Kaha di Pregunta

◼ Kon ta e mihó manera pa duna kontribushon na benefisio di rumannan den nesesidat ku ta biba den otro pais?

Tin biaha nos ta tende di rumannan den otro pais ku ta pasando den nesesidat material pa motibu di persekushon, desaster òf otro sirkunstansianan difísil. Tin ruman a sinti nan konmoví pa manda fondo direktamente pa e sukursal den e paisnan ei i a pidi pa e fondo wòrdu usá pa yuda sierto persona, un kongregashon en partikular òf un proyekto di konstrukshon spesífiko.—2 Kor. 8:1-4.

Ounke tal interes amoroso pa otro rumannan ta digno di elogio, hopi bes tin nesesidatnan ku tin mas urgensia ku lokual esun ku a hasi e kontribushon tin na mente. Den algun kaso, ya a atendé e nesesidat ei kaba. Naturalmente, nos por ta sigur ku e kontribushonnan ku nos ta manda na e sukursal lokal pa e obra mundial, e Fondo di Salòn di Reino òf pa yuda den tempu di desaster, lo ser usá manera esun ku a hasi e kontribushon a spesifiká.

E rumannan na tur e sukursalnan a haña entrenamentu ekstensivo pa sa kon pa atendé nesesidatnan inesperá mesora. Den tur kaso, e sukursal ta mantené Kuerpo Gobernante na haltura di loke ta pasando. Si yudansa èkstra ta nesesario, Kuerpo Gobernante kisas ta pidi sukursalnan den bisindario pa yuda òf podisé e ofisina prinsipal lo por manda fondo direktamente pa nan.—2 Kor. 8:14, 15.

Pues anto, mester manda tur kontribushon pa e obra mundial, pa proyektonan di konstrukshon den otro pais òf pa duna yudansa den tempu di desaster, na e sukursal den e pais kaminda bo ta biba, sea via di e kongregashon òf direktamente. Di e forma aki, “e esklabo fiel i prudente” mediante areglonan organisatorio establesí dor di Kuerpo Gobernante, ta perkurá pa e nesesidatnan di e hermandat mundial den un manera ordená.—Mat. 24:45-47; 1 Kor. 14:33, 40.