Hala Atenshon na “e Lus di Mundu”

¹ Mediante profeta Isaias, Yehova a profetisá: “E pueblo ku ta kana den skuridat lo mira un gran lus; esnan ku ta biba den un tera skur, un lus lo lusa riba nan.” (Isa. 9:2) Hende a mira e “gran lus” ei den e obranan di Dios su propio Yu, Hesukristu. E trabou ku el a hasi aki riba tera i e bendishonnan ku su sakrifisio a trese kuné a mehorá e kondishon spiritual di e personanan ku tabata den skuridat. Ta e lus ei hende tin mester awe den e tempu di skuridat aki. E Sena di Señor ta un oportunidat spesial pa nos hala atenshon na “e lus di mundu.” (Juan 8:12) Aña pasá, miónes di hende a desplegá sierto grado di fe dor di djòin nos den obedesé e mandato aki di Hesus: “Hasi esaki na mi rekuerdo.” (Luk. 22:19) Awor, segun ku e konmemorashon di Memorial di e aña aki ta aserkando, kon nos por hala hende su atenshon na e gran lus ku Yehova a laga bria?—Fil. 2:15.

² Kultivá Apresio Sinsero: E temporada di Memorial ta un bon tempu pa meditá riba e gran amor ku Yehova i Hesus a desplegá dor di a perkurá e sakrifisio di reskate pa humanidat. (Juan 3:16; 2 Kor. 5:14, 15) Dor di hasi esei, sin duda nos lo haña mas apresio pa e okashon sagrado aki. Ta bon pa tur sirbidó di Dios apartá tempu pa lesa i meditá riba e pasashinan di Beibel pa e temporada di Memorial ku nos ta haña den e foyeto Eksaminando e Skritura Diariamente. Ora nos pensa riba Yehova su kualidatnan sin igual ku a keda reflehá na un manera magnífiko den e reskate ku el a perkurá, nos ta sinti nos orguyoso ku e ta nos Dios. Dor di reflekshoná riba loke e reskate ta nifiká pa nos kada un personalmente, nos amor sinsero pa Dios i su Yu ta bira mas profundo i esaki ta motivá nos pa hasi nos bèst pa kumpli ku Dios su boluntat.—Gal. 2:20.

³ Si nos profundisá nos apresio pa e areglo di salbashon ku Yehova a perkurá, nos entusiasmo pa e Memorial lo tin su efekto riba nos studiantenan di Beibel, rebishita-, famia- i bisiñanan, kompañeronan di skol i trabou i otro hendenan ku nos invitá pa e okashon spesial aki. (Luk. 6:45) P’esei, laga nos hasi un esfuerso spesial pa invitá tur e hendenan ei, duna nan un papel di invitashon pa Memorial ku por sirbi komo un rekordatorio pa nan. Hopi publikadó a realisá ku ta bon pa traha un lista di hende ku regularmente nan ta invitá pa no lubidá ningun, i tur aña nan ta agregá personanan nobo. Nan ta traha na un manera organisá i ta hasi tur loke nan por pa invitá personanan interesá. Esei lo ta un ekselente manera pa nos ekspresá nos gratitut na Yehova Dios “pa su don ineksplikabel.”—2 Kor. 9:15.

⁴ Dediká Mas Tempu den Sirbishi: Bo por partisipá mas den sirbishi durante e lunanan di mart i aprel? Si bo hasi esfuerso pa kompartí ku otro hende “e evangelio di e gloria di Kristu,” lo bo tin Dios su bendishon sigur. Yehova, komo e Fuente di tur lus spiritual, a bisa: “Lus lo resplandesé for di skuridat.” (2 Kor. 4:4-6) Si ta nesesario, ansianonan lo hasi areglo pa tene reunionnan pa sirbishi di vèlt na ora- i lugánan adishonal pa asina apoyá publikadónan ku ke prediká mas tantu. Esaki por enserá predikashon riba kaya mainta trempan òf areglonan pa prediká den teritorio di negoshi i pa duna testimonio via telefòn parti atardi òf promé ku nochi sera. Pone un meta rasonabel di ora i traha pa bo alkans’é; esei lo ta un yudansa pa oumentá bo partisipashon den e ministerio. Pa hopi ruman, duna Yehova lo mihó ta inkluí aseptá e privilegio di sirbi komo pionero ousiliar.—Kol. 3:23, 24.

⁵ Bo Por Traha Komo Pionero Ousiliar? Ya ta mas ku shete aña kaba ku e rekisito di ora pa pionero ousiliar a baha. E ahuste aki a hasi posibel pa hopi mas ruman eksperensiá e bendishonnan di e sirbishi di pionero ousiliar. Abo a purb’é? Algun ruman tin e kustumber di hasié tur aña. Den hopi kongregashon vários publikadó ta traha pionero ousiliar huntu, i esaki ta bira un aktividat sobresaliente i satisfasiente di e kongregashon durante e aña. Bo por programá bo kosnan di tal manera ku bo por sirbi komo pionero ousiliar durante un luna yen di goso den e temporada di Memorial? Pa algun ruman foral aprel lo ta un bon luna ya ku e tin sinku fin di siman kompletu.

⁶ E superintendente di sirkuito ta programá pa bishitá boso kongregashon durante mart òf aprel? Ata otro bendishon ku bo por haña. Manera a ser anunsiá anteriormente, durante e aña di sirbishi 2006, tur ruman ku traha komo pionero ousiliar durante e luna di bishita di e superintendente di sirkuito ta haña invitashon pa asistí na e promé parti di e reunion ku pioneronan durante e siman di e bishita. Sin duda, e informashon spiritualmente edifikante ku ta ser proveé na e reunion aki lo stimulá hopi pionero ousiliar pa pone e meta pa bira pionero regular. Ademas, durante e luna di mart nos lo tin e goso di yuda hende bini den e lus spiritual mediante e buki di estudio nobo Kiko Beibel Ta Siña Realmente? Pakiko no pone e meta pa kuminsá un estudio di Beibel den e buki nobo?

⁷ Segun ku bo ta pensa riba e rekisito di 50 ora pa pionero ousiliar, purba hinka un programa den otro ku lo permití bo laga lus di e bèrdat bria mas o ménos 12 ora pa siman. Papia ku rumannan ku tabatin éksito den esaki kaba i tambe ku otro rumannan ku no a hasié ainda. Esaki kisas ta animá nan pa djòin bo. Publikadónan batisá, hóben i bieu, a ripará ku e bunita meta aki no ta difísil pa logra, basta bo tin un bon programa. Hasi orashon tokante e asuntu. Anto, si ta posibel, plania bo kosnan, i disfrutá di e sirbishi di pionero ousiliar!—Mal. 3:10.

⁸ Hopi famia a realisá ku koperashon di henter famia por hasi posibel ku por lo ménos un miembro di e famia por logra e meta aki. Un famia a disidí ku tur e sinku miembronan batisá lo a traha komo pionero. E dos otro muchanan ku no tabata batisá ainda a hasi un esfuerso spesial pa oumentá nan aktividat. Ki benefisio e famia a saka dor di e esfuerso èkstra aki? Nan a skirbi: “Tabata un luna masha dushi mes. Nos a sinti ègt ku nos relashon di famia a bira mas fuerte. Nos ta gradisí Yehova pa e bendishon maravioso aki!”

⁹ Nos aktividat spesial durante e lunanan di mart i aprel lo stimulá nos i hala nos mas serka nos Tata selestial? Hopi ta dependé di e esfuerso ku nos kada un lo hasi pa profundisá nos amor pa Dios i su Yu i tambe pa oumentá nos sirbishi. Laga nos tin e mesun determinashon ku e salmista ku a kanta: “Ku mi boka lo mi duna masha hopi gradisimentu na SEÑOR, i meimei di e multitut lo mi alab’é.” (Sal. 109:30) Yehova lo bendishoná nos aktividat seloso durante e temporada aki di Memorial. P’esei, laga nos permití nos gran lus bria pa asina mas hende por sali for di skuridat i poseé “e lus di bida.”—Juan 8:12.

[Study Questions]

1. Di kua gran lus e Palabra di Dios a profetisá, i ki okashon ta hala atenshon spesial na e lus aki?

2. Kon nos apresio sinsero pa e sakrifisio di reskate por bira mas profundo, i kiko lo ta e resultado?

3. Kon nos por demostrá nos apresio pa Memorial?

4. Kiko por yuda nos oumentá nos partisipashon den e ministerio durante e lunanan di mart i aprel?

5. Kon hopi ruman ta probechá dje echo ku e rekisito di ora pa pionero ousiliar a baha?

6. Ki areglo nobo lo bai duna hopi estímulo?

7, 8. (a) Kiko por yuda nos traha un programa pa sirbi komo pionero ousiliar? (b) Kon koperashon di miembronan di famia por yuda, i kon henter e famia ta benefisiá?

9. Kon nos por laga nos lus bria durante e temporada aki di Memorial?