February

Waswe, iu wanfala Witness bilong Jehovah wea baptaes finis? Sapos olsem, iu garem wanfala spesol samting, wea hem nao wei for fren witim Jehovah. Nomata olsem, iumi mas careful nogud olketa hevi wea iumi kasem from world bilong Satan and olketa wik point bilong iumi spoelem wei wea iumi fren witim Jehovah. Dastawe iumi evriwan mas gohed waka hard for strongim wei wea iumi fren witim Jehovah. Waswe, iu barava fren gud witim Jehovah? Waswe, iu laek for strongim wei wea iu fren witim Jehovah? James 4:8, wea hem text bilong iumi for tuday, storyim wanem iu mas duim. Sapos iu duim samting for fren gud witim Jehovah, bae hem fren gud witim iu tu. Taem iu gohed for duim olsem, datwan bae barava strongim wei wea iu fren witim Jehovah. Iu bae garem sem feeling olsem Jesus wea sei: “Man wea sendem mi kam hem tru, and . . . mi savve long hem.” — John 7:28, 29. w15 4/15 3:1, 2

Maet wanfala member long famili hem disfellowship. Iu savve finis Bible talem iumi for no associate witim olketa wea disfellowship. (1 Cor. 5:11; 2 John 10) Bat from iu lovem famili member bilong iu, maet long tingting bilong iu hem hard tumas nao for iu obeyim wanem Bible talem. Waswe, bae iu trustim Dadi bilong iu long heven for strongim iu for gohed faithful for obeyim hem? Waswe, bae iu ting long diswan olsem chance for iu strongim wei wea iu fren witim Jehovah? Taem iumi ting raonem wanem Adam duim, datwan helpem iumi for luksavve iumi mas lovem Jehovah winim eni narawan. (Matt. 22:37, 38) Taem iumi garem strongfala love for Jehovah, iumi savve helpem olketa relative bilong iumi for kasem gud samting, nomata olketa worshipim Jehovah or nomoa. Sapos iu barava feel sorre bikos wanfala famili member hem disfellowship, prea long Jehovah and talem hem evri tingting and feeling bilong iu.—Phil. 4:6, 7. w15 4/15 4:14, 16

For feel gud abaotem wanem olketa narawan duim and wanem iumiseleva duim hem no rong. Hem no rong for iumi tinghae long gud samting wea famili bilong iumi duim, gud samting abaotem culture bilong iumi, or ples wea iumi growap. (Acts 21:39) Bat wanfala wei for praod wea no stret hem stap. Hem savve spoelem wei wea iumi fren witim olketa narawan and main wan nao Jehovah. Man wea garem diskaen wei for praod savve feel nogud taem hem kasem kaonsel. Maet hem no hambol for followim datfala kaonsel bat hem rejectim datwan. (Ps. 141:5) Diskaen wei for praod hem mekem man tinghae tumas long hemseleva, bighed, and tingse hem gud winim narawan. Jehovah heitim pipol wea praod olsem and bighed. (Ezek. 33:28; Amos 6:8) Bat Satan barava hapi taem pipol followim wei bilong hem for praod and tokplas abaotem olketa seleva. Masbi Satan hapi fogud taem Nimrod, Pharaoh, and Absalom tokplas abaotem olketa seleva!—Gen. 10:8, 9; Ex. 5:1, 2; 2 Sam. 15:4-6. w15 5/15 2:5, 6

Taem Jesus stap long earth, hem followim example bilong Dadi bilong hem and duim staka samting for helpem pipol. (1 Cor. 1:24) Hem no duim olketa samting hia for showimaot hem garem paoa nomoa bat hem duim bikos hem tingim pipol and laek for helpem olketa tu. Ting raonem datfala story long Matthew 14:14-21. Jesus feedim samting olsem 5,000 man, witim olketa woman and olketa pikinini tu long faevfala bred and tufala fish nomoa. Hem duim datwan bikos hem barava lovem pipol and laek for helpem olketa. Masbi staka kaikai nao Jesus provaedem, bikos olketa pipol hia “kaikai and olketa fulap nao.” Datfala kaikai strongim olketa taem olketa go bak long haos bilong olketa wea stap farawe. (Luke 9:10-17) And taem evriwan kaikai finis olketa disaepol fulimap 12-fala basket witim olketa leftova kaikai! w15 6/15 1:8, 9

