Gitshinyi 8
Tuna Gikombelelo gia Mambo, Kombelela mu Giamatshidia
1. Mangino mu ndaga ya ukombeledi, luholo tshi athu adi naye gutomba?
YESU wazuelele egi: “Muthu yagasue udi gashigo nu ame udi mungutuna.” (Matayo 12:30) Tuanakhala gukhanda ya Yehowa nga gukhanda ya Satana. Athu avula anatangiza egi anatshitshila Nzambi mu luholo lua bonga sha, uvi Bibiliya idi muzuel’egi Satana ‘wanahuiga athu agasue a ha mavu.’ (Yatuwuwe 12:9) Inunu y’athu yanatshigina egi anakombelela Nzambi, uvi ha guzuela guabonga anakombelela Satana Diabulu! Mangino athu adi naye gutomba: Adi naye gutshitshila Yehowa “Nzambi wa giamatshidia,” nga Satana, “sh’a mambo.”—Ngimbo 31:5; Yone 8:44.
Batula Ufuta nu Gikombelelo gia Mambo
2. Muho tshi Satana ganatshita ha gutunyisa athu ha gukombelela Yehowa?
2 Gudiloga guaye hagutshitshila Yehowa gudi gutomba ndaga ya ndunge, mundag’eyi Nzambi wanatshigina muthu. Uvi Satana ganaswanguluga ndo nu muthu yagasue udi mutshitshila Nzambi; wanazola ndaga jia lamba mukunda nu athu anatshitshila Nzambi. Luholo luko luanatshitshila muene ludi lua gusegulula nga gunana umbalagaji wa mafut’aye nu enya jigo diaye. Yesu wananele athu matshui’egi: “Enya umbalagaji a muthu mbakhala a monzo yenji diago.”—Matayo 10:36.
3. Gula enya jigo diaye nga mafut’aye agutunyisa hagukombelela Nzambi, itshi wajiya gutshita?
3 Gula ndaga ii yagubuila, luholo tshi wajiya gutshita? Athu avula anajiya egi ukombeledi wawo udi wabola, uvi ananungago gudikhaphumuna nawo. Anatangiza gifua idi gukonda gufubidila gudi jigo diawo gula atshita ngenyi. Gutangiza ngenyi gudi ndaga ya ndunge ba? Gula wavua egi athu ako mukatshi dia jigo diaye ananua diamba, w’abemba gaye hagula lusugu luko mbadiashiye nga w’anana matshui ha gubemba gunua diamba? Nunji, aye wajiya guya guasanga ha gunua nawo diamba ba?
4. Itshi Yoshua gawambelele enya Isalele mukunda nu gukombelela mu masugu enji?
4 Yoshua wakolesele enya Isalele hagubemba midimo ya ikombelelo ya bola nu makalegelo a akhakha awo. Wazuelel’egi: “Luenyelu, mukombelele [Yehowa, NW], mumukuatele mudimo nu mitshima yabonga nu giamatshidia. Mubuite mitshima gu nzambi jiakombelele akhakh’enu mu sambua dia muta wa Efelate, mu Mesopotamiya nu mu Ejipitu, mukombelele [Yehowa].” (Yoshua 24:14) Yoshua wafubidile gudi Nzambi, nu Yehowa wamuhanele luendu sha. Gula esue nji tuafubidila gudi Yehowa, mbautuhana luendu.—2 Samuele 22:26.
Bishila Ima Yagasue ya Gikombelelo gia Mambo
5. Mukunda natshi idi yabonga hagubishila ima yagasue idi gudivua nu maji?
5 Gubatula shinga jiagasue nu gikombelelo gia mambo imudijig’egi tudi naye yagubishila ima yagasue idi gudivua nu maji ituajiya gukhala nayo, gifua mikanga, muya wa mumbunda, lusele lua gukoko, usanga, luphete nga ima iko ya luholo lununu. Idi ndaga ya ndando mukunda idi mudijiga egi tumusha mutshima wetu gudi Yehowa.
6. Itshi yatshitshile Akilisto agudiangela nu mikanda yawo ya ndaga jia ilumbelumbe?
6 Tutale gale itshi Akilisto agudiangele atshitshile hadilogele ene hagukombelela mu gikombelelo gia giamatshidia. Bibiliya idi muzuel’egi: “Ako akhalele atshitshi a ndaga jia ilumbelumbe abungishile mikanda yawo ayikondele tshuiya gu phala ya athu agasue.”—Makalegelo 19:19.
7. Itshi tuajiya gutshita gula mademo adi gutusagesa?
7 Hasendesele ene gutshitshila Yehowa, athu ako ago akhalele nu midimo gifua ya nganga-ngombo, wanga, nga ima ya maji amonesewe phashi gudi mademo. Gula ndaga eyi ya gubuila, tamega jina dia Yehowa mangololo mu gulomba. Mbaugukuatesa.—Ishima 18:10; Yakoba 4:7.
