A Babier el Mla er a Chelechad er a Ruungerachel
Ngmla “mo kiriu el mo sensei.” (Heb. 5:12, BT) Ka di molatk er tiang, a Jehovah el ngike el kot el ungil el Sensei er a uldekial a eanged me a chutem a omekedong er kid el mo olisechakl er a rebebil el kirel! A ngerachel el mo olisechakl er a klemerang el kirel a Jehovah er a chelsel a telungalek, me a ongdibel me a lechub sel domerk er a klumech, a kmal ileakl el techall e oberaod el ngerachel. Me kede mekera mo ungil rullii?
A nger er tiang a debetik er ngii er a tekingel a apostol el Paulus el lulluches el mora Timothy el kmo: “Bo le blak a rengum el menguiu a Chedaol Llechukl el mor a re chad, e mongedecheduch e molisechakl er tir.” E dirrek el dilu el kmo: “Ele cho bo mua isei, e kosebelau kau me tirkel orrenges er kau.” (1 Ti. 4:13, 16) Me kau a oba klumech el uchul a osobel el mo omerk er ngii. Me ngklou a ultutelel el kirem el menglou er a duch er kau el menguiu e olisechakl. Me tia el babier a kltmokl el mo ngosukau el mo meruul er tiang. Me momtab a bebil er aika el tekoi el ngar er a chelsel tia el babier.
A bades el ngar er a bek el llel tia el babier a omellach el mengai er a Biblia, el mesaod er a suobel me a lechub e ngokesiu el tia el suobel a mesaod er ngii
A Jehovah a ngike el “Ngarbab el Sensei.” (Isa. 30:20, NW) Me alta tia el babier a mo ngosukid el lmuut el mo meduch el menguiu e olisechakl, engdi lak dobes el kmo a Jehovah a ngike el Uchetemel a klumech el dobang e ngii a omekrael er a rechad. (Jn. 6:44) Me a leuaisei, e bo blechoel el meluluuch lolengit er a chedaol reng er ngii, e bo blechoel el ousbech er a Tekingel a Dios. Lak mosaod a uldesuem, e bai bo blechoel el ngosuterir a rebebil el mo medengelii a osengel me a uldesuel a Jehovah el kirel a tekoi. E molasem el melisiich a rengrir a rurrenges er kau el mo mekurulii a dmolech el bltkil a rengrir el bedulngii.
Kau a mla mokedong el mo olisechakl el kirel a klou a ultutelel el klumech el bla lenguu a rechad. Me ngulterekokl a rengmam el kmo sel bo multuil er a “klisiich el mlara Dios,” e ngmo ungilbesul a rokui el tekoi el moruul.—1 Pe. 4:11, BT.
A rekldemem er a ureor,
Chelechad er a Ruungerachel er a Resioning er a Jehovah