Bae AIDS Finis? Sapos Olsem, Hao Nao?

FOR longfala taem, staka kantri long Africa no laek luksavve hao big nao AIDS long kantri bilong olketa. Hem subject wea samfala pipol no laek story abaotem. Bat, insaed olketa year wea just go pas, olketa trae for teachim especially olketa young wan abaotem AIDS and for encouragem wei for story abaotem. Diswan hem lelebet win. Living and kastom bilong pipol barava strong, and hem hard for mekem change kamap.

Moa Savve Saed Long Medical

Saed long medical, olketa scientist lanem staka samting abaotem HIV and olketa wakem olketa medicine for mekem laef bilong planti pipol moa long. Olketa iusim thrifala medicine wea strong for faetem datfala virus.

Olketa medicine hia no finisim sik bat olketa daonem namba bilong pipol wea dae from HIV, especially long olketa poor kantri. Staka pipol strongim wei wea hem important for givim olketa medicine hia long olketa poor kantri. Bat staka pipol long olketa kantri hia hard for peim olketa medicine hia from hem expensive.

Diswan mekem kwestin kamap: Waswe, selen hem moa important winim laef bilong man? Abaotem diswan, director bilong program long HIV/AIDS long Brazil, Dr. Paulo Teixeira, hem sei: “Iumi kanduit leavim staka thousand pipol for faendem seleva medicine for olketa laef, just bikos iumi laek kasem staka selen.” Hem sei moa: “Mi barava warim hao selen shud no kamap samting wea moa important winim pipol and wei for duim stret samting, wea helpem man.”

Tu-thri kantri disaed for no luksavve long samfala right bilong olketa big company for stopem nara company wakem sem medicine and olketa wakem seleva or tekem kam from difren kantri samfala generic medicine bikos hem moa cheap.a South African Medical Journal reportim hao wanfala research faendaot “price [bilong olketa generic medicine] hem 82% moa cheap winim US price.”

Olketa Samting wea Blokem Treatment

Gogo, olketa big company wea wakem medicine start for offerim AIDS medicine long price wea moa cheap for olketa poor kantri wea needim. Olketa hope diswan bae mekem moa pipol savve mekius long olketa medicine hia. Bat, staka big samting blokem wei for olketa poor kantri kasem medicine hia. Wanfala samting hem kost. Nomata olketa barava daonem kost, hem expensive yet for staka long olketa wea needim.

Nara problem hem wei wea hem no isi for tekem medicine hia. Man mas tekem staka medicine evriday long barava taem olketa markem. Sapos olketa no tekem long stretfala wei, diswan bae lead go long wei wea HIV kamap resistant. Kaen living long Africa wea kaikai hem short, no garem inaf klin wata, and short saed long medical, hem mekem hard tumas for mek sure olketa tekem treatment long stretfala wei.

And tu, olketa mas lukluk gud long olketa wea tekem medicine. Sapos gogo olketa kamap resistant, olketa mas changem medicine. Diswan needim medical pipol wea garem savve, and olketa test savve expensive. And tu, medicine savve affectim man long nogud wei, and datfala virus go ahed for kamap moa resistant.

Long wanfala spesol meeting bilong UN General Assembly wea storyim AIDS, olketa plan for garem wanfala Global Health Fund for helpem olketa poor kantri. Olketa sei olketa needim samting olsem $7 billion go kasem $10 billion. Amount wea olketa promis for donatem for disfala fund hem barava short yet long goal hia.

Olketa scientist hope olketa bae faendem cure, and olketa go ahed for testim olketa difren wan long samfala kantri. Nomata sapos olketa win long diswan, hem tek planti year for olketa wakem, testim, and savve wanfala medicine hem sef for pipol iusim.

Samfala kantri olsem Brazil, Thailand, and Uganda, bin win long olketa treatment program. Taem Brazil iusim olketa medicine wea olketa seleva wakem, hem barava daonem namba bilong olketa wea dae from AIDS. Smol kantri bilong Botswana, wea garem inaf selen, hem trae for provaedem medicine long evriwan wea needim long datfala kantri and hem trae hard for provaedem olketa important medical building and equipment.

For Winim AIDS

Wanfala important wei wea AIDS hem difren from olketa narakaen sik wea savve spread hem wei wea man fit for protectim hemseleva from hem. Sapos pipol willing for followim olketa main Bible principle, olketa savve missim diswan.

Bible standard saed long fasin hem klia. Olketa wea no marit shud stap klia from sex. (1 Corinthians 6:18) Marit pipol shud faithful long marit partner bilong olketa and no duim adultery. (Hebrews 13:4) Bible kaonsel for stap klia from blood hem help tu for protectim man.—Acts 15:28, 29.

Olketa wea kasem AIDS savve kasem bigfala hapi and comfort taem olketa lane abaotem world wea free from sik wea God promis hem klosap nao for kam and for followim olketa mark bilong God.

