Parti 2—Kon pa Kondusí Studio di Beibel Progresivo
Prepará pa Kondusí e Studio
1 Siña hende na un manera efikas ora nos ta kondusí un studio di Beibel no ta enserá solamente konsiderá e informashon i buska e tekstonan ku ta ser menshoná. Nos mester presentá e informashon na un manera ku ta motivá kurason di e studiante. Pa logra esaki, nos tin ku prepará kuidadosamente ku e studiante na mente.—Pro. 15:28.
2 Kon pa Prepará: Pa kuminsá, hasi orashon na Yehova tokante e persona i su nesesidatnan. Pidi Yehova yuda bo alkansá kurason di e studiante. (Kol. 1:9, 10) Pa bo haña un bon komprondementu di e tema, tuma un tiki tempu pa pensa riba e título di e kapítulo òf e lès, e suptemanan i kualke otro kos manera plachi òf ilustrashon ku tin den e lès. Puntra bo mes: ‘Kiko ta e propósito di e informashon?’ Esaki lo yuda bo enfoká riba e puntonan prinsipal segun ku bo ta kondusí e studio.
3 Repasá e informashon kuidadosamente di paragraf pa paragraf. Buska e kontestanan pa e preguntanan imprimí, i marka solamente e palabra- i frasenan klave. Analisá ki relashon e tekstonan menshoná tin ku e puntonan prinsipal den e paragraf, i disidí kua di nan bo ta bai lesa durante e studio. Podisé lo bo ripará ku ta útil pa hasi algun anotashon breve den márgen di e publikashon. E studiante mester komprondé bon kla ku loke e ta siñando ta bini di e Palabra di Dios.—1 Tes. 2:13.
4 Adaptá e Lès na e Persona: Despues konsiderá e lès ku e studiante en partikular ei na mente. Purba antisipá su preguntanan i e puntonan ku lo e tin difikultat pa komprondé òf aseptá. Puntra bo mes: ‘Kiko e tin ku komprondé òf traha riba dje p’e por progresá spiritualmente? Kon mi por alkansá su kurason?’ Anto, adaptá bo manera di siña na armonia ku e kontestanan ku bo haña. Tin bes, lo bo tin ku prepará un ilustrashon, un splikashon òf un seri di pregunta pa yuda e studiante kapta e nifikashon di un sierto punto òf teksto. (Neh. 8:8) Pero evitá di bin ku informashon adishonal ku no ta kontribuí masha na e tema. Un repaso breve na final dje studio lo yuda e studiante kòrda e puntonan prinsipal.
5 Nos ta sinti un goso profundo ora esnan nobo ta duna fruta di hustisia pa e alabansa di Yehova! (Fil. 1:11) Pa yuda nan alkansá e meta ei, prepará bon kada bes ku bo ta bai kondusí un studio di Beibel.