Emergency Landing!

STORY BILONG CÉSAR MUÑOZ

Bihaen wanfala naes holiday wea mi visitim famili bilong mi long Monterrey, Mexico, mi redy for go bak waka long branch office bilong Olketa Jehovah’s Witness long Mexico City. Hem Sunday, December 1, 2002. Mi go insaed Flight 190, and aeroplane tek-off long seven klok long evening.

BIHAEN mifala flae for klosap wan hour and haf, plane start gogo daon for landing. Seknomoa, hem kwiktaem go ap moa, and mifala seke taem wanfala samting barava mek noise andanit mifala. Then, pilot tok kam and talem hao hem no savve openem door wea olketa tyre savve kamaot from. Hem barava pas nao! Samfala passenger start for krae from olketa fraet tumas. Samfala narawan prea big nao. Mi ting wanem nao bae happen.

Pilot sei hem bae trae duim samfala samting for sekem plane mekem olketa door hia open. So taem mifala go ahed for flae ovarem Mexico City, hem sekem aeroplane ap and daon and saed tu saed for samting olsem wan hour. Datwan hem worse winim eni raed wea mi bin go long hem long olketa amusement park. Tru nao, hem barava nating fani! Then pilot hem sei: “Sorre nao olketa, bat, olketa door hard for open. Only samting wea mifala savve duim hem for emergency landing witim no eni tyre.” Mifala evriwan lukluk long each other and ting maet mifala bae dae nao.

Olketa showim mifala hao for redy for emergency landing. Mifala aotem shoe, and eni nara samting wea maet mekem eniwan garekil, and sidaon long wei wea olketa talem for mifala. Mi ting, mifala bae barava banga nogud long airfield! Long dat taem nao mi prea long Jehovah God and feeling bilong mi for fraet hem barava katdaon.—Philippians 4:6, 7.

Mi bin herem hao sapos man klosap for dae olketa klia memory savve kamap long mind and kaen tingting for sei mi shud duim samting olsem and olsem savve kamap. Mi ting bak and sorre from mi no tok abaotem Kingdom long young girl wea sidaon saed long mi and mi promis hao sapos mi no dae, mi bae iusim evri chance for witness. Mi tingting tu abaotem service bilong mi for Jehovah.

Taem aeroplane start for gogo daon, mi savve lukim olketa fire trak, ambulance, and staka pipol stanbae. Then mifala feelim aeroplane barava seke taem andanit bilong plane hem banga long airfield. Taem plane hem ski antap long cement bilong airfield, hem mekem olketa spark flae ap. Olketa fire trak long tu saed long aeroplane kwiktaem spreim wata antap plane for mekem hem cold daon.

Gogo, bihaen lelebet taem, plane hem stop nao. Mifala evriwan klapem hand, from mifala hapi tumas pilot hem deal witim emergency hia long gudfala wei. Then olketa talem mifala for stretawe go aot from aeroplane. Mifala kwiktaem go long olketa door and slaed go daon long grass wea stap long midol long airfield.

Taem mi standap farawe lelebet and body seksek from evri samting wea happen, mi luk go long datfala plane wea lei antap long airfield. Lucky nao, tu-thri passenger nomoa garekil, and olketa no garekil big tumas. Insaed olketa ambulance wea stap raon, samfala kasem medical treatment for helpem olketa deal witim wei wea disfala emergency affectim olketa.

Mi plan for kasem haos long naen klok long naet, bat fofala hour bihaen nao mi just kasem haos. Bat sapos mi markem diswan witim samting wea happen, mi hapi nomoa from mi laef yet! Samting wea kasem mi hem barava mekem mi tingting. Hem mekem mi lukim hao laef hem savve change enitaem. Hem mekem man hambol taem iumi savve hao insaed tu-thri minute nomoa man savve lusim laef bilong hem. Taem man no sure sapos hem bae laef or dae, hem maet tu leit nao for changem laef or for duim eni gud samting moa for God. Distaem mi barava tinghae long chance wea mi garem for iusim laef bilong mi long wisefala wei and for duim best bilong mi each day for servem God bilong mi Jehovah.—Psalm 90:12.