Bo Ta Hasiendo Bo Parti pa Nos Tin un Rapòrt Eksakto?
1 Hopi relato bíbliko ta inkluí sifranan spesífiko ku ta yuda nos haña un bista kla di loke a tuma lugá. Por ehèmpel, Gídeon a vense e kampamentu di Madian ku solamente 300 hòmber. (Hues. 7:7) E angel di Yehova a mata 185.000 sòldá asirio. (2 Rei. 19:35) Na Pentekòste di aña 33 di nos era, rònt di 3.000 persona a batisá, i djis despues e kantidat di kreyente a yega rònt di 5.000. (Echo. 2:41; 4:4) E relatonan aki ta mustra bon kla ku Dios su sirbidónan di pasado a hasi hopi esfuerso pa kompilá un registro kompletu i eksakto.
2 Awe Yehova su organisashon ta instruí nos pa tur luna nos raportá loke nos a hasi den sirbishi di vèlt. Ora nos ta koperá fielmente ku e areglo aki nos ta yuda e rumannan supervisá e trabou di prediká na un manera efikas. Kisas e rapòrtnan ta revelá ku un aspekto di sirbishi tin mester di atenshon òf ku tin mester di mas trahadó den algun parti di mundu. Den kongregashon, e rapòrtnan di sirbishi di vèlt ta yuda e ansianonan sa ta kua ta e rumannan ku tin potensial pa ekspandé nan sirbishi i tambe ta kua ta esnan ku tin mester di yudansa. Ademas, henter e hermandat kristian ta risibí animashon ora raportá e progreso di e predikashon di Reino. Abo ta hasiendo bo parti pa nos yega na un rapòrt eksakto?
3 Bo Responsabilidat Personal: Bo sa tin problema fin di luna pa kòrda kiko bo a hasi den sirbishi? Si ta asina, pakiko no skirbi kiko bo a hasi kada biaha ku bo sali den sirbishi? Tin publikadó ta usa un kalènder òf un agènda. Otronan ta usa un papel di rapòrt di sirbishi di vèlt bashí. Na fin di luna, entregá bo rapòrt umbes na bo superintendente di studio di buki. Òf si bo ta preferá, bo por pone bo rapòrt den e kaha di rapòrt na Salòn di Reino. Si bo a lubidá di entregá bo rapòrt, tuma kontakto mesora ku bo superintendente di studio di buki en bes di warda pa e tuma kontakto ku bo. Ora ku bo ta hasi esfuerso pa raportá bo aktividat debidamente, bo ta mustra rèspèt pa Yehova su areglo i konsiderashon amoroso pa e rumannan asigná pa kolektá i kompilá e rapòrtnan.—Luk. 16:10.
4 E Ròl di e Superintendente di Studio di Buki: Siendo un wardadó alerto i atento, e superintendente di studio di buki ta mustra interes den e aktividat di e grupo durante henter e luna. (Pro. 27:23) E ta bon na haltura si tur publikadó ta partisipando regularmente di un manera signifikativo i gososo i e ta kla pa duna yudansa si tin un publikadó ku no a sali henter luna. Podisé e tin ku djis duna e publikadó un palabra di animashon, un sugerensia práktiko òf invit’é pa kompañ’é den sirbishi di vèlt.
5 Na fin di luna, e superintendente di studio di buki ta hasi sigur ku tur publikadó den su grupo a kumpli ku nan responsabilidat di raportá nan aktividat ya asina pa dia seis di e siguiente luna e sekretario por manda pa sukursal un rapòrt di kongregashon ku ta eksakto. Ora fin di luna ta serka, lo por ta bon pa e superintendente duna su grupo un rekordatorio i perkurá ku tin papel di rapòrt disponibel na e sitio di studio di buki. Si tin ruman ta blo lubidá di yena i entregá rapòrt, e por duna nan e debido rekordatorio i animashon.
6 Ora nos ta entregá rapòrt di sirbishi di vèlt mesora na fin di luna, nos ta kontribuí na un rapòrt ku ta reflehá ku eksaktitut loke e rumannan a logra den vèlt. Abo lo hasi bo parti dor di yena i entregá bo rapòrt di aktividat umbes tur luna?