Sin duda bo ta di acuerdo cu humanidad ta ser asotá cu hopi malesa incurabel. Pero bo tabata sa cu Dios a primintí cu pronto lo e caba cu tur clase di enfermedad i tambe morto?” Permití contesta, anto lesa Revelacion 21:3 i 4.
5 Cu presentacionnan cla i simpel, bo por yega na e mente i curason di mas hende den bo teritorio, i asina yuda nan siña tocante Jehova i dje prospecto di disfrutá di bida eterno.—Juan 17:3.