Programa Nobo di Dia Spesial di Asamblea
1 Miéntras ku medionan di komunikashon i edukadónan di mundu ta glorifiká rikesa material, e Palabra di Dios ta enkurashá nos pa “Ser Riku den Bon Obra.” (1 Tim. 6:18) Esei ta e tema di e programa di dia spesial di asamblea ku lo kuminsá for di sèptèmber 2002 padilanti. Ki animashon nos lo risibí na e asamblea aki?
2 E superintendente di sirkuito lo splika kiko ta nifiká “Ser Riku for di Dios Su Punto di Bista,” i lo e entrevistá algun ruman ku ta hasiendo esfuerso pa atkerí rikesa spiritual. Den su promé diskurso di e dia ei, e orador bishitante lo mustra kon e pueblo di Dios ta hasi “Bon Obra den e Tempu Aki di Kosecha.” E parti lo animá nos kada un pa konsiderá kon nos lo por partisipá mas plenamente den e trabou di kosecha ku Dios a manda nos hasi i ku ta tumando lugá awe.
3 Nos ta sinti nos masha kontentu ora nos mira hóbennan kristian ta sigui tras di rikesa spiritual. Esaki ta glorifiká Yehova i ta yuda e hóbennan pone un bon fundeshi pa futuro privilegionan di sirbishi. E parti “Elogiá Hóbennan pa Nan Bon Obranan den Alabá Yehova” lo enfatisá obranan ekselente ku hóbennan kristian lokal ta hasiendo.
4 Kiko ta e resultadonan di sigui tras di bon obra? E orador bishitante lo trata esaki den su último diskurso, “Sigui Hasi Bon Obra i Kosechá e Bendishonnan di Yehova.” Lo e konsiderá kuater área den kua nos por kosechá hopi bendishon: (1) komo persona individual, (2) komo famia, (3) komo kongregashon i (4) komo un organisashon mundial.
5 E personanan ku a hasi un dedikashon na Yehova lo tin oportunidat pa batisá. Si bo ta kla pa dal e paso ei, laga e superintendente presidente sa esei mesora.
6 Ora anunsiá e fecha di e asamblea pa bo kongregashon, plania bo asuntunan umbes pa bo por asistí. Hasi esfuerso pa yega trempan ya bo por partisipá den e kantika i orashon di apertura. Dor di ta presente i paga bon tinu durante henter e programa di e dia spesial di asamblea, nos lo ser fortalesé pa sigui un proseder ku ta hasi nos realmente riku for di e punto di bista di nos Dios, Yehova.