Programa Nobo pa Dia Spesial di Asamblea

Tema di e programa pa dia spesial di asamblea pa aña di sirbishi 2009 ta “Paga Atenshon na e Ministerio . . . , pa Bo Kumpli Kuné,” ku ta basá riba Kolosensenan 4:⁠17. Komo kristian, nos ta tuma e ekshortashon ei masha na serio. Meskos ku Hesus, nos meta ta pa kumpli fielmente ku nos ministerio. (Juan 17:⁠4) Apòstel Pablo tambe tabata un ekselente ehèmpel pa nos den esaki. E tabata determiná pa terminá su kurso den e ministerio.​—⁠Echo. 20:⁠24.

E diskurso di e superintendente di sirkuito lo mustra kon vários publikadó ta vense opstákulo den nan ministerio. Despues e diskurso titulá “Kultivá Loke Bo A Planta” lo enfatisá kon nos por ègt yuda hende ku tin e “disposishon korekto pa bida eterno.” (Echo. 13:⁠48, NW ) Promé, e oradó bishitante lo trata 2 Korintionan 6:​1-10, versíkulo pa versíkulo, den e diskurso “Kon Nos Ta Rekomendá Nos Mes Komo Sirbidónan.” Parti atardi, lo e papia ku e presentenan riba e tema “Mustra Gran Apresio pa Bo Ministerio.” Sin duda e diskursonan “Hóben i Bieu Ta Disfrutá di e Ministerio” i “Hóbennan Ku Ta Kumpli ku e Ministerio,” lo ta animante. Esnan ku ta deseá di simbolisá nan dedikashon na Dios mediante boutismo na un di e asambleanan binidero mester informá e superintendente presidente mas pronto posibel. Un parti importante na tur nos asambleanan i kongresonan ta e konsiderashon di E Toren di Vigilansia. Bin ku e ehemplar ku nos lo studia e siman di e dia spesial di asamblea.

Ora nos ta paga atenshon pa kumpli ku nos ministerio, nos lo sòru pa otro interes- i aktividatnan no kita tempu for di loke Yehova a konfia na nos. E animashon bíbliko ku nos ta haña for di e dia spesial di asamblea lo yuda kada un di nos komprondé kiko nos tin ku hasi pa keda enfoká riba e ministerio i analisá kiko nos ta hasiendo den sirbishi pa asina kumpli plenamente kuné.