Bo Tabata Sa?

Kon bini Esteban por a keda asina kalmu ora ku nan tabata persiguié?

ESTEBAN tabata pará dilanti di un grupo di hòmber hostil. Komo miembro di Sanedrin, e korte di mas haltu den Israel, e grupo di e 71 huesnan ei tabata entre e hòmbernan di mas poderoso den e pais. Sumo Saserdote Kaifas, kende a dirigí e korte ku a sentensiá Hesus na morto algun luna promé, a reuní e hòmbernan ei. (Mat. 26:57, 59; Echo. 6:8-12) Segun ku nan tabata bini ku akusadónan falsu un tras di otro, nan a nota algu straño tokante Esteban: su kara tabata mustra trankil “manera kara di un angel.”—Echo. 6:13-15.

Kon bini Esteban por a keda kalmu i trankil den un situashon asina kaminda nan tabata intimid’é? Promé ku nan a lastra Esteban hiba dilanti di Sanedrin, e tabata kompletamente okupá ku su trabou di prediká ku yudansa di e spiritu santu di Dios. (Echo. 6:3-7) Ora Esteban tabata dilanti di korte, e mesun spiritu ei a konsol’é i yud’é kòrda kos. (Huan 14:16, nota.) Segun ku Esteban tabata defendé e bèrdat ku kurashi, manera ta registrá na Echonan kapítulo 7, spiritu santu a yud’é kòrda mas ku 20 pasashi di e Skritura Hebreo. (Huan 14:26) E fe di Esteban a bira mas fuerte ainda ora el a risibí un vishon kaminda el a mira Hesus pará na man drechi di Dios.—Echo. 7:54-56, 59, 60.

Kisas un dia nos tambe por haña nos ku menasa i persekushon. (Huan 15:20) Sí nos ta alimentá nos mes regularmente ku e Palabra di Dios i ta aktivo den e sirbishi di vèlt, nos ta laga e spiritu di Yehova obra den nos. Tambe nos lo tin e forsa pa wanta oposishon miéntras ku nos ta mantené nos pas mental.—1 Ped. 4:12-14.