Wei for durong hem big tumas long world distaem. Nomata olsem, Jehovah savve helpem iumi for evritaem duim wanem hem laekem. Sapos iumi laekem Jehovah for hapi long iumi, iumi mas rejectim olketa samting wea Hem no laekem. Bat from iumi no perfect, maet iumi start for garem tingting for laek durong, olsem fish wea laek kaikaim bait long wanfala huk. Sapos iumi start for garem dirty tingting, iumi mas kwiktaem aotem datwan. Sapos iumi no duim olsem, feeling for laek durong bae kamap strong, and taem chance kamap maet iumi durong nao. Hem nao wanem Bible talem. Hem sei: “Taem datfala feeling for laekem samting hem kamap strong tumas, hem mekem man for duim sin.” (Jas. 1:14, 15) Feeling for laekem rong samting savve grow insaed heart bilong iumi. Dastawe iumi mas barava careful long wanem iumi start for laekem. Sapos iumi rejectim feeling for laekem rong samting, bae iumi stap klia long wei for durong and misstim olketa nogud samting wea kamaot from datwan.—Gal. 5:16. w15 6/15 3:1-3

Samting olsem 6,000 year go finis, plan bilong God for disfala earth hem gohed for happen. Dastawe Jehovah sei evri samting long datfala taem “hem barava gud tumas!” (Gen. 1:31) Then Satan hem againstim God, and start long datfala taem, staka pipol no duim nao wanem God laekem. Bat distaem, samting olsem eit million pipol nao worshipim Jehovah. Olketa hia prea long God and askem hem for duim samting wea hem laek for duim long earth, and olketa duim tu wanem God laekem. Olketa followim long laef bilong olketa wanem God talem olketa for duim, and olketa strong for teachim nara pipol abaotem Kingdom. Iumi bae gohed prea long Jehovah for duim wanem hem laek for duim long earth, go kasem taem wea hem bae finisim evri enemy bilong hem. Then earth bae kamap paradaes and staka billion pipol bae laef bak. (John 5:28, 29) Iumi bae hapi tumas for welkamim bak olketa wea iumi lovem wea dae finis! w15 6/15 4:15, 17

Iumi savve story abaotem “spiritual paradaes” staka taem, bat wanem nao datwan hem minim? Hem minim wei wea pipol bilong Jehovah enjoyim staka spiritual samting distaem, wea mekem olketa garem peace witim God and olketa nara brata and sista. Spiritual paradaes hem difren from spiritual temple. Datfala spiritual temple hem minim arrangement wea God mekem for olketa man fren witim hem and worshipim hem. Datfala spiritual paradaes hem mekem iumi luksavve long olketa wea God hapi long olketa, and wea worshipim hem long datfala spiritual temple. (Mal. 3:18) Iumi hapi tumas bikos start long 1919, Jehovah letem olketa man wea no perfect for waka tugeta witim hem for strongim and mekem grow disfala spiritual paradaes! Waswe, iu tu sapotim disfala nambawan waka? Waswe, iu tinghae long disfala privilege for waka tugeta witim Jehovah for mekem hem kasem praise long ‘ples wea hem putim leg bilong hem,’ wea hem nao disfala earth? w15 7/15 1:10, 11

Gog bae attakim pipol bilong God taem samfala anointed Christian stap yet long earth. Wanem nao pipol bilong God bae duim long datfala taem? Olketa bae followim disfala toktok: “Iufala bae no need for faet. Standap redi, standap kwaet, and lukim wei wea Jehovah bae sevem iufala. . . . Iufala mas no fraet or seksek.” (2 Chron. 20:17) Bihaen Gog start for attakim pipol bilong God, evri anointed Christian wea stap yet long earth bae go ap long heven. Revelation 17:14 storyim samting wea olketa long heven bae duim taem Gog start for attakim pipol bilong God. Olketa enemy bilong pipol bilong God “bae faetem datfala Pikinini Sheepsheep bat from hem nao Lord bilong olketa lord and King bilong olketa king, datfala Pikinini Sheepsheep bae winim olketa. Olketa wea God chusim and wea faithful long God, olketa tu bae winim olketa.” So Jesus, witim 144,000 king wea bae rul witim hem long heven, bae olketa kam for sevem pipol bilong God long earth. w15 7/15 2:16

