A Rokui el Ungil el Chad Te Mo er a Eanged?
SEL kesus er a uchei er a lemad a Jesus e ngtilbir el mo er a rechapostol er ngii er a uriul er a lomesoil el kmo, ngmo mengetmokl er a basio er tir er a eanged. Ngdilu el kmo: “A blil a Demak a betok a blil a delengchokl er ngii; le kmo ngdiak le uaisei e ak mla subedemiu. E ngak a mong el mo mengedmokl er sel kiriu.” (Johanes 14:2) Ngera uchul me a Jesus a mo mengetmokl er a basio er tir er a eanged? Ngera te mo meruul er ngii er sei?
A Jesus a mla oterekeklii er a uldesuel a ileakl el ureor el kirir a redisaiplo er ngii. Ngar er tia el osisiu el kesus, e ngdilu el kmo: “Kemiu tirikel dimleblechoel lobengkek era ikel ongarm el mer ngak; misei a ak mo oterekeklii er kemiu chomengedereder ra renged, el ua Demak el ulterekeklii er ngak.” (Lukas 22:28, 29) A Dios a tilbir el mo er a Jesus el kmo, ngii a mo King el mo kutmeklii a kabelment el klechad a kmal ousbech er ngii. A Jesus a mo osobelterir a rechad er a chelebuul e mo okngemedeterir tirke el omekcharm er tir. Me alta e a Jesus a mo mengedereder er a beluulechad el mo er a “ikel ulebengelel a beluulchad,” engdi ngmo kiei er a kingellel el ngar er a eanged.—Psalm 72:4, 8; Daniel 7:13, 14.
Me nguaisei, a Jesus a diak di el ngii el tang el mo mengedereder. E le ngtilbir el mo kutmeklii a basio er a rechapostol er ngii el ngar er a eanged. Tirkang a mle kot el mengilt el mo king e prist el “mo mengedereder ra belulechad” el obengkel.—Chocholt 5:10.
Te tela el chad a mo er a eanged? Ngdi ua bek el kabelment, tirke el mengedereder er a Rengedel a Dios el ngar er a eanged a di mekesai a ildisir er tirke el chad el chederedall er ngii el kabelment. Me a Jesus a dilu er tirke el mo mengedereder el obengkel el kmo: “Lak medakd, kaul kekerel delebechel, le ngungil besul ra rengul a Demmiu a meskemiu a rengedel.” (Lukas 12:32) Tia el “kekerel delebechel” a mo mecherrungel a ildisir el 144,000. (Chocholt 14:1) Tia el ochur a kmal kesai sel domekesiu er ngii er a ildisir a rebetok el miliol el chad, el tir a mo kiei er tia el chutem el dmeu a rengrir el diak a ulebengelel e chederedall er tiaikid el Renged.—Chocholt 21:4.
Me nguaisei, ngdiak el rokui el ungil el chad a mo er a eanged. A apostol el Petrus a millekoi el kirel a ungil el King el David el kmo: “A David a dimlak le ngasech el mora eanged.” (Rellir 2:34) A Johanes el Techolb a dirrek el mle ungil el chad. Engdi a Jesus a milsaod el kmo ngii el Johanes a diak bo longedereder el king el ngar er a eanged. Ngdirrek el dilu el kmo: “Ak meral dmu er kemiu el kmo, ngdimlak a duubech ra le mlechell er tir a redil el kuk klou ra Johanes el Techolb; ngdi ngikel kot el kekerei ra rengedel a eanged a kuk klou er ngii.”—Matteus 11:11.
Kau Ke Mo Ngmai a Omeksaul el Kirir a Rungil el Chad?
Ngera kirel a chad el remuul me bo el sebechel el nguu a sengk er a diak a ulebengelel el klengar el ngar er tia el chutem? A Jesus a dilu el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirikel rokui loumera er ngii a diak bo lriid, e bai mo oba diak a ullebengelel klengar.” (Johanes 3:16) Ngsebeched el melechesuar a bltkil a rengul a Dios el kirir a rechad a uchul me ngmilsterir a techall me ngsebechir el mo nguu a diak a ulebengelel el klengar, engdi tia el omeksaul a di mo er “tirikel rokui loumera er ngii.”
A klaumerang a kirel el meteketek el okiu a melemalt el klemedengei. (Johanes 17:3) Ngsebechem el ochotii el kmo kau a ungil el chad el oeak sel mosuub a betok el kirel a moktek er a Jehovah el kirir a rechad. A omerellem bo lolecholt er a klaumerang er kau el oeak a tekoi el mosuub. E bo lulterekokl a rengum el kmo a techall er a diak a ulebengelel el klengar a kmal sebechem el nguu.
[Baks el ngar er a 7 el llel]
Ngerang Dmung a Biblia?
Ker:
Ngera duubech el mo er tirke el ungil el chad sel lemad?
Nger:
“E ngdi rulekoad a diak a ngeral lodengei.”—OLISECHAKL 9:5.
Ker:
Ngera omeltkir a rungil el chad er a ngar er a medad el klebesei?
Nger:
“A sikang a mei el bo lorrenges ra ngerel [a Jesus] tirikel rokui el ngara debull, me te tuobed.”—JOHANES 5:28, 29.
Ker:
A ruumesingd el ungil el chad te mo kiei er ker?
Nger:
“A re melemalt a mo ungilbesrir el kiei er a chelsel a beluu[lechad] e mo oubeluu er ngii el di blechoel.”—PSALM 37:29.