8. Luholo tshi Akilisto anatalela isongo, ifuanesa, nu ikhokho iidi mutshitshila gikombelelo gia mambo?
8 Athu agasue adi mutshigina gukombelela Yehowa ajiyilego gutshitshila nga gisongo, gifuanesa, ikhokho, nga ima iko idi gudivua nu gikombelelo gia mambo. Akilisto a giamatshidia ‘anawenda mu gutshigina, ashigo muwenda mu ima iadi mumona nu meso.’ (2 Kolinto 5:7) Ananemesa mikhuala ya Nzambi idi mutuna gutshitshila ifuanesa nga ya mishindo yagasue mu ukombeledi.—Guzoga 20:4, 5.
Dibungise nu Athu a Yehowa
9. Longo tshi didi Bibiliya gutuhana mu ndaga ya gukhala nu ndunge?
9 Bibiliya idi muzuel’egi: “Muthu udi mukuata ufuta nu muenya ndunge mbawubua muenya ndunge.” (Ishima 13:20) Gula tuatshigina gubua enya ndunge, tudi naye guwenda, nga gukuata ufuta nu Alondolodi a Yehowa. Adi athu anawenda mu njila idi mutuameza gu monyo.—Matayo 7:14.
10. Luholo tshi Alondolodi a Yehowa ajiya gugukuatesa ha aye gutshitshila Nzambi?
10 Ya diago, Alondolodi anakuatesa athu. Mudimo wawo udi wa gukuatesa athu adi nu mitshima ya gulongologa hagukotelesa giamatshidia gia Bibiliya gi gidi mutuameza gu monyo wa mayilago. Ajiya nji gugukuatesa ha aye gulonguga Bibiliya, uvi gugulomba nga gima gimoshi ndo. Mba adi gugutaya mu mihu yaye nu gugudijiga luholo tshi wajiya gutshitshila ujiyi wa Bibiliya mu lujingu luaye.—Yone 17:3.
11. Luholo tshi gudibungisa gua Akilisto gua jiya gugukuatesa?
11 Gula udi gudibungisa nawo, mu Inzo ya Ufumu, mbaulonguga ima yavula idi mutalela njila jia Yehowa. Mbawuzula jingolo ji mbajigutuma hagukombelela mu gikombelelo gia giamatshidia. Nunji mbolongewa luholo tshi wajiya gukuatesa athu ako hagulonguga giamatshidia gia Bibiliya.—Hebelu 10:24, 25.
12. Luholo tshi gulomba guajiya gugukuatesa hagutshitshila Nzambi?
12 Ha udi mulonguga felela nu lukhanu lua Yehowa, mbawudi mukudisa gusuanguluga guaye mukunda nu njila jienji jia guzumba. Udi naye nji gukudisa nzala yaye ya gumusuanguluisa nu ya gutuna gumuhua gikenene. Tangiza egi wajiya gusuena hehi nu Yehowa mukatshi dia gulomba guaye ha muene gugukuatese hagutshita ima yabonga nu gutuna ima yabola.—1 Kolinto 6:9, 10; Filiphi 4:6.
13. Luholo tshi wajiya gusuanguluisa mutshima wa Yehowa?
13 Gula wakula mu ndaga jia Nzambi, mbaumona ndando ya gudihana, nu gubatijiwa ha gubua Mulondolodi wa Yehowa. Kumbi mbawungina mukatshi dia athu a Yehowa, mbawudi musuaguluisa mutshima wa Yehowa. (Ishima 27:11) Mbawukhala mukatshi dia athu a adi Nzambi muzuelel’egi: “Ame mbangukhala mu mitshima yawo, mbanguwenda mukatshi diawo, mbangukhala Nzambi wawo nu ene mbakhala athu ami.”—2 Kolinto 6:16.
Malongo a Ikombelelo Adi a Mambo nu Adi a Giamatshidia
● Utatu Usantu: Ikombelelo yavula yanalonga egi Nzambi udi Utatu Usantu. Anazuel’egi “Tata udi Nzambi, Mona [Yezu] udi Nzambi, nu Givule Giabonga gidi Nzambi, ngenyi mukatshi dia Nzambi mumoshi mudi athu mutatu.”
Uvi Bibiliya ishigo muzuela nga fundo dimoshi mbimbi eyi “Utatu Usantu,” nga hagudijiga egi Yehowa udi mukatshi dia athu mutatu. Khuta Yehowa muene hakhenji udi Nzambi. Mukanda wa 1 Kolinto 8:6 udi mukotelesa egi: “Gudi esue gudi khuta Nzambi mungoshi, muene Tata.” Yehowa udi Holu dia ima yagasue. Yesu, gashigo Nzambi, uvi udi “Muna Nzambi.” (1 Yone 4:15) Luholo lungoshi nu givule giabonga, gishigo Nzambi ndo. Gishigo nji muthu. Gidi ngolo jia mudimo jia Nzambi.—Makalegelo 1:8; Efeso 5:18.