From Jehovah nao invaetem iumi long olketa meeting, evri samting iumi duim, lukluk bilong iumi, and kaleko bilong iumi shud showimaot respect long hem. Bat iumi mas balance. Jehovah laekem iumi and pipol wea iumi invaetem for kam long Kingdom Hall for enjoyim olketa meeting. Bat iumi shud no duim eni samting wea no showimaot respect for olketa meeting. Dastawe kaleko wea iumi werem mas fitim, iumi no sendem text message, storystory, or kaikai long taem bilong meeting. Dadi and mami shud lanem pikinini bilong olketa for no ranran or plei insaed long Kingdom Hall. Taem Jesus lukim pipol salem olketa samting insaed long temple, hem kros fogud and raosem olketa from temple. (John 2:13-17) Kingdom Hall hem ples wea iumi lane abaotem Jehovah and worshipim hem. So hem no stret tu for duim bisnis long Kingdom Hall.—Comparem Nehemiah 13:7, 8. w15 7/15 4:7, 8

Bible sei “long olketa last day,” wei bilong wicked pipol bae worse go moa. (2 Tim. 3:13; Matt. 24:21; Rev. 12:12) So iumi savve olketa nogud samting long world bae kamap worse go moa long future. Bat waswe, hem fitim for iumi tingse bifor “datfala big trabol” hem start, evri samting long world mas kamap barava nogud tumas winim distaem? (Rev. 7:14) Olsem example, waswe, bae war kamap long evri kantri, and klosap evriwan long world nao bae sik or hangre? Sapos datwan happen, evriwan bae luksavve olketa profesi insaed long Bible kamap tru. Nomata pipol wea daotem wanem Bible talem tu bae luksavve long datwan. Bat Jesus sei, long olketa last day staka pipol bae no luksavve long saen wea showimaot hem stap. Bae olketa gohed duim nomoa wanem olketa duim evriday, and bae olketa seke fogud taem day bilong Jehovah hem kam. (Matt. 24:37-39) So iumi shud no tingse evri samting long world mas kamap barava nogud tumas bifor “datfala big trabol” hem start.—Luke 17:20; 2 Pet. 3:3, 4. w15 8/15 2:6, 7

Waswe, iumi misstim staka gud samting long laef distaem from iumi iusim laef bilong iumi for mek redi for laef long niu world? Barava nomoa nao! Wei for worshipim Jehovah hem best samting for duim long laef distaem. Iumi no worshipim Jehovah bikos samwan nao forcem iumi, or bikos iumi no laek for dae long datfala big trabol nomoa. Iumi worshipim Jehovah bikos taem iumi fren gud witim hem iumi garem gudfala laef and iumi barava hapi. Jehovah wakem iumi for barava hapi taem iumi worshipim hem. Taem Jehovah leadim iumi and iumi savve hem lovem iumi, datwan hem barava spesol samting. (Ps. 63:1, 2) Iumi evriwan savve barava hapi from wei for worshipim Jehovah long full heart. Samfala wea worshipim Jehovah for staka year finis olketa talem hao diswan nao hem best samting for duim long laef.—Ps. 1:1-3; Isa. 58:13, 14. w15 8/15 3:16

Sapos iumi garem faith, iumi savve duim olketa samting wea pipol tingse hem hard for duim. (Matt. 21:21, 22) Olsem example, samfala long iumi barava changem wei bilong iumi, wea datwan mekem pipol wea savve long iumi barava sapraes. Iumi duim datwan bikos iumi lovem Jehovah, and Jehovah nao helpem iumi for change. (Col. 3:5-10) From iumi garem faith, iumi dedicate long Jehovah and iumi kamap fren bilong hem. Iumi no savve fren witim God sapos hem no helpem iumi for fren witim hem. Faith wea iumi garem hem strongim iumi. Olsem example, faith helpem iumi for againstim olketa attak bilong Devil, wea hem nao main enemy bilong iumi. (Eph. 6:16) And from iumi trustim Jehovah, datwan helpem iumi for no wari tumas taem iumi kasem hard taem. Jehovah promis hem bae givim wanem iumi needim sapos iumi garem faith long hem, and Kingdom nao hem first samting long laef bilong iumi. (Matt. 6:30-34) And tu, from iumi garem faith, Jehovah bae givim iumi laef olowe.—John 3:16. w15 9/15 3:4, 5

