Kaha di Pregunta

◼ Ken mester yena e petishon pa haña literatura òf un bishita?

Generalmente nos publikashonnan tin un espasio kaminda hende por yena nan datonan i manda esaki pa sukursal pa pidi literatura òf pa haña un bishita di Testigunan di Yehova. Tambe via nos website www.watchtower.org un persona por manda un petishon pa haña un estudio di Beibel. E métodonan akí di manda petishon ta yuda hopi hende siña e bèrdat. Sinembargo, algun problema a surgi na momento ku publikadónan a manda petishon pa asina nan famia òf otro hende por haña literatura òf yudansa spiritual.

Tabatin kaso kaminda sukursal a haña petishon pa manda literatura pa hende ku no a deseá esei. Algun di nan a reklamá ku nos organisashon ta molestiá hende i ku nan tin e impreshon ku nan nòmber ta riba un lista di abonado. Publikadónan ku a risibí un petishon pa bishitá un hende ku no a pidi pa haña un bishita, a haña nan den un situashon masha ferfelu ora e persona a bira masha iritá. P’esei, publikadónan no mester yena petishon pa manda literatura òf pa bishitá otro hende; mas bien, ta e persona interesá tin ku pidi pa haña literatura òf un bishita. Generalmente, sukursal lo no prosesá un petishon ora e nota ku ta un publikadó a manda e petishon pa tuma kontakto ku un persona interesá.

Kon anto nos por yuda un famia òf un konosí spiritualmente? Si bo ke pa e persona haña literatura, dikon no mand’é p’e komo un regalo? Si el a bisa bo ku e ta interesá i ke un bishita di Testigunan, pero bo no sa kon pa drenta den kontakto ku e ansianonan di e kongregashon den su bisindario, bo mester yena e formulario Por Fabor Atendé (S-43) i entreg’é na e sekretario di bo kongregashon, kende lo kontrol’é i mand’é sukursal. Pero, si e persona interesá ta den prizòn, den un sentro di reabilitashon òf den hospital nos, no mester tuma kontakto ku sukursal pa pidi pa manda literatura òf bishitá e persona. Den un kaso asina, bo por animá e persona pa tuma kontakto ku rumannan ku sa bishitá hende interesá den e institutonan akí òf pa e mes skirbi sukursal.