Yehowa Wana Guvua Gudila Guaye

1-2. Ndaga jitshi jiajiya gututuma ha guzola masoji?

MUKUT’ETU agasue tuazolele gale masoji. Matangua ako, tuana zola masoji a gusuanguluga. Ha gufezegesa, yajiya gukhala egi wazolele masoji tangua mun’enu wavualewe nga tangua wawungulugile ndaga imoshi yabonga nga ndo tangua wamonele luko futa diaye munu muadikhaphele n’enji ivo yavula.

² Uvi matangua avula, tuana zola masoji gula tudi nu lamba nga gikenene. Ha gufezegesa, tuajiya gudila gula muthu tuana zumba watukalegela ndaga yabola. Tuajiya nji gudila gula tudi mukata nga gula tudi mutagana nu lamba diakola nga ndo gula muthu tuana zumba wafua. Gula ndaga ya luholo elu yatubuila, tuajiya gudivua gifua muadivile profete Yelemiya tangua enya Babilona ashiyile dimbo dia Yelusalema. Wazuelele egi: ‘Masoji adi mubulumuga gifua gamuta mu meso ami . . . Masoji ami adi mubulumuga gubatuga ndo.’​—Is. 3:48, 49.

3. Luholo lutshi Yehowa wana gudivua tangua diana mona muene akombeleledi enji mumona malamba? (Yeshaya 63:9)

³ Tangua diagasue tuana dila mukunda nu malamba tuana tagana nawo, Yehowa wana jiya. Biblia yana gutuwambela egi Yehowa wana jiya ndaga jia lamba jiagasue tuana tagana najio nu wana vua tangua tuana gumutoga ukuateshi. (Ngi. 34:15) Yehowa gana suga ndo phamba ha gumona nu gutegelela malamba tuana tagana nawo, uvi wana tshita nji ndaga jiko jiavula ha gutukuatesa. Yehowa udi Tata wetu, wana gutuzumba muavula. Hene tangua diana gutumona muene mudila, wana vua gikenene nu wana tshita ndaga mu phushi ha gutukuatesa.​—Tanga Yeshaya 63:9.

4. a) Ifezegeselo ya Biblia itshi tuza mutadila mu longo edi? b) Ifezegeselo yene idi gutulongesa itshi mukunda nu Yehowa?

⁴ Yehowa wana gutuwambela mu njila ya Biblia luholo luakhalele gudivua muene tangua akombeleledi enji akhalele mudila nu luholo luaakuatesele muene. Tutadilenu gifezegeselo gia Ana, gia Davidi nu gia Fumu Ezekiase. Itshi yakhalele mudidisa akombeledi awa a Nzambi? Luholo lutshi Yehowa wahanele mvutu gu isambu yawo? Luholo lutshi gifezegeselo giawo giajiya gutuhana gikhesa tangua tudi mudila mukunda nu malamba?

GULA WAFUISA MUTHU WANA ZUMBA YEHOWA WANA VUA GUDILA GUAYE

5. Luholo lutshi Ana wakhalele gudivua mukunda nu ndaga jiakhalele muene mutagana najio?

⁵ Ana wataganele nu ndaga jiavula jiamutumine ha gudila. Mulumi’enji wakhalele nu mukhetu muko jina diendji Penina, mukhetu muene wakhalele musagesa Ana muavula. Ndaga iko ya lamba idi egi Ana gakhalelego nga nu mona mumoshi uvi Penina wakhalele nu ana avula. (1 Sam. 1:1, 2) Penina wakhalele musegulula Ana muavula luholo gakhalelego muvuala. Gula nga aye wakhalele ha fundo dia Ana, itshi wakhalele naye gutshita? Ana wakhalele gudisagesa muavula, hene “wakhalele mudila, gakhalelego nji mudia,” wasendesele guvua “gikenene giavula”.​—1 Sam. 1:6, 7, 10.