Long wanem wei nao Jehovah showimaot hem “lovem iumi firstaem”? Bible sei: “Christ hem dae for iumi taem iumi sin yet, wea diswan showimaot God hem lovem iumi.” (Rome 5:8) Love hem main fasin bilong Jehovah. Dastawe Jesus sei: “Iu mas lovem God bilong iu Jehovah long full heart bilong iu, long full soul bilong iu, long full mind bilong iu, and long full strong bilong iu.” (Mark 12:30) Jehovah laekem iumi for lovem hem long “full heart” bilong iumi. Jehovah bae no hapi long iumi sapos iumi lovem samwan or nara samting winim wei wea iumi lovem hem. Bat for lovem Jehovah hem no wanfala feeling nomoa. Hem laekem iumi for lovem hem long “full mind,” and long “full strong” bilong iumi tu. Diswan minim wanem iumi tingim and samting wea iumi duim mas showimaot iumi lovem Jehovah.—Mic. 6:8. w15 9/15 5:1-3

Samfala taem maet iumi no luksavve long olketa wei wea God helpem iumi. Why nao olsem? Taem iumi kasem staka problem, maet iumi no tingim olketa wei wea Jehovah helpem iumi finis. Hem nao samting wea kasem Elijah. Hem man for no fraet. Bat taem Queen Jezebel laek for killim hem dae, hem fraet nao. Hem no tingim wanem Jehovah duim finis for helpem hem. Bible sei Elijah hem laek for dae nomoa. (1 Ki. 19:1-4) Wanem nao hem shud duim? Hem shud askem Jehovah for helpem hem! (1 Ki. 19:14-18) From Job tingim nomoa olketa nogud samting wea kasem hem, hem no luksavve long tingting bilong Jehovah abaotem olketa samting hia. (Job 42:3-6) Samfala taem, maet iumi tu tingim nomoa olketa problem wea iumi kasem. Long taem olsem, wanem nao savve helpem iumi for luksavve long olketa wei wea God helpem iumi? Iumi mas ting raonem wanem Bible talem abaotem olketa problem bilong iumi. Datwan bae helpem iumi for luksavve long olketa wei wea Jehovah helpem iumi. w15 10/15 1:15, 16

Jesus evritaem strong for duim preaching waka. Olsem example, no longtaem bihaen hem start for duim ministry, pipol long Capernaum laekem Jesus for gohed stap long taon bilong olketa. Wanem nao hem duim? Hem gohed strong for duim wanem God laekem. Hem sei: “Mi mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.” (Luke 4:42-44) Jesus baeleg go long staka farawe ples for preach and teachim plande pipol abaotem gud nius. Nomata hem perfect, hem savve taed tu, and hem mas rest bikos hem waka hard tumas.(Luke 8:23; John 4:6) Wanfala taem wea Jesus teachim olketa disaepol bilong hem wanfala important leson, wanfala man sei long Jesus: “Teacher, dadi bilong mi hem dae finis so iu talem brata bilong mi for sharem olketa samting wea dadi leavim for mitufala.” Jesus no trae for stretem problem bilong datfala man.—Luke 12:13-15. w15 10/15 3:10, 11

Love nao hem main fasin bilong God. Bible no sei God hem garem love, bat hem sei God hem love. Evri samting wea hem duim showimaot love. Iumi hapi tumas love nao mekem Jehovah for wakem full universe and evri samting wea laef! Jehovah hem lovem olketa man. Datwan mekem iumi barava sure plan bilong hem for olketa man bae kamap tru. Pipol wea obeyim hem bae barava hapi. Olsem example, from Jehovah lovem iumi, “hem markem wanfala day for judgem olketa man evriwea long world. Hem bae judgem olketa long stretfala wei and hem bae iusim wanfala man wea hem markem for duim diswan,” wea hem nao Jesus Christ. (Acts 17:31) Iumi barava sure samting wea datfala scripture talem bae kamap tru. Pipol wea obeyim God bae kasem barava gud samting long future, and gud samting hia bae gohed for olowe. w15 11/15 3:1, 2

