‘Morael el Mo . . . Meruul er [a Rechad] el Mo Obengkek’

1-6. Mouchais er a experience er a Resioning el lomerk er a chelsel a kakerous el blekeradel.

REBECCA el ngeasek el Sioning er a Jehovah er a beluu er a Ghana ulemes er a skulel el territory er ngii. Ngblechoel ngar ngii aike el babilenged el mengai er a Biblia el ngar er a til er a skuul. Sel temel a break e ngosiik a rolel e ngsebechel el ousioning el mora rengalek er a skuul. A Rebecca mle sebechel muchel omesubel a Biblia lobengterir a rebebil er a rengalek el dak el skuul.

² Ngar er a iungs er a Madagascar el ngar bita er a Africa e a reteru el pioneer a blechoel el merael el 15 el mael er a kleald el mora kekerei el beluu. Ngar tiang e te mesuub a Biblia lobengterir a resemeriar.

³ A Resioning er a Jehovah el ngar er a Paraguay me a re 15 el chad er a kakerous el beluu el mlong el mo olengeseu, a mle meringel loureor el meruul er a chert me bo lsebechir lomerk er a klumech el mora rechad el kiei er bita er omoachel er a Paraguay me a Paraná. Tia el klou el chert a sebechir a re 12 el chad el kiei er ngii. Me a rudam me a rudos er kid a ngar er tia el chert el omerk er a ungil chais el mora rechad el meringel er kid a mo er tir.

⁴ A Resioning el kiei er a Alaska ousbech er a ileakl el techall lomerk er a temel a summer el betok a re tourist. A cruise ship sel lemei loltak er a rechad er a kakerous el beluu e a rudam me a rudos a mo dechor er bita er aika el diall el lolab a babilenged el ngar er a betok el kakerous lomelekoi. Ngar tia el losisiu el beluu e te dirrek luluusbech er a skoki el lomerk el mora rechad el meringel er kid a mo er tir. Me a rechad er a Aleut, Athabascan, Tsimshian, me a Tlingit a mlo sebechir el rongesii a ungil chais.

⁵ A Larry el kiei er a Texas a mla er ngii a ileakl el territory er ngii. Tiang a nursing home el lekiei er ngii. Alta ngmlara wheelchair, ngulsiik a bek el techall el lomerk. Nguluuchais er a rechad er a klumech er a Renged me a omeltkel el kmo, ngar cheungel a omengederederel a Renged e nglmuut el mo merael.​—Isa. 35:5, 6.

⁶ A Resioning el kiei er a diluches er a Myanmar a mlara ferryboat el edei el klebesei el mora assembly er a Mandalay. Te kmal mle semeriar lomerk me te ngilai a babilenged lobengterir e ullab el merous el mora rechad el ngar er a ferryboat. Sel ta el stob a ferryboat er a bdelulachang, e te metengel e mengedecheduch er a rokui el sebechir e offer er tir a babilenged. E sel lorael e te kuk mo er ngii a beches el ngilasech er a ferryboat el sebechir el lomerk el mo er tir.

7. Ngoeak a ngera el rolel e a remesiungel a Jehovah ungil merkii a klumech er a Rengedel a Dios, e ngera turrekong er tir?

⁷ Ngdi uai tirka el odam me a odos el dulsaod er tir, a remesiungel a Jehovah el meliuekl er a beluulechad el rokir a blak a rengrir el ‘mesaod a . . . tekoi el kirel a Rengedel a Dios.’ (Rel. 28:23) Te oldingel obliil, mengedecheduch er a rechad el merael er a rael, meluches a letter, e mengedecheduch er a rechad er a dengua. Sel lengar er a bus, lorael er a park, me a lechub e lolai a break er tir er a ureor, e te osiik a bek el techall el omerk er a ungil chais el kirel a Rengedel a Dios. Alta ngkakerous a rolel a lomerk, engdi ngtang a turrekong er tir. Tia el turrekong a omerk el mora rechad el debetik er tir.​—Mt. 10:11.

8, 9. (a) Ngera uchul me a ureor loruul er ngii a rechedal a Jehovah er a beluulechad el rokir a mengasireng? (b) Ngduubech a ngera el ker, e ngera kired el meruul el mo medengelii a nger er ngii?