6. Ndaga itshi Ana watshitshile ha gudivua muabonga?

⁶ Ndaga itshi Ana watshitshile ha gudivua muabonga? Wayile mukombelela Yehowa mu inzo ya tenta. Yajiya gukhala egi “wasendesele gukombelela Yehowa nu gudila muavula” tangua dia suenele muene hehi nu fundo dia gunginyila mu inzo ya tenta. Wabubidile Yehowa egi: “Tala luholo ngudi mumona malamba. Gula wangutangiza ame muenya mudimo waye nu gungubuita ndo mutshima . . . ” (1 Sam. 1:10b, 11) Ana wawambelele Yehowa ndaga jiagasue jiakhalele gumusagesa mu gisambu. Tangua Yehowa wavile gudila gua Ana, wavile gikenene giavula handaga wakhalele gumuzumba muavula!

7. Ukuateshi utshi Ana wahetele gungima dia guwambela Yehowa ndaga jiakhalele gumusagesa?

⁷ Luholo lutshi Ana wadivile gungima dia guwambela Yehowa ndaga jiakhalele gumusagesa mu gisambu? Wadivile luholo lutshi tangua Eliya wamuwambelele egi Yehowa mbawuhana mvutu gu gisambu gienji? Biblia idi muzuela egi Ana “wayile, wadile, gakhalelego luko nu gikenene.” (1 Sam. 1:17, 18) Ngatshima ndaga yakhalele musagesa Ana yakhalele khenji isombegesa gale ndo, uvi Ana wadivile muabonga. Washile mutshima egi Yehowa wakotelesele ndaga jiakhalele gumusagesa nu mbawumukuatesa. Yehowa wamonele lamba dienji, wavile gudila guenji nu wamukuatesele ha guheta mona.​—1 Sam. 1:19, 20; 2:21.

8-9. Ha gutadila Hebelu 10:24, 25, mukunda natshi tudi naye gutshita yagasue ha guya mu gudibungisa gua mu hungu? (Tala nji gifuanesa.)

⁸ Longo tuajiya guzula. Udi mutagana nu ndaga imoshi idi gugutuma ha gudila ba? Yajiya gukhala egi wafuisa muenya fami nga futa diaye. Gula ndaga ya luholo elu yagubuila, wajiya gusendesa gudikhalela, gutshita ngenyi gushigo ndaga yabola. Ana wahetele gikhesa tangua diayile muene mukombelela mu inzo tenta, luholo lumoshi nji wajiya guheta gikhesa ikhale ndaga idi gugusagesa khenji isombegesa gale ndo gula udi muya mu gudibungisa gua mu hungu. (Tanga Hebelu 10:24, 25.) Mu gudibungisa gua mu hungu, tuana tegelela ba verse a Biblia anyi ana gutuhana gikhesa, ba verse ene adi mukatshi dia ndaga Yehowa wana kalegela ha gutukuatesa ha gubemba gudisagesa. Verse jiene jiana gutukuatesa ha gudivua muabonga ikhale ndaga tudi mutagana nayo khenji ihua gale ndo.

⁹ Mu gudibungisa gua mu hungu, aphangi’etu a mala nu a akhetu ana gutuhana gikhesa nu ana gutumonesela guzumba, hene tuana gudivua muabonga tangua tuana khala nawo. (1 Tes. 5:11, 14) Tutadilenu gifezegeselo gia phangi mumoshi wa pionye spesiale wafuishile mukaji’enji. Udi muzuela egi: “Matangua ako, ngana gudikhalela ngusendesa gudila mukaji’ami. Uvi ngana heta gikhesa tangua nganaya mu gudibungisa gua mu hungu. Bakomantere a aphangi a mala nu a akhetu ana gunguhana gikhesa giavula. Ikhale ngavua gikenene gutuama dia guya mu gudibungisa gua mu hungu, uvi ngana gudivua muabonga gula ngudi mulandula guya mu gudibungisa.” Yehowa wajiya gukalegela aphangi a mala nu a akhetu ha gutukuatesa tangua tudi mu gudibungisa.

