Persistí den e Trabou di Prediká
1 Nos ta bibando den un tempu trabahoso. Konfliktonan sivil, guera étniko, desasternan natural i otro susesonan horibel ta kos di tur dia. Awor mas ku nunka e famia humano tin mester di bon notisia. Sin embargo, hende en general ta indiferente pa ku kosnan spiritual. Den algun área por ta difísil pa haña hende na kas i ta asta mas duru ainda pa haña hende ku ke skucha nos òf ku ke studia Beibel. Apesar di esei, ta di sumo importansia pa nos persistí den e predikashon di e evangelio òf bon notisia di Dios su Reino establesí.—Mat. 24:14.
2 Amor pa Hende: Nos predikashon ta hala atenshon na Yehova su amor pa hende. E “no kier pa ningun hende bai pèrdí, ma pa tur bin na repentimentu.” (2 Ped. 3:9; Eze. 33:11) P’esei el dekretá ku, manera Hesus a bisa, “e evangelio mester wòrdu prediká promé na tur nashon.” (Mar. 13:10) Dios ta hasi un apelashon na hende pa nan akudí na dje i asina skapa di e binidero huisio riba e mundu di Satanas. (Joel 2:28, 29, 32; Sof. 2:2, 3) Nos no ta gradisidu ku Yehova a brinda nos e oportunidat ei?—1 Tim. 1:12, 13.
3 E rapòrt mundial ta mustra ku durante e aña di sirbishi 2004, tur luna publikadónan a kondusí un promedio di 6.085.387 estudio di Beibel, i ku un promedio di mas o ménos 5.000 disipel nobo a batisá tur siman! Algun di e personanan resien batisá aki ta resultado di Yehova su bendishon riba e esfuerso persistente ku publikadónan a hasi pa papia ku tur hende den nan teritorio asigná. Esaki a duna e kongregashonnan masha goso, i ta ki un privilegio pa ta kolaboradó di Dios den e trabou ku ta salba bida aki!—1 Kor. 3:5, 6, 9.
4 Alabá e Nòmber di Dios: Nos ta persistí den e trabou di prediká pa asina nos alabá Yehova públikamente i santifiká su nòmber dilanti humanidat kompletu. (Heb. 13:15) Satanas a gaña “henter mundu” dor di laga nan kere ku Dios no por solushoná e problemanan di humanidat, ku e no tin kunes ku hende ta sufri, òf simplemente ku Dios no ta eksistí. (Rev. 12:9) Mediante nos predikashon nos ta defendé e bèrdat tokante nos magnífiko Tata selestial. Laga nos sigui alabá su nòmber awor i pa semper.—Sal. 145:1, 2.