⁸ Kau el menguiu, ke ta er tirka el omerk er a klumech er a Renged er a chelsel a betok er a 235 el beluu? A leuaisei, e kau olengeseu el meleketek er a ureor el lomerk er a klumech er a Renged! A ureor loruul er ngii a rechedal a Jehovah er a beluulechad el rokir a mengasireng. Alta Resioning er a Jehovah a mo chobangel a ringel mo lmuut er a ultok er a kabelment me a odechelakl, me nguaisei engdi te mla mo ungil merkii a klumech er a Rengedel a Dios el mora rokui el renged.

⁹ Engdi a ungil ker el soad el melatk er ngii a kmo, Ngera uchul me ngdirkak a ringel, mo lmuut er a ultok lomekdubech a Satan, el sebechel el stob er a teketekel a ureor er a berkel a klumech er a Renged? A bo donger er tia el ker e ngkired el kot e kede melatk a tekoi el dilubech er a taem er a rekot el Kristiano, e le kid el Sioning er a Jehovah er chelecha el taem a melemolem er a ureor el lulechelii.

Kmal Klou a Ultutelel el Ureor

10. Ngera el ureor a mle kot el klou a ultutelel er a Jesus, e ngera ngmle medengei el kirel tia el ureor?

¹⁰ A Jesus Kristus el milechelii a ongdibel er a Rekristiano, a kmal mle blak a rengul el lomerk er a klumech er a Rengedel a Dios. Tiakid a mle urerel er a lengar tia el chutem. A ta el taem e ngdilu el kmo: “Ngak a dirrek el kirek el olisechakl er a Ungil Chais er a Rengedel a Dios er a ikel bebil er a beluu, ele tiaikid a lulderchak a Dios el me meruul er ngii.” (Lk. 4:43) A Jesus a mle medengei el kmo ngmo mechelii a ureor el dimlak el sebechel el di ngii el churrengelii. Kedeb el taem er uchei er a lemad e ngulemlaoch el kmo, a klumech er a Renged a mo oberk “ra bek el beluu.” (Mk. 13:10, BT) Engdi ngmekera mo oberk, e techa mo meruul er ngii?

11. A Jesus ngmilsterir a redisaiplo er ngii a ngera el kmal klou a ultutelel el ureor, e ngera el ngeso a mo ngosuterir el kutmeklii?

¹¹ Uriul er a lemad e lebekiis er a kodall a Jesus, e ngmlo duum er a redisaiplo er ngii e milsterir tia el kmal klou a ultutelel el ureor: “Chelechang e morael el mor a bek el bedengir a re chad er ker me ker e moruul er tir el mo obengkek, e molecholb er tir loba ngklel a Chedam, ma Ngalek, ma Chedaol Reng, e molisechakl er tir me bo loltirakl a ikel rokui el bla kdu er kemiu. E ngak a mo obengkemiu el di blechoel el mo lmuut er a ulebongel er a beluulchad.” (Mt. 28:19, 20) A tekoi el “ngak a mo obengkemiu” ulechotii el mora redisaiplo er ngii el kmo, ngmo olengeseu er tir el omerk e meruul er a remo disaiplo. Te kmal mo ousbech er a ngelsuil, e le Jesus a ulemlaoch el kmo a “rokui el chad a mo ouketui er [tir].” (Mt. 24:9) A redisaiplo a mle medengei el kmo ngsebechir el dirrek el ultuil er a lmuut el ta er a tekoi. A uchei er a lengasech el mora eanged a Jesus e ngdilu er tir el kmo a chedaol reng a mo smisicheterir me te mo ochotel el “mo lmuut er a bek el beluu er a beluulchad.”​—Rel. 1:8.

12. Ngera el meklou a ultutelel el ker a duubech, e ngera uchul me ngklou a ultutelel a bo dodengei a nger er ngii?

¹² Ngngar ngii a lmuut el bebil er a meklou a ultutelel el ker el duubech: A rechapostol er a Jesus me a redisaiplo er a taem er a rekot el Kristiano, te ulemes er tia el ngerechelir el kmal klou a ultutelel? Tirka el mekesai el Kristiano el sechal me a redil te mle ungil merkii a klumech er a Rengedel a Dios, mo lmuut er aike el taem el blo lechebangel a meringel el odechelakl? Te mera el ngiluu a ngelsuil a Jehovah me a chedaol reng er ngii er a loruul er tia el ureor? Aikang me a lmuut el bebil er a ker a debetik a nger er ngii er a babier er a Rellir a Re Apostol. Ngklou a ultutelel a bo dodengei a nger er aika el ker. E ngerang? A Jesus a dilu el kmo tia el ureor a mo melemolem el “mo lmuut er a ulebongel er a beluulchad.” Me tia el ureor a mora rokui el mera el Kristiano el luldimukl er kid el kiei er a taem er a ulebongel. Tia uchul me kede kmal semeriar el mesuub aike el llechukl er a babier er a Rellir.