10. Luholo lutshi tuajiya gulandula gifezegeselo gia Ana tangua tudi mutagana nu ndaga ya lamba?

¹⁰ Ana wadivile nji muabonga tangua dia wambelele Yehowa luholo luakhalele gudivua muene. Aye nji ‘khala mutulula malamba aye agasue ha mago a Yehowa’ nu gusha mutshima egi muene mbawugutelela nu mbawugukuatesa. (1 Phet. 5:7) Phangi mumoshi udi mumonesa luholo luadivile muene tangua nzangi jiashiyile mulumi’enji gu uta. Udi muzuela egi: “Ngavile gifua mutshima wami wasasumugile nu mbawushigo mubonga luko. Uvi ngahetele gikhesa ngakhalele nagio funu tangua nga kombelele Yehowa Tata wami wa mu dilu. Matangua ako, ngana jiyago luholo ngajiya gumukotelesela luholo ngudi gudivua, uvi muene wana gungujiya muabonga. Tangua ngana guvua gikenene giavula, ngana toga Yehowa ha gungukuatesa ha gudivua muabonga. Gula ngatshita ngenyi, ngana gudivua muabonga nu yana gungukuatesa ha gutshita ndaga ngatshigina gukalagala mu lusugu luene.” Tangua udi mudidila Yehowa nu udi gumuwambela ndaga idi gugusagesa, muene nji wana vua gikenene nu wana kotelesa muabonga luholo udi gudivua. Ikhale ndaga udi mutagana nayo khenji ihua ndo, Yehowa wajiya guguhana gikhesa nu gugukuatesa ha gudivua muabonga. (Ngi. 94:19; Fili. 4:6, 7) Mbawugushimbiga mukunda nu gutshigina guaye gudi muene.​—Heb. 11:6.

YEHOWA WANA VUA GUDILA GUAYE GULA MUTHU WANA ZUMBA WAGUKALEGELA NDAGA YABOLA

11. Luholo lutshi Davidi wakhalele gudivua mukunda nu ndaga jia lamba jiakhalele muene mutagana najio?

¹¹ Davidi wataganele nu ndaga jia lamba jinyi jiakhalele gumuzola masoji. Athu avula akhalele mbalagaji jienji, enya fami yenji ako, mafuta enji nu athu ako akhalele muene mushila mutshima akambela gumutshita gubola. (1 Sam. 19:10, 11; 2 Sam. 15:10-14, 30) Tangua diakhalele muene mutagana nu ndaga jia lamba wazuelele egi: ‘Gikenene giangubalegela, phipha yagasue gitanda giami giazala nu masoji a gudila guami, khuse yami yatebesewa nu masoji.’ Mukunda natshi Davidi wadivile ngenyi? Wazuelele luko egi: ‘Handaga mbalagaji jiami jidi gunguhana lamba.’ (Ngi. 6:6, 7) Athu ako akhalele mukalegela Davidi ndaga jiabola, gishina giene wakhalele mudila.

12. Gifua luholo Ngimbo 56:8 idi guyimonesa, mu ndaga itshi Davidi wakhalele mushila mutshima?

¹² Mu malamba agasue Davidi wakhalele mutagana nawo, wakhalele musha mutshima egi Yehowa wana gumuzumba. Wazuelele egi: ‘Yehowa mbawuvua gudila guami.’ (Ngi. 6:8) Mu okazio uko, Davidi wasonegele ndaga jidi mu Ngimbo 56:8. (Tanga.) Mbimbi jiene jidi mumonesa haphelo egi Yehowa wana gutuzumba muavula nu wana kotelesa muabonga luholo tuana gudivua. Davidi wazuelele egi yakhalele gifua Yehowa wakhalele mumba masoji enji mu mulondo nu guasonega mu mukanda wenji. Wakhalele musha mutshima egi Yehowa wakhalele mumona ndaga jiagasue jiakhalele muene mutagana najio. Davidi wakhalele nji musha mutshima egi Yehowa wakhalele mumona malamba enji nu wakhalele mukotelesa luholo luakhalele muene gudivua.