● Monyo: Ikombelelo yavula yanalonga egi monyo udi gima gingoshi gianakhala mukatshi dia muthu nu gianafua ndo. Uvi Bibiliya idi mulonga egi monyo udi muthu, ya diago, muthu wanafua.—Gisendeselo 2:7; Ezekiele 18:4.
● Milungi ya Tshuiya: Ikombelelo yamambo yanalonga egi mionyo y’athu abola yanahuiwa lamba ivuo nu ivuo mu milungi. Bibiliya idi muzuel’egi athu a gufua “gashigo mujiya gima.” (Mulongeshi 9:5) Bibiliya idi muzuela nji egi “Nzambi udi guzumba.” (1 Yone 4:8) Yehowa, udi Nzambi ya guzumba, gajiyilego guhua athu ako lamba nu tshuiya.
[Muhu wa longo]
Luphango: Itshi yanalonga Bibiliya mundaga ya Utatu Usantu, monyo, nu milungi ya tshuiya?
Ngadikatuile mu Uhiga wa Mademo
Lusugu lungoshi ha ngakhalele ya gubanda nu mulumiami mu phipha, ngavuile dijui dingoshi gungutamega mahugo a tatu. Ngenyi gamuenene yangi dia inzo mutuuga, nunji gima gingoshi gifua bundu dia tshuiya, giabuile holu dia vumo diami. Uvi mulumiami gamonenego nga gima gimoshi. Mukumbi diene, ngasendesele guvua tshuiya tuavula mu vumo, ngatshitshile nato mbeu jia vula sha.
Gungima dia mbeu jisambano, dijui diene dia ngutamegene luko. Ngamonene mukumbi diene gifua inzo yagasue idi mukatshi dia meya. Moma yakoma yazogele mukatshi dia meya nu yangulangele mukoko. Ngashile lukando sha haguikatula uvi phaamba. Ngavuile woma wavula sha. Gungima, meya nu nyoga yene yatotele, nunji angusonuene gonze. Ngakhalele gudijiyago gungima dia makumbi avula. Dijui diene dia nguwambelele egi vutuga mu tempelo yanasaga athu mu ngolo jia ivule yabola. Mukumbi nga hudile givule giene jina diagio, gia nguhuile dijina didi mudijiga egi “muthu waumonyi uvi ana ndo.” Wangutendelele egi mbangumukhala nu umonyi wavula mu ngolo jia gusaga athu.
Athu a misongo a membo avula a hehi nu agualeha akhalele muza gudi ame. Gutuama dia ene guheta gu inzo yami, ngakhalele guamona mu thalathala yami. Gula muthu waheta, ngakhalele musha gikata gia koko guami holu dia koko guenji, hangima misongo yenji nga malamba enji nu ihemba ya guisagela ngakhalele guilondolola mukumbi diene. Givule giakhalele nji gunguwambela falanga gutshi athu adi naye gungufuta.
Mukunda ngakhalele musaga athu muabonga, athu akhalele munguhua falanga nu ima ya vula sha. Ngabuile “muthu wa umonyi,” uvi ngakotelesele nji gishina gia mbimbi eyi egi “ana ndo.” Hugo diagasue di ngakhalele mubuta mona, mukulu’enji wakhalele mufua. Ndaga eyi yakhalele gunguhua lamba gumutshima. Mu ivuo 12 yagasue ingatshitshidile givule egi, anami musambano afuile.
Ngasendesele gulomba Nzambi egi angukuatese. Ngakhalele mulomba muavula sha. Lusugu lumoshi Alondolodi a Yehowa akokuele gu mufulo wami. Ngakhalele guakaya mu masugu ako, uvi lusugu lununu ngazuelele egi ngudi guategelela. Mu maga tuatele nawo, ngakotesele egi ngakhalele mutshitshila demo mumoshi! Ngadilogele hagubemba mudimo unu wa ivule yabola.
Mukumbi di ngawambelele givule giene ndaga ei, giangunanene matshui mukunda nu gudiloga guami. Uvi, ngazuelel’egi: “Ame nu’aye guahui.”
Ngakondele ima yagasue i ngakhalele muphongela. Ngalongugile Bibiliya nu Alondolodi, ngabuile mutshitshidi wa Yehowa, nunji ngazanguile mbotiga mu givuo gia 1973. Luenyolu ngudi nu ana mutano adi nu mila yatagana sha. Mulumiami nji wabuile gale Mulondolodi wa gubatijiwa.—Lumene lua Josephine Ikezu.
[Muhu wa longo]
Luphango: Luholo tshi luadikatuile mukhetu mumoshi mu mago a mademo?
[Foto ha diyiji 26]
Luholo tshi wajiya gukombelela mu giamatshidia?