Omesodel a Babier er a Rellir

13, 14. (a) Ngtecha milluches er a babier er a Rellir, e milekera mo medengei a tekoi el leliluches? (b) Ngera kede metik er a babier er a Rellir?

¹³ Ngtecha milluches er a babier er a Rellir? Tia el babier a diak louchais el kmo ngtecha milluches er ngii engdi uchelel a ochotii el kmo ngike el milluches er a Rellir a dirrek el milluches er a Ebangkelio er a Lukas. (Lk. 1:1-4; Rel. 1:1, 2) Sei a uchul me a rechad a meketeketa er a lolekoi el kmo ng Lukas a milluches er ngii. Ngika luldengelii a rechad el kmo ng “toktang” e chad er a reksi. (Kol. 4:14) Tia el babier a mesaod el kirel a tekoi el dilubech er a chelsel a 28 el rak, el lomuchel er a ngesechel a Jesus el mora eanged er a 33 C.E. el mora lemekelebus a apostol Paulus er a Rom er a 61 C.E. A Lukas a mla er sei er a leduubech a betok er aika el tekoi el leliluches. Kede medengei el uaisei le ngii lousbech er a tekoi el “kemam” sel losaod a bebil tekoi er a babier er a Rellir. (Rel. 16:8-10; 20:5; 27:1) A Lukas el kmal mle kerekikl e soal mo medengei a rokui el tekoi er a uchei er a loluches a uchul me ngulterekokl el milengedecheduch er a Paulus, Barnabas, Filip, me a relmuut el bebil.

¹⁴ Ngera kede metik er a babier er a Rellir? Uchei e a Lukas a milluches aike el lullekoi me a lurruul a Jesus el ngar er a Ebangkelio er ngii. Me nguaisei engdi ngar er a babier er a Rellir e a Lukas a liluches aike el lullekoi me a lurruul a rultirakl er a Jesus. Me a babier er a Rellir a mesaod el kirir a rechad el mirruul er a kmal ileakl el lureor, alta rebetok er tir a lulemes er tir a rechad el kmo “te di chad el diak a skulir.” (Rel. 4:13) Me tia el mlukreng el babier ouchais er kid er a rolel e ngulemuchel a ongdibel er a Rekristiano me a rolel e ngmlukeroul. Ngouchais er kid er a rolel e a rekot el Kristiano ulemerk me a uldesuir el kirel a berkel a klumech. (Rel. 4:31; 5:42) E ouchais er kid er a rolel e a chedaol reng ullengeseu er a berkel a ungil chais. (Rel. 8:29, 39, 40; 13:1-3; 16:6; 18:24, 25) Me a Rellir a di uaike el rokui el babier er a Biblia el melisiich er a mera el belkul a Biblia, el ngii a rolel e a Rengedel a Dios el ngar cheungel a Kristus a mo chemedolii a ngklel. A Rellir a dirrek el louchais er a rolel e a redisaiplo a mle sebechir lomerk er a klumech er a Renged alta te mle betok omtok er tir.​—Rel. 8:12; 19:8; 28:30, 31.

15. Ngera el klungiaol a bo dengai sel dorriter er a babier er a Rellir?

¹⁵ Ngmera el mo dmeu a rengud e dirrek el smisichii a klaumerang er kid sel dorriter er a babier er a Rellir! Sel bo dedmolech el melatk er a blakerreng me a blekeu el luleba rultirakl er a Jesus el lomerk, e ngkmal remutech a rengud. Ngodbechid el mo oukerebai er a klaumerang er tirka el odam me a odos er kid er a taem er a rekot el Kristiano. Tia mo ngosukid el kutmeklii a ngerecheled el ‘merael el mo . . . meruul er [a rechad] el mo obengkel’ a Jesus. Tia el babier el monguiu er ngii er chelechang a mileketmokl el mo olengeseu er kau el mo ungil mesuub er a babier er a Rellir.