13. Ndaga itshi tushigo naye gujimbila gula athu atukalegela ndaga yabola? (Tala nji gifuanesa.)

¹³ Longo tuajiya guzula. Udi gudisagesa handaga muthu mumoshi wana shila mutshima wagukalegela ndaga yabola ba? Yajiya gukhala egi udi gudisagesa handaga muthu udi mutshigina gudizula n’enji mu ulo wagutuna nga ndo mulumi’aye nga mukaji’aye wagubemba. Yajiya nji gukhala egi udi gudisagesa handaga muthu wana zumba muavula wabemba gukombelela Yehowa. Phangi mumoshi wa yala mukaji’enji wakalegele uthambi nu wamutunyile, udi muzuela egi: “Ngatangijilego egi ndaga ya luholo elu yajiya gungubuila. Ngakhalele gudimona egi ngushigo nu ndando, ngakhalele nji muvua gikenene giavula.” Gula muthu wana zumba muavula wagukalegela ndaga yabola nga wagutuna, jiya egi Yehowa mbagashigo gugutuna nga hanzonda. Phangi munu mukaji’enji wakalegele uthambi udi muzuela luko egi: “Ngakotelesele egi ufuta wa athu wajiya gufua uvi Yehowa udi gifua Seso dietu. Ikhale ndaga itshi yatubuila uvi muene mbawutukuatesa, mbagabembigo akombeleledi enji a gujinginyina.” (Ngi. 37:28) Ujimbilago egi Yehowa wana gutuzumba muavula gubalega athu agasue. Gula muthu wana zumba wagukalegela ndaga yabola yana sagesa, uvi Yehowa ganasombegesago luholo luenji lua gugutalela. (Roma 8:38, 39) Ndaga yabalega ndando idi egi, ngatshima muthu wagukalegela ndaga ya luholo lutshi, uvi ujimbilago egi Tata waye wa mu dilu wana guguzumba muavula.

14. Ndaga itshi idi gutuhana gikhesa idi mu mukanda wa Ngimbo 34:18?

¹⁴ Gula athu atukalegela ndaga mu luholo luabola, tuajiya guheta gikhesa mu mbimbi jia Davidi jidi mu Ngimbo 34:18. (Tanga.) Referanse imoshi idi mumonesa egi mbimbi ‘guleba muila’ yajiya gumonesa “athu ana gudimona egi ashigo nu ndando.” Luholo lutshi Yehowa wana kuatesa athu ana mona egi ashigo nu ndando? Yehowa wana khala hehi nu esue. Udi gifua tata nga mama wa guzumba munu udi mubata mun’enji udi mudila ha gumuhana gikhesa. Tangua athu tuana zumba atukalegela ndaga yabola, Yehowa wana mona nu wana khala hehi ha gutukuatesa gula tudi gudisagesa nga tudi mutangiza egi tushigo nu ndando. Udi gutulaya ha gutuhana ima yavula, laji diene diana gutuhana gikhesa ha gulandula gukolesela mu malamba.​—Yesh. 65:17.

YEHOWA WANA VUA GUDILA GUAYE TANGUA UDI MUKATA

15. Ndaga itshi ya lamba yadidishile Ezekiase?

¹⁵ Tangua Fumu Ezekiase wataganesele ivo 39, wakatele misongo yakola. Profete Yeshaya wamuwambelele egi Yehowa wazuela egi misongo yene mbayigushiya. (2 Maf. 20:1) Ezekiase gakhalelego luko nu felela. Tangua diavile muene ndaga yene, wavile gikenene giavula nu wasendesele gudila. Wabubidile Yehowa ha gumukuatesa.​—2 Maf. 20:2, 3.

16. Mvutu itshi Yehowa wahanele gu gisambu gia Ezekiase?

¹⁶ Gisambu Ezekiase watshitshile giakuatele diago mutshima wa Yehowa, hene Yehowa wamuwambelele nu gisemo giagasue egi: ‘Ngavi gukombelela guaye nu ngamonyi masoji aye. Ngudi guguhuluisa.’ Mbimbi jia Yeshaya jiamonesele egi Yehowa mbawumulunda ivo iko nu mbawuhuluisa nji Yelusalema ha mago a enya Asiliya.​—2 Maf. 20:4-6.

