Kaha di Pregunta

◼ Nos mester usa Internet pa prediká òf pa studia ku hende deskonosí ku ta biba na otro pais?

Algun publikadó ta usa Internet pa ofresé estudio di Beibel na hende ku ta biba den paisnan kaminda nos obra ta restringí òf kaminda no tin hopi publikadó. Den algun kaso, nan tabatin bon resultado. Sinembargo, ta peligroso pa publikadónan chat òf interkambiá e-mail ku hende deskonosí. (Wak Nos Ministerio di Reino di yüli 2007, pág. 3..) Aunke nos intenshon ta pa alkansá hende sinsero ku e mensahe di Reino, rumannan ku ta kòmbersá ku hende deskonosí por haña nan ku mal kompania, inkluso ku hende apóstata. (1 Kor. 1:19-25; Kol. 2:8) Ademas, na paisnan kaminda nos obra ta restringí òf prohibí, outoridatnan por inspekshoná korespondensia. Esaki por pone e rumannan ku ta biba einan na peliger. P’esei, nos no mester bai riba Internet pa buska hende di otro pais pa prediká e bon notisia na nan.

A ménos ku e sukursal lokal duna otro instrukshon, si nos prediká informalmente na un hende deskonosí ku ta di bishita for di un otro pais, nos no mester sigui kultivá su interes despues ku e regresá su pais. Mas bien, nos por mustr’é kon e por usa jw.org pa haña mas informashon i kon pa drenta den kontakto ku e sukursal na su pais. Nos por anim’é pa bishitá un Salòn di Reino kaminda e ta biba. Klaru ku tin pais kaminda no tin Salòn di Reino. Si e ta deseá pa Testigunan di su área bishit’é, nos tin ku yena e formulario Por Fabor Atendé (S-43) i duna esaki na e sekretario, kende na su turno lo manda esaki sukursal via jw.org. E sukursal ku ta supervisá e obra den e pais kaminda e hende interesá ta biba ta den mihó posishon pa dun’é e yudansa spiritual, ya ku e sukursal konosé e sirkunstansianan di e pais.—WakNos Ministerio di Reino di yüni 2014, pág. 7, i esun di novèmber 2011, pág. 2..

Si un hende ku nos ta rebishitá aktualmente ta muda pa otro pais òf si nos ta studia aktualmente ku un hende ku ta biba den eksterior i ku nos konosé solamente via Internet, nos mester dal e pasonan ku nos a lesa den e paragraf anterior. Sinembargo, nos por sigui kultivá su interes te ora un publikadó lokal tuma kontakto kuné. Pero si e ta biba na un pais kaminda nos obra ta restringí òf prohibí, nos mester ta sumamente kouteloso ora nos ta trata temanan bíbliko via karta, telefòn òf medionan elektróniko.—Mat. 10:16.