Kon Hende A Kuminsá Eksistí?

Génesis, e promé buki di Beibel, ta splika ku poko palabra kon e universo a kuminsá eksistí: “Na prinsipio Dios a krea e shelunan i tera.” (Génesis 1:1) Despues ku Dios a krea mata ku bestia, el a krea e promé hendenan, Adam ku Eva. Nan tabata diferente for di bestia pasobra Dios a duna nan e kualidatnan ku e mes ta poseé, inkluso boluntat liber. Pues, Adam ku Eva tabata responsabel pa nan akshonnan. Si nan a obedesé e instrukshonnan di nan Kreador, nan lo por a forma parti di e propósito ku Dios tabatin pa nan. Sí, nan lo a bira e mayornan di un famia humano universal ku lo a disfrutá pa semper di bida pasífiko i perfekto riba tera.

Ma un sierto angel a mira esei komo sú chèns pa laga hende sirbi mas bien su interes egoista. Asina el a bira Satanas, ku ta nifiká “Opositor.” El a usa un kolebra pa gaña Eva, bisand’e ku lo a kumbinié si el a rechasá e guia di Dios. Adam ku Eva a bai tras di Satanas i asina nan a bira lomba pa nan Kreador. Debí na e mal desishon akí, nos promé mayornan a pèrdè e posibilidat di biba pa semper, i nan a pasa piká, imperfekshon i morto pa nos tur.

Mesora Dios a ekspresá su intenshon di drecha e situashon lamentabel akí i duna e yunan di Adam e posibilidat di biba pa semper. El a profetisá ku un “simia”—un persona spesial—lo destruí Satanas i kita tur sufrimentu ku Satanas, Adam i Eva a kousa. (Génesis 3:15) Ken lo a bira e “simia,” òf desendiente, ei? Tempu lo a mustra esei.

Mientrastantu, Satanas a sigui purba di stroba e propósito di Dios kumpli. Piká i maldat a plama masha lihé. Anto Dios a disidí di destruí hende malbado pa medio di un diluvio. El a instruí e hòmber hustu Noe pa traha un arka—un kaha grandi ku por a drif—pa skapa su mes i su famia huntu ku e bestianan ku Dios a bis’é pa hinka den e arka.

Un aña despues di e Diluvio, Noe i su famia a sali for di e arka pa biba riba un tera limpi. Pero e ‘desendiente’ mester a bini ainda.

​—Basá riba Génesis kapítulo 1-11; Hudas 6, 14, 15 i Revelashon 12:9.