17. Luholo lutshi Yehowa wana gutukuatesa tangua tudi mutagana nu malamba? (Ngimbo 41:3) (Tala nji gifuanesa.)

¹⁷ Longo tuajiya guzula. Itshi wajiya gukalagala gula udi mukata misongo yakola inyi udi mumona egi mbayishigo muhua? Didila Yehowa mu gisambu. Biblia idi gututshiginyisa egi Yehowa udi “Tata wazala pha nu khenda, Nzambi wa ukuateshi wagasue,” mbawutukuatesa mu tangua dia lamba. (2 Kol. 1:3, 4) Mangino, tuajiyilego gusha mutshima egi Yehowa akatule malamba etu agasue, uvi tuajiya gumushila mutshima egi mbawutukuatesa. (Tanga Ngimbo 41:3.) Yehowa wana kalegela nyuma yenji ha gutuhana ngolo, ndunge nu guhuima ha gukolesela mu malamba tudi mutagana nawo. (Ish. 18:14; Fili. 4:13) Wana kalegela nji felela didi mu Biblia ha gutukuatesa ha gujiya egi mu masugu adi muza mbawukatula misongo nu malamba.​—Yesh. 33:24.

18. Verse itshi yana guguhana gikhesa tangua wana tagana nu malamba anyi wana mona egi ajiyilego guhua? (Tala galuanda, “Verse Jiajiya Gugukuatesa Tangua udi Mudila.”)

¹⁸ Mbimbi jiazuelele Yehowa jiahanele Ezekiase gikhesa. Esue nji Mbimbi ya Nzambi yajiya gutuhana gikhesa. Gula tudi gudisagesa mukunda nu malamba, Biblia yajiya gutukuatesa ha guheta guhuima. (Roma 15:4) Phangi mumoshi wa mukhetu wana khala gu Afrique de l’Ouest, wasendesele gudila tangua amuwambelele egi udi nu misongo ya Cancer. Udi muzuela egi: “Mukanda wa Yeshaya 26:3 wanguhanele gikhesa. Ngatshima yana khalago tangua diagasue yaleba ha gudikanda mu malamba tudi mutagana nawo, uvi verse yene idi gungutshiginyisa egi Yehowa wajiya gutuhana guhuima, ngenyi tuajiya gudikanda mu malamba tudi mutagana nawo.” Gudi nu verse ya Biblia yana guguhana gikhesa tangua wana tagana nu malamba anyi wana mona egi ajiyilego guhua ba?

19. Lujingu luetu mbalukhala luholo lutshi mu masugu adi muza?

¹⁹ Tudi mujinga mu masugu a gisugishilo, hene mbatutagana nu malamba anyi ajiya gutudidisa. Gifua luholo tuayimonyi mu gifezegeselo gia Ana, Davidi nu Fumu Ezekiase Yehowa wana mona gudila guetu, nu wana khala hehi ha gutukuatesa. Wana gutuzumba muavula luholo tuana sala yagujinginyina gudi muene tangua tuana tagana nu malamba, nu wana vua gudila guetu. Hene tangua tudi mutagana nu ndaga jidi gutusagesa, tudi naye gukombelela Yehowa nu mutshima umoshi. Mu matangua ene tudi naye gukhala hehi nu aphangi’etu Aklisto ana gutuzumba. Tuajiya nji gubemba egi Yehowa atuhane gikhesa gula tudi mutanga Biblia. Tuajiya nji gusha mutshima egi gula tuasala ya gujinginyina gudi Yehowa, muene mbawutushimbiga, masoji mbaakhadigo luko, athu mbaatukalegelago luko ndaga mu luholo luabola nu misongo nji mbayikhadigo luko. (Gumo. 21:4) Mu tangua diene mbatuzola masoji a gusuanguluga.