Satisfasé Bo Nesesidat Spiritual
1 Nos binidero Kongreso di Distrito “Proklamadónan Seloso dje Reino” ta duna nos un oportunidat maravioso pa satisfasé nos nesesidat spiritual. Meskos ku un kuminda literal saludabel, e programa sigur lo nutri nos den sentido spiritual “ku e palabranan di e fe.” (1 Tim. 4:6) Lo e yuda nos hala mas serka di Yehova. I nos por ferwagt ku nos lo haña konseho i animashon pa yuda nos perseverá ora nos ta konfrontá prueba den nos bida. Yehova ta sigurá nos: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” (Sal. 32:8) Esta bendishoná nos ta ku nos tin Yehova su guia amoroso den nos bida! Konsiderá algun paso práktiko ku nos por tuma pa saka máksimo probecho for di e programa di kongreso.
2 Nos Tin Ku Prepará Nos Kurason: Nos kada un tin e responsabilidat di protehá nos kurason figurativo. (Pro. 4:23) Pa logra esaki nos mester tin disiplina i nos mester ta onesto ku nos mes. E kongreso ta un bon tempu pa meditá riba nos relashon ku Yehova, un tempu pa ‘fiha nos bista riba e lei perfekto, e lei di libertat.’ Pa prepará nos kurason p’e ‘risibí e palabra ku ta wòrdu plantá,’ nos tin ku roga Yehova p’e eksaminá nos, mustra nos “kualkier kaminda di maldat” ku tin den nos ku mester di korekshon, i guia nos “riba e kaminda eterno.”—Sant. 1:21, 25; Sal. 139:23, 24.
3 Skucha i Meditá: Hesus a elogiá Maria pasobra el a paga bon tinu na su palabranan. El a bisa: “Maria a skohe e parti bon ku lo no wòrdu kitá for di dje.” (Luk. 10:39, 42) Si nos tin e mesun aktitut mental, nos lo no laga asuntunan insignifikante kita nos atenshon. Nos lo hasi sigur ku nos ta sintá i atento durante henter e programa. Nos lo evitá di papia òf kana rònt innesesariamente i nos lo tene kuidou pa no distraí otro hende ku nos selular, pager, kámara di saka potrèt òf pa graba vidio.
4 Ora nos ta skucha e diskursonan, ta bon pa hasi anotashonnan kòrtiku pa yuda nos analisá kon e ruman ta desaroyá e tópiko. Nos mester konektá loke nos ta tende ku loke nos sa kaba. Esaki lo yuda nos komprendé e informashon i keda kòrd’é. Ora nos ta repasá nos anotashonnan, nos tin ku hasié ku e meta di apliká e informashon. Nos kada un ta hasi bon di puntra nos mes: ‘Ki efekto esaki tin riba mi relashon ku Yehova? Ki kambionan mi tin ku hasi den mi bida? Kon mi por apliká e informashon aki den e manera ku mi ta trata otro hende? Kon mi por us’é den sirbishi di fèlt?’ Kòmbersá ku otro hende tokante e puntonan ku mas nos a gusta. Hasiendo e kosnan aki lo yuda nos tene loke Yehova ta bisa ‘den nos kurason.’—Pro. 4:20, 21.
5 Laga Nos Apliká Loke Nos Siña: Despues di a asistí na un kongreso di distrito, un ruman a bisa: “E programa tabatin un karakter masha personal, i a motivá bo pa eksaminá loke tin den bo kurason i den kurason di e miembronan di bo famia, anto perkurá yudansa bíbliko ku amor, segun ta nesesario. El a hasi mi mas konsiente di mi obligashon pa duna mas yudansa na e kongregashon.” Probablemente hopi di nos a yega di sinti asina. Pero no ta basta pa nos djis bai for di kongreso ku e sintimentu di a ser edifiká i refreská. Hesus a bisa: “Si boso sa e kosnan aki, boso ta bendishoná si boso hasi nan.” (Huan 13:17) Nos tin ku hasi esfuerso pa pone na práktika e puntonan ku ta apliká na nos personalmente. (Fil. 4:9) Esei ta e klave pa satisfasé nos nesesidat spiritual plenamente.
[Picture on page 4]
Meditá Riba Loke Bo Tende:
[Picture on page 4]
■ Ki efekto esaki tin riba mi relashon ku Yehova?
■ Kon e ta influensiá e manera ku mi ta trata otro hende?
■ Kon mi por aplik’é den mi bida i den sirbishi di fèlt?