Nomata wanem nao pipol duim or talem taem iumi preach long olketa, iumi followim kaonsel long Bible. Taem iumi ansarem pipol wea askem kwestin abaotem wanem iumi bilivim, iumi mas “hambol and showimaot bigfala respect” bikos iumi lovem olketa. (1 Pet. 3:15) Nomata pipol tok kros long iumi taem iumi preach long olketa, iumi showimaot love long olketa and followim example bilong Jesus. Taem pipol tok spoelem Jesus, “hem no tok spoelem olketa. Taem hem safa, hem no sei bae hem changem bak nogud samting wea pipol duim long hem, bat hem trustim God.” (1 Pet. 2:23) So iumi mas evritaem hambol and followim disfala kaonsel: “No changem bak nogud samting wea narawan duim long iufala or tok spoelem man wea tok spoelem iufala. Bat iufala mas tok kaen long hem.”—1 Pet. 3:8, 9. w15 11/15 4:17, 18

Staka taem Jesus talem olketa disaepol hem lovem olketa. (John 15:9) Jesus and olketa disaepol duim staka samting tugeta. (Mark 6:31, 32; John 2:2; 21:12, 13) Hem gud for talem olketa pikinini iu lovem olketa, and duim olketa samting wea showimaot datwan. (Prov. 4:3) Samuel, wea hem from Australia, hem sei: “Taem mi smol, evri evening dadi savve readim long mi samfala story insaed long Bible Story Buk Bilong Mi. Hem ansarem olketa kwestin bilong mi, hagem mi, and kissim mi bifor mi go sleep. Mi sapraes taem mi faendaot parents bilong dadi bilong mi no hagem and kissim hem taem hem smol pikinini! Nomata olsem, dadi bilong mi traem best bilong hem for showimaot hem lovem mi. Datwan helpem mi for fren gud witim hem, and mi hapi and feel sef.” Olketa pikinini bilong iu bae feel olsem tu sapos iu evritaem sei long olketa, “mi lovem iu.” Hagem and kissim olketa. Story witim olketa, kaikai tugeta, and plei witim olketa. w15 11/15 1:3, 4

Long 1919, wanfala smol grup bilong olketa Bible student kamap “datfala wakaman wea faithful and wise.” Long datfala taem, datfala wakaman iusim English languis for story long pipol bilong God. Bat distaem, datfala wakaman givimaot olketa Bible pablikeson long winim 700 languis. Tru tumas, pipol bilong God needim wanfala Bible transleison wea hem stret and hem isi for minim. So organization bilong God startim Niu World Bible Transleison Komiti, and datfala komiti releasem sixfala volume bilong Bible from 1950 go kasem 1960. Long wanfala convention long August 2, 1950, olketa releasem firstfala volume. Long datfala convention, Brata Knorr sei hem laekem New World Translation Bible for helpem staka million pipol for savve long Jehovah. w15 12/15 1:15, 17

Iumi mas waka hard for tingim olketa gudfala toktok for talem. Wanem nao bae helpem iumi for savve long wanem for talem? Taem iumi readim Bible and olketa pablikeson bilong iumi, iumi savve lanem olketa toktok wea savve helpem iumi taem iumi story long narawan. Iumi savve lanem mining bilong olketa toktok wea iumi no minim gud. Example bilong Jesus tu savve helpem iumi for talem gudfala toktok. Jesus savve long wanem for talem, bikos Jehovah lanem hem hao for story gud, ‘mekem hem savve long wanem for talem long man wea taed.’ (Isa. 50:4) Sapos iumi ting raonem firstaem wanem for talem, datwan savve helpem iumi for talem gudfala toktok. (Jas. 1:19) Bifor iumi story long samwan, hem gud for tingim diswan: ‘Sapos mi story long wei olsem, waswe, bae hem minim wanem mi talem? Waswe, bae hem hapi long wanem mi talem, or bae hem feel nogud?’ w15 12/15 3:12

