Saka Mayor Probecho dje Kongreso di Distrito

E aña aki nos lo tin 6 kongreso pa nos teritorio. Sosiedat ta hasi esfuerso pa perkurá lugánan adekuá pa tur kongregashon na un kosto razonabel. Kiko nos por hasi pa saka mayor probecho di nos kongreso di distrito?

Na promé lugá, ta importante pa kada kongregashon hasi esfuerso pa asistí n’e kongreso na kua nan ta asigná. Si hopi ruman disidí di asistí na kongresonan kaminda nan no ta asigná, lo por tin problema pa perkurá sufisiente asiento. Probablemente, ta masha poko ruman su sirkunstansia ta obligá nan bai un otro kongreso. Sin embargo, en general nos ta pidi enfátikamente pa tur ruman bai kaminda nan kongregashon ta asigná. Asina nos lo por disfrutá dje kongreso kómodamente.

Na di dos lugá, ta bon pa tene na mente e propósito dje diskurso públiko ku ta ser tené djadumingu atardi. E diskurso aki ta prepará spesialmente pa studiantenan nobo i pa personanan interesá. P’esei, nos lo kier hasi un esfuerso èkstra pa invitá nan na e seshon di programa aki riba djadumingu atardi. Último añanan, e máksimo di asistensia na tur kongreso ta djadumingu mainta ora ta presentá e drama. Ounke e drama ta di gran benefisio pa tur ku mir’é, el a ser prepará foral pa publikadónan di kongregashon i pa studiantenan progresivo, ku por komprendé su propósito mihó. Tal bes e drama ta entretené personanan interesá, pero probablemente nan lo no saka mes tantu benefisio ku ora nan skucha e diskurso públiko. Sosiedat ta hür lugánan di kongreso kontando riba un asistensia máksimo pa e diskurso públiko, no p’e drama. P’esei ora nos ta invitá hende pa e diskurso públiko nos ta apoyá e esfuerso di Sosiedat den esei.

E pueblo di Yehova ta masha gradisidu ku nan por reuní huntu den lugánan ekselente i asina benefisiá dje programa spiritual ku tin prepará. Esaki por ta e kaso si bo koperá i asistí na e kongreso kaminda bo kongregashon ta asigná. Pues, laga nos saka mayor probecho di nos kongreso di distrito!—1 Kor. 14:40.