Protectim Iuseleva From Olketa Parasite!
FROM MAN WEA RAET FOR WEKAP! LONG HONDURAS
IU WEKAP withim feeling for laek toroaot. Iu savvy tired kwiktaem. Bele bilong iu hem boela lelebet. Waswe, saen bilong babule? Maet olsem. But sapos iu stap long wanfala tropical or semitropical part long world, maet problem hem wanfala kaen parasite long bele. Wanem nao parasite long bele, and hao nao iu savvy sapos iu garem disfala nogud samting?
For tok stret, wanfala parasite hem samting wea laef wea kasem gud samting from nara samting wea laef, wea hem stap antap or insaed long hem. Tufala kaen parasite long bele stap wea olketa kolem protozoan, wea insaed diswan hem olketa amoeba, and helminth, or worm. Hao big nao way wea parasite spoelem samting wea laef hem depend long wanem kaen and haomas parasite nao stap and long age and health bilong man.
Olsem example, wanfala mere raonworm savvy mekem 200,000 egg insaed wan day. But, olketa egg mas stap insaed long graon for olketa grow. Namba bilong olketa raonworm wea man savvy garem hem depend long namba bilong olketa egg wea laef or worm wea man kaikaim. Planti pipol garem samfala raonworm but olketa no savvy. But way for garem staka raonworm savvy kosim bigfala problem wea blokim bele.
Samfala saen bilong olketa parasite long bele hem nao pain long bele, laek toroaot, no hangre, bele hem boela, tired, and pain bihaen kaikai, beleran, or no savvy toilet. Way wea body katdaon, no sleep gud, skras, short wind, and fever maet meanim tu olketa worm stap. Hem tru, olketa hia savvy saen bilong samfala different kaen sik. But olketa doctor savvy lukim parasite thru long way for checkim siti bilong man.
Hem barava important for kasem stretfala result long diswan. Olsem example, sapos olketa raonworm and narakaen parasite stap, man mas firstaem treatim datfala raonworm. Why nao olsem? From samfala medicine no killim dae worm but spoelem olketa nomoa, mekem olketa go long nara part long body and kosim bigfala problem.
Way for Stopem Hem Winim Way for Healim
Treatment withim medicine hem gud for aotem olketa parasite, but hem moabeta for no kasem olketa long firstaem. So hao nao iu savvy protectim iuseleva from olketa parasite?
Way for klin hem best protection. Siti mas no stap long ples wea air savvy kasem. Olketa toilet mas stap farawe lelebet from wata. Mas no iusim siti bilong man long gaden. Stretfala way for klin hem barava important tu. And tu, no letem pikinini kaikaim graon. Sapos wanfala pikinini hem garem parasite, hem gud idea for letem doctor checkim full famili.
Iumi mas careful taem iumi baem and preparim kaikai. Trae for baem kaikai wea grow long area wea iu savvy hem klin. Meat mas tan gud long midol. Nating kaikaim meat wea iu no kukim. Mas wasim gud olketa fruit and vegetable wea iu no kukim. But, no iusim datfala wata moa, nogud hem garem parasite.
Boilim wata firstaem bifor iu drinkim. Bihaen wata hem cold, iu savvy putim oxygen go back insaed long wata. Planti wata filter for haos no fit for aotem evri parasite. Klin bilong olketa wata wea iu baem long botol hem depend long klin bilong datfala kampani wea workim datfala wata.
Taem iu travel or kaikai long different ples iu mas careful tu. Olketa drink long botol or carton hem sef sapos iu no putim ice insaed. From samfala parasite stap laef insaed barava cold temperature, ice bae klin nomoa fitim wata wea olketa iusim for workim. Iu maet want for careful long kaikai tu wea pipol sellim long road. Pineapple or melon wea olketa katem maet luk naes tumas, but planti taem pipol putim wata antap long hem for mekem hem stap gud—wata wea maet garem parasite. Mas careful, but no ova tumas mekem iu no enjoyim holiday bilong iu. Thru long way for careful, iu savvy duim planti samting for protectim iuseleva from olketa parasite.
[Piksa long page 30]
Way for klin hem best protection
[Piksa long page 31]
Ice bae klin nomoa fitim wata wea olketa iusim for workim
[Piksa long page 31]
Olketa amoeba and worm nao tufala kaen parasite
[Credit Line]
DPDx, the CDC Parasitology Website