Olketa Christian long Judea, and especially olketa wea stap long Jerusalem, mas kwiktaem lusim ples bilong olketa. Why nao olsem? Long 33 C.E., Jesus talem olketa disaepol, taem olketa lukim army hem raonem Jerusalem, olketa mas ranawe go long olketa maunten. (Luke 21:21-24) Insaed 28 year bihaen Jesus talem datwan, olketa Christian long Israel gohed faithful nomata staka pipol spoelem and againstim olketa. (Heb. 10:32-34) Bat Paul laek helpem olketa for redi for olketa hard samting wea bae kasem olketa long future. (Matt. 24:20, 21; Heb. 12:4) Olketa mas garem strongfala faith mekem olketa no givap and followim warning bilong Jesus for mas ranawe mekem olketa no dae. (Heb. 10:36-39) So Jehovah iusim Paul for raetem leta long olketa brata and sista hia. Datfala leta nao hem Bible buk Hebrew. Paul raetem datwan for strongim olketa and helpem olketa for gohed faithful. w16.01 1:1, 2

Sapos iumi laekem God for lovem iumi, iumi mas lovem olketa brata and sista. (1 John 3:16) Hao nao iumi savve showimaot iumi lovem olketa brata and sista? Example bilong Jesus savve helpem iumi for showimaot love long olketa narawan. Taem Jesus stap long earth, hem helpem pipol, especially olketa wea hambol. Hem healim pipol wea sik and kripol, hem mekem olketa wea blind for lukluk, olketa wea earpas for herehere, and olketa wea no savve toktok for toktok. (Matt. 11:4, 5) Jesus no olsem olketa bigman bilong religion, hem hapi for teachim pipol wea laek for lane abaotem God. (John 7:49) Hem lovem olketa wea hambol and waka hard for helpem olketa. (Matt. 20:28) Waswe, iu savve duim samting for olketa brata and sista long kongregeson bilong iu? Maet iu savve helpem samfala. Maet samfala olo needim help. From God lovem iumi, iumi tu shud lovem olketa brata and sista bilong iumi! w16.01 2:12-14

Waswe, olketa nara sheepsheep mas savve long hu nao evri anointed Christian wea laef yet long earth? Nomoa. Why nao olsem? Bikos iumi no barava sure hu long olketa bae kasem datfala reward for go long heven. Nomata God chusim olketa for go long heven, olketa mas gohed faithful long Jehovah for kasem datfala reward. Satan savve long datwan, dastawe hem iusim olketa “laea profet” for trae “trikim olketa wea God chusim.” (Matt. 24:24) Olketa anointed Christian no sure olketa bae go long heven go kasem taem wea Jehovah disaedem olketa fit for kasem datfala reward. Taem Jehovah disaedem datwan, olketa anointed Christian kasem lastfala mark. Datwan hem happen just bifor olketa dae or bifor “datfala big trabol” hem start.—Rev. 2:10; 7:3, 14. w16.01 4:2, 3

Long wanem wei nao preaching waka hem join witim plan bilong Jehovah for olketa man? Plan bilong God hem for olketa man laef olowe long earth, and datfala plan hem no change taem Adam hem sin. (Isa. 55:11) God mekem wei for iumi kamap free from sin and dae. Wanem nao hem duim? Hem sendem kam Jesus long earth for sakrifaesim laef bilong hem. Bat for kasem gud samting from datfala sakrifaes, olketa man mas obeyim God. So Jesus teachim pipol wanem nao God laekem olketa for duim, and hem talem olketa disaepol bilong hem tu for duim sem samting. Taem iumi preach and helpem olketa narawan for kamap fren bilong God, iumi waka tugeta witim God for sevem olketa man from sin and dae. And tu, iumi showimaot iumi lovem olketa and iumi lovem Jehovah. God “laekem tumas for evri difren kaen man mas sev and for garem stretfala savve abaotem olketa tru teaching.”—1 Tim. 2:4. w16.01 5:15, 16