Bible hem promisim iumi hao evri trabol wea man kasem, wea insaed diswan hem olketa sik, bae finis. Disfala promis hem insaed buk bilong Revelation: “Mi herem wanfala bigfala voice from throne hem sei: ‘Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.’ ”—Revelation 21:3, 4.

Disfala promis hem no just for olketa wea garem selen for peim medicine. Isaiah 33:24 hem strongim promis bilong Revelation chapter 21 taem hem sei: “No eniwan bae sei: ‘Mi sik.’ ” Then evriwan wea laef long earth bae live followim law bilong God and bae enjoyim perfect health. From diswan, AIDS—and evri narakaen sik—bae finis for olowe.

[Footnotes]

[Box/Piksa long page 9, 10]

Diswan Nao Really Cure Mi Bin Luk Aotem

Mi stap long south part bilong Africa, and mi 23 year. Mi rememberim day mi faendaot mi garem HIV.

Mi and mami insaed wanfala rum long clinic taem doctor talem nius. Hem barava sorre day long laef bilong mi. Mi konfius. Mi hard for bilivim. Mi ting maet laboratory mek mistek. Mi no savve wanem for talem or duim. Mi feel laek krae, bat no eni wata kam long eye. Doctor start for storyim olketa medicine and nara samting witim mami bilong mi, bat from mi seke tumas, mi hard for minim eniting.

Mi luksavve maet mi kasem from samwan long university wea mi skul. Mi barava laek for story witim eniwan wea bae minim samting wea kasem mi, bat mi no savve tingim eniwan. Mi kasem feeling for feel iusles and olsem mi fail. Nomata famili bilong mi saportim mi, mi lus hope and fraet. Olsem evri nara young wan, mi bin garem staka plan for future. Mi garem tufala year moa bifor mi finisim bachelor of science degree long university, bat datfala hope nomoa nao.

Mi start for tekem medicine and go lukim olketa wea givim kaonsel saed long AIDS, bat mi sorre yet. Mi prea long God for showim mi trufala Christian Wei bifor mi dae. Mi member bilong Pentecostal church, bat no eniwan from church visitim mi. Mi laek for savve long truth abaotem wea mi bae go bihaen mi dae.

Wan morning long August 1999, tufala Jehovah’s Witness noknok long haos bilong mi. Mi barava sik long datfala day, bat mi fit for kamaot long ples for sidaon and mifala story. Tufala woman talem nem bilong tufala and sei tufala helpem pipol for studyim Bible. Mi hapi tumas for kasem ansa for prea bilong mi. Bat kasem datfala taem mi wik tumas so mi hard for read or lisin for longfala taem.

Nomata olsem, mi talem tufala hao mi laek for studyim Bible, and tufala markem taem for tufala kam bak. Bat bifor datfala taem kam, bigfala sorre feeling kosim mi for admit long hospital. Mi go aot thrifala week bihaen and hapi tumas for faendaot olketa Witness no forgetim mi. Mi remember hao wanfala long tufala kam evritaem for chek sapos mi olraet. Mi kamap beta lelebet, and mi start for studyim Bible gogo for end long datfala year. From sik bilong mi no stedy, hem hard for mi. Bat wan wea study witim mi hem minim mi and hem patient.

Hem barava muvim feeling bilong mi taem mi study abaotem Jehovah and olketa fasin bilong hem insaed Bible, and tu really mining bilong wei for savve long hem and for luk forward long laef olowe. For firstaem, mi savve long reason why olketa man safa. Mi kasem bigfala hapi for lane abaotem Kingdom bilong God, wea klosap nao bae changem evri gavman bilong man. Hem muvim mi for changem living bilong mi evribit.

Diswan nao really cure wea mi luk aotem. Hem barava comfortim mi for luksavve Jehovah hem lovem and kea for mi! Bifor, mi ting mi kasem disfala sik from God heitim mi. Bat mi lanem hao long loving wei Jehovah hem provaedem forgiveness long faondeson bilong ransom sakrifaes bilong Jesus Christ. Mi savve nao hao God hem kea, olsem 1 Peter 5:7 hem talem: “Torowem evri wari bilong iufala long hem, bikos hem kea for iufala.”

Thru long wei for studyim Bible evriday and attendim olketa meeting long Kingdom Hall, mi barava waka hard for kam klos long Jehovah. Nomata hem no evritaem isi, mi talem evri wari bilong mi long Jehovah thru long prea and ask for strong and comfort bilong hem. Olketa member bilong kongregeson stap redy for saportim mi tu, so mi hapi.

Mi evritaem share long waka for talemaot gud nius witim kongregeson. Mi laek for helpem pipol long spiritual wei, especially pipol wea kasem sem sik olsem mi. Mi baptaes long December 2001.

[Piksa]

Mi kasem bigfala hapi taem mi lane abaotem Kingdom bilong God

[Piksa long page 8]

Team for givim help saed long AIDS long Botswana

[Piksa long page 10]

Long Paradaes earth, evriwan bae enjoyim perfect health