Ngeso Lolengeseu er Kid el Mesuub er a Biblia

16. Ngera edei el moktek er tia el babier?

¹⁶ Ngera sel kmal moktek er tia el babier? Aike el edei el uchul a (1) ngolterekokl er a rengud el kmo a Jehovah ousbech er a chedaol reng er ngii el olengeseu er a ureor el omerk er a klumech er a Renged me a ureor el meruul er a remo disaiplo, (2) ngmelisiich er a blakerreng er kid er a berkel a klumech loeak omerriter er kid er a kerebai er a rultirakl er a Kristus er a taem er a rekot el Kristiano, me a (3) ngmelisiich er a omengull el dobang el mora cheldebechelel a Jehovah me tirke el lousbech er tir lomekrael er a berkel a klumech me a ongdibel er ngii. 

17, 18. Ngua ngera oketmeklel tia el babier, e ngera el telengtengil tia el babier a kmal mo ngosukau sel mosuub el di kau el tang?

¹⁷ Te milekera loruul er tia el babier? Ke mo mtebengii el kmo tia el babier a blii el mo eai el section, el derta el section a mesaod a mla moterekokl el bades er a babier er a Rellir. A derta el bliongel er tia el babier a diak losaod a derta el bades er a babier er a Rellir e ngbai ouchais er kid aike el sebeched el suub er a tekoi el dilubech el ngar er a chelsel tia el babier, e ngosukid el mo mesa rolel e ngsebeched loltaut er a klengar er kid. A uchelel a bek el bliongel e ngouchais er kid er a moktek er a bliongel me a bades el lochotii el kmo ngngera el blingelel a Rellir a bo dosaod er ngii.

¹⁸ Ngdirrek el ngar ngii a lmuut el bebil er a telengtengil tia el babier el kmal mo ngosukau el mesuub er a Biblia. Klebokel el siasing lolecholt a tekoi el dilubech er a babier er a Rellir a mo ngosukau el imagine a tekoi el monguiu. A betok el bliongel a ngar ngii a baks er ngii louchais a lmuut el bebil er a tekoi. E ngar ngii aike el baks el louchais el kirel a chad er a Biblia el ungil doukerebai er a klaumerang er ngii. A kuk bebil er a baks ouchais a komakai el tekoi el kirel a basio, tekoi el dilubech, siukang, me a lmuut el bebil er a rechad el losaod er tir a Rellir.

19. Ngera ungil kuk bong e destob e meruul er ngii?

¹⁹ Tia el babier a sebechel ngosukau el mera el di mo kau el merriter er kau. A bla bo el kemanget el taem el momerk er a klumech er a Renged me a lak, me ngii a ungil omkuk bong e mstob e molatk el kmo ngera meklou a ultutelel el tekoi er a klengar er kau e uangera osengem el kirel a berkel a klumech. (2 Ko. 13:5) Di lekau el oker: ‘Ngak, ak dirk omes er a ureor er a berkel a klumech el kmal klou a ultutelel? (1 Ko. 7:29-31) Ngak, ak kmal oumerang a tekoi el kumerk e oba blakerreng el omerk? (1 Th. 1:5, 6) Ngak, ak mora tkurrebab el klisichek el teloi er a ureor el omerk e meruul er a remo disaiplo?’​—Kol. 3:23.

20, 21. Ngera uchul me a urered a kmal orechudel, e ngera soad el rullii er a rengud el mo meruul er ngii?

²⁰ Me lak dobes el kmo sel kot el klou a ultutelel el ureor el doruul er ngii a omerk e meruul er a remo disaiplo. Ngdi kmedung e ngmei a ulebongel er tia el mekngit el blekeradel. Derta el sils lengelakl okedid er tia el sils er a ulebongel. Me ngdiak a taem el kmal orechudel el uai chelechang el rechad a kirir el mo medengei aike el kirir el meruul me lesobel. Ngkmal diak dodengei el kmo te ngera rredemelel a diak a ulebengelel el klengar el mo kongei er a klumech el domerk er ngii engdi ngngerecheled el ngosuterir er a uchei er a bo lak a taem.​—Rel. 13:48, NW; 1 Ti. 4:16.

²¹ Me ngkmal klou a ultutelel el doukerebai er a blakerreng er tirke el ulemerk er a klumech er a taem er a rekot el Kristiano. Omesubem er tia el babier lodbechau el mo omerk loba blakerreng me a blekeu. E lesisichau e lerellii a rengum el mo melemolem el “[mesaod] . . . a tekoi el kirel a Rengedel a Dios.”​—Rel. 28:23.