From Ahaz duim staka nogud samting, maet datwan savve mekem son bilong hem Hezekiah for kros long Jehovah or followim nogud wei bilong dadi bilong hem. Distaem, samfala tingse olketa garem gudfala reason for “kros long Jehovah” or organization bilong hem bikos long hard samting wea kasem olketa, nomata hem no olsem samting wea kasem Hezekiah. (Prov. 19:3) Olketa narawan tingse from olketa growap long famili wea samfala duim nogud samting, maet datwan spoelem laef bilong olketa and mekem olketa tu duim nogud samting. (Ezek. 18:2, 3) Bat waswe, kaen tingting olsem hem stret? Example bilong Hezekiah showimaot kaen tingting olsem hem no stret! Iumi no garem eni reason for againstim Jehovah or kros long hem. Jehovah no kosim nogud samting for kasem pipol. (Job 34:10) Hem tru, olketa pikinini savve lanem gud samting or nogud samting from famili wea olketa growap long hem. (Prov. 22:6; Col. 3:21) Nomata olsem, Jehovah wakem iumi long wei wea iumi savve chus for duim gud samting or nogud samting. So nomata famili duim nogud samting, iumi savve chus for duim stret samting.—Deut. 30:19. w16.02 2:8-10

Abner helpem Saul for lukaotem David for killim hem dae, nomata Abner savve God chusim David for kamap nextfala king long Israel. (1 Sam. 26:1-5) Bihaen Saul dae, Abner no sapotim David. Bat hem laekem son bilong Saul, Ish-bosheth, for kamap king. Gogo, maet Abner laekem hemseleva for kamap king dastawe hem durong witim wanfala waef bilong King Saul. (2 Sam. 2:8-10; 3:6-11) Absalom, son bilong King David, hem no faithful long God bikos hem no hambol. Hem laek for kamap king, so hem tekem “wanfala chariot and olketa horse and 50-fala man for ran go firstaem long hem.” (2 Sam. 15:1) And tu, hem switim staka Israelite for saedem hem. Hem laek for killim dae dadi bilong hem tu, nomata hem savve Jehovah nao chusim David for king long Israel. (2 Sam. 15:13, 14; 17:1-4) Taem samwan no hambol and laek for kasem paoa, hem bae no isi for hem gohed faithful long God. From iumi lovem Jehovah, iumi no laek for olsem Abner and Absalom wea tingim olketa seleva nomoa and duim nogud samting. w16.02 4:9-11

Sapos iu garem strongfala faith, samting wea iu duim bae showimaot datwan. Taem fasin bilong olketa young wan hem klin and olketa followim wanem God laekem, datwan mekem olketa for “holy.” (2 Pet. 3:11) Olsem example, tingim fasin bilong iu insaed six month wea go finis. Taem iu kasem test, waswe, iu ting raonem gud wanem nao stret samting wea God laekem iu for duim? (Heb. 5:14) Waswe, iu tingim enitaem wea iu no foldaon long wanfala test or iu no duim nogud samting wea olketa nara young wan laekem iu for duim? Waswe, iu showimaot gudfala wei taem iu long skul? Waswe, iu gohed faithful long Jehovah, or iu followim wei bilong olketa narawan long skul mekem olketa no mekfani long iu? (1 Pet. 4:3, 4) Hem tru, no eniwan long iumi hem perfect. Samfala taem, nomata olketa wea worshipim Jehovah for staka year finis maet fraet for preach long narawan. Bat man wea dedicate finis long God hem hapi hem wanfala Jehovah’s Witness, and hem evritaem showimaot gudfala wei. w16.03 2:10, 11

Start kam long taem wea Jehovah wakem olketa man, hem givim instruction long olketa. Olsem example, long garden bilong Eden, Jehovah givim instruction wea bae leadim olketa man for kasem laef olowe and for hapi. (Gen. 2:15-17) Bat Adam and Eve no followim wanem Jehovah talem. Eve followim advaes from wanfala snek nomoa, and Adam followim samting wea Eve talem. Wanem nao kamaot from datwan? Tufala evriwan kasem nogud samting and tufala dae and bae no laef moa. And tu, bikos Adam and Eve no obeyim God, datwan mekem evri man for followim wanfala road wea lead go long dae. Distaem, Jehovah leadim pipol bilong hem mekem olketa stap klia long olketa danger samting and for kasem laef olowe. Jehovah hem olsem wanfala shepherd wea leadim and protectim olketa sheepsheep mekem olketa no kasem eni nogud samting. w16.03 4:2, 3