Kuminda Spiritual na Su Debido Tempu
1 “Lo mi yama e maishi i multiplik’é, i lo mi no trese hamber riba boso,” ta e ekspreshon di Señor Soberano Yehova. (Eze. 36:29) E palabranan profétiko aki ta apliká na Dios su pueblo awe. Den un manera simbóliko Yehova a perkurá pa e maishi ku ta sostené bida, sprùit na abundansia pa su pueblo. E kuminda spiritual oportuno ku nos ta haña na kongresonan di distrito ta un bon ehèmpel di esaki.
2 Na e kongreso di distrito ku nan a tene na Columbus, Ohio, na 1931, Yehova a dirigí su adoradónan pa aseptá un nòmber nobo: Testigunan di Yehova. (Isa. 43:10-12) Na 1935 e multitut grandi di Revelashon 7: 9-17 a ser identifiká korektamente. Na 1942 Ruman Knorr a duna e diskurso “Pas Por Dura?” E diskurso aki a duna un empuhe na e trabou mundial di prediká i a hiba na formashon di e Skol Bíbliko di Galaad di Watchtower. Ounke tabatin algun kongreso inolvidabel, kada un di nan tabata un mesa bon yená ku kuminda spiritual nutritivo i sirbí na e debido tempu.—Sal. 23:5; Mat. 24:45.
3 Bo Ta Kome Bon? Si nos no hasi esfuerso pa kome, por sosodé ku ounke nos ta yen di kuminda rònt di nos, tòg nos ta malnutrí. (Pro. 26:15) Den sentido spiritual, esei ta meskos. Rumannan a opservá ku na algun kongreso hopi hende ta kana bai bin sin tin nodi òf ta papia ku otro durante programa. Maske asosiashon edifikante ta un aspekto importante di e kongreso, e tempu pa esei ta promé i despues di kada seshon. (Ekl. 3:1, 7) Si nos no ta sintá na nos lugá i ta presta atenshon, puntonan importante por pasa nos forbei. Kisas de bes en kuando ta nesesario pa superintendentenan enkargá ku sierto departamentu na kongreso i rumannan ku tin asignashon, trata asuntunan di kongreso durante programa. Pero ora ku nan no ta atendiendo ku asuntunan di kongreso, nan mester pone un bon ehèmpel dor di presta atenshon na e programa. Ningun di nos por permití nos mes e luho di pèrdè nada di e kuminda spiritual ku Yehova ta perkurá.—1 Kor. 10:12; Fil. 2:12.
4 Nos ta disfrutá sinfin di e bèrdatnan spiritual nutritivo ku Yehova ta perkurá. Nan ta un kontraste grandi ku e doktrinanan falsu i sin nutrishon di kristiandat. (Isa. 65:13, 14) Un manera ku nos por mustra ku ‘nos ta gradisidu’ ta dor di konsiderá e kongreso komo un oportunidat pa laga Yehova siña nos. (Kol. 3:15) Wak mas ayá di e ruman hòmber ku ta duna e diskurso, i mira e mensahe komo un mensahe ku ta bini for di nos Magnífiko “Siñadó.” (Isa. 30:20, 21; 54:13) Presta pleno atenshon. Hasi anotashon breve di puntonan klave. Tur anochi, repasá e puntonan sobresaliente di e programa. Apliká loke bo a siña.
5 Tur kongreso ku tuma lugá promé ku Armagedón ta un derota pa Satanas! Sea ku tene e kongreso den un kampo di refugiado, den un pais asotá pa guera òf den un sirkunstansia mas pasífiko i ku un públiko mas grandi. Komo un hermandat uní, nos tin masha apresio pa oportunidatnan ku nos ta haña pa nos reuní komo un grupo grandi na kongresonan di distrito. (Eze. 36:38) Nos ta konvensí ku un biaha mas Yehova amorosamente lo perkurá pa nos haña “kuminda na su debido tempu.”—Luk. 12:42.
[Study Questions]
1. Kon Ezekiel 36:29 ta kumpli awe?
2. Kon Yehova a usa kongresonan di distrito pa sirbi kuminda spiritual na e debido tempu?
3. Kiko nos tin ku hasi pa benefisiá di e bankete spiritual na nos kongreso di distrito?
4. Kon nos por mustra ku nos ta gradisidu pa e abundansia di kuminda spiritual ku Yehova ta perkurá?
5. Ki motibunan pa alegrá kongresonan di distrito ta duna nos?
[Box on page 4]
Mustra Apresio pa e Mesa di Yehova
◼ Presta pleno atenshon
◼ Hasi anotashon di puntonan klave
◼ Tur anochi, repasá puntonan sobresaliente di e programa
◼ Apliká loke bo siña