Kaha di Pregunta
◼ Kiko ta e peligernan di komuniká via Internet ku un persona ku bo no konosé?
Tin hopi website ku ta diseñá pa hende por topa i komuniká ku otro via Internet. Hopi di e sitenan aki ta duna hende oportunidat pa krea i publiká nan propio “profile” (un resúmen di nan biografia) den kua nan por pone potrèt i otro informashon personal. E ora ei, hende ku wak e profile por tuma kontakto ku nan. E websitenan ei ta masha popular entre hóbennan, i algun hóben den e kongregashon ta usa nan pa komuniká ku personanan ku ta pretendé di ta Testigu di Yehova.
Ta fásil pa un persona ku nos topa via Internet gaña tokante su identidat, su relashon ku Yehova òf su motibunan. (Sal. 26:4) Por sosodé ku un persona ku ta pretendé di ta Testigu di Yehova ta resultá di ta un inkrédulo, un persona ekspulsá òf asta un apóstata aktivo. (Gal. 2:4) Informenan ta mustra ku hopi pedofil ta usa e tipo di websitenan ei pa haña nan víktimanan.
Asta si nos ta konvensí ku e personanan ku nos ta komuniká kuné tin un bon reputashon den e kongregashon, kòmbersashonnan via Internet por desviá fásilmente bai riba tópikonan insaludabel. Esei ta asina pasobra hende tin e tendensia di ta ménos restringí ku hende ku nan no a topa personalmente. Ademas, nan por konsiderá komunikashon “on-line” komo algu privá i ta pensa ku loke nan bisa nunka lo yega na orea di otro hende manera nan mayornan òf e ansianonan. Lamentablemente, vários hóben ku ta bini di hogarnan kristian a kai den e trampa ei i a partisipá den kòmbersashonnan vulgar. (Efe. 5:3, 4; Kol. 3:8) Otronan a inkluí den nan profile, potrètnan seksualmente provokativo di nan mes, beinam indesente òf “link” ku ta konektá bo ku websitenan kaminda tin videoclipnan ku ta presentá asuntunan seksual ku luho di detaye.
En bista di tur esei, mayornan mester vigilá pa nan sa kon nan yunan ta usa kòmpiuter. (Pro. 29:15) Lo ta peligroso si nos invitá un hende straño den nos kas òf permitié keda su so ku nos yunan. Di mes manera, ta peligroso pa nos òf nos yunan sera amistat via Internet ku hende ku nan no konosé, asta ora e hendenan aki ta pretendé ku ta Testigu di Yehova nan ta.—Pro. 22:3.