Parti 4:—Kon pa Kondusí Studio di Beibel Progresivo
Siña Studiantenan Prepará
1 Hopi bes un studiante ku ta lesa e lès di antemano, ta marka e kontestanan i ta pensa kon pa ekspresá nan ku su mes palabra ta hasi progreso spiritual mas lihé. P’esei, unabes ku un persona ta studia regularmente, prepará un lès huntu kuné pa e haña un idea ta kon e por hasi esei. Den mayoria kaso lo ta benefisioso pa prepará henter un kapítulo òf lès huntu kuné.
2 Marka i Anotashon: Splika kon pa haña kontesta direkto pa e preguntanan di e paragraf. Mustra e studiante bo propio publikashon di studio den kua bo a hala strepi òf marka solamente e palabranan òf frasenan klave. Segun ku boso ta konsiderá e informashon, kisas lo e ke sigui bo ehèmpel i marka solamente loke ta nesesario den su mes publikashon pa yud’é kòrda e kontesta. (Luk. 6:40) Despues pidié pa duna e kontesta ku su mes palabra. Esei lo yuda bo mira kon bon e ta komprondé e informashon.
3 Un eksaminashon kuidadoso di tekstonan ku no ta sitá den e paragraf ta un parti importante di e studiante su preparashon pa e studio. (Echo. 17:11) Yud’é mira ku kada teksto menshoná ta apoyá un punto den e paragraf. Mustr’é kon pa hasi anotashon kòrtiku den márgen di su publikashon di studio. Enfatisá ku Beibel ta e base di loke e ta siña. Anim’é pa hasi uso libremente di e tekstonan menshoná den su komentarionan durante e studio.
4 Bista General i Repaso: Promé ku e studiante kuminsá su preparashon detayá di e informashon, lo ta benefisioso p’e haña un idea general di e tema. Mustr’é ku e por haña un idea de ke se trata dor di brevemente eksaminá e título di e kapítulo, suptemanan i plachinan. Splik’é ku na final di su preparashon lo ta sabí pa e tuma un ratu pa repasá e puntonan prinsipal di e lès; si tin un sekshon di repaso kisas lo e por hasi uso di esei. Di e manera ei lo e por keda kòrda e informashon.
5 Dor di siña un studiante prepará bon pa su studio, bo ta yud’é pa e por duna bon komentario na e reunionnan di kongregashon. Tambe esei lo yud’é desaroyá kustumbernan di studio ku lo benefisi’é pa hopi tempu despues ku bo a kaba di studia kuné.