Kaha di Pregunta

◼ Dikon ta mihó pa asistí na e kongregashon ku tin e teritorio kaminda nos ta biba?

Un kongregashon ta un areglo pa medio di kua nos ta risibí animashon i ta ser ‘stimulá pa stima i hasi bon obra.’ (Heb. 10:24, 25) Pa medio di nos kongregashon nos ta siña e bèrdat i nos ta ser ekipá pa kumpli ku nos tarea di hasi disipel. (Mat. 28:19, 20) Tambe nos ta ser fortalesé pa enfrentá prueba ku éksito, i nos ta risibí yudansa di superintendentenan amoroso pa nos por logra enfrentá e preshonnan i ansiedatnan ku ta bira dia pa dia mas tantu. Klaramente, nos kongregashon ta vital pa nos sobrebibí den sentido spiritual. Pero, tin bentaha si nos asistí na e kongregashon ku tin e teritorio kaminda nos ta biba?

Kada ken su sirkunstansia ta diferente, i tin sierto faktornan ku por afektá e desishon ku nos lo tuma relashoná ku esaki, manera trabou, un kasá ku no ta kreyente, òf transportashon. Pero sigur-sigur tin bentaha, tantu spiritual komo di otro tipo, si un hende asosiá ku e kongregashon ku tin e teritorio kaminda e ta biba. Den kaso di un emergensia, e ansianonan lo por drenta mas lihé den kontakto ku tur publikadó. Algun Kaha di Pregunta den pasado a yega di hala atenshon na vários otro bentaha.—Na spañó, mei 1991; na spañó, òktober 1978 [na ingles, mart 1976], i na ingles, yanüari 1967.

Hopi bes ta mas kumbiniente pa asistí na reunion serka di kaminda bo ta biba, pasobra bo por yega mas trempan i haña sufisiente tempu pa papia ku otronan, atendé kualkier asuntu nesesario, i partisipá den e kantika di apertura. Ora tin hende interesá ta biba den nos besindario, hopi bes ta mas fásil pa nos drenta den kontakto ku nan, dirigí studio di Beibel ku nan, i yuda nan asistí na e reunionnan ku mas ta kumbiní nan.

Nos ta konfia ku kabesnan di kas lo konsiderá e asuntu aki ku orashon, i tuma na kuenta tur faktor enbolbí pa disidí kiko ta mihó pa e bienestar spiritual i físiko di nan famia.—1 